Moderna vaccine laban sa COVID-19, aprub na sa US

ni Thea Janica Teh | December 19, 2020

Inaprubahan na ng United States nitong Biyernes ang paggamit ng COVID-19 vaccine na Moderna, ang ikalawang vaccine na gagamitin bilang emergency use.

Ayon kay Food and Drug Administration (FDA) Chief Stephen Hahn, "With the availability of two vaccines now for the prevention of COVID-19, the FDA has taken another crucial step in the fight against this global pandemic."

Agad din itong inanunsiyo ni US President Donald Trump sa kanyang Twitter account at sinabing "Congratulations, the Moderna vaccine is now available!"

Ang US ang kauna-unahang nag-authorize ng two-dose regimen sa Moderna, na ngayon ay ikalawang vaccine na ipamamahagi sa Western country sumunod sa Pfizer-BioNTech.

Nitong Disyembre 2, inaprubahan ng Britain ang Pfizer-BioNTech vaccine at sinundan na ito ng iba pang bansa sa buong mundo kabilang ang US.

Ang Pfizer at Moderna vaccine ay parehong base sa cutting edge mRNA (messenger ribonucleic acid) technology at pareho ring nagpakita ng 95% effectivity laban sa COVID-19.

May ilang side effects na naitala sa mga vaccine na ito tulad ng pain at the injection site, tiredness, headache, muscle pain, chills, joint pain, swollen lymph nodes, nausea, vomiting at fever.

Pero ayon sa US FDA, walang dapat ikabahala ang publiko dahil under monitoring na nila ang mga nakaranas ng side effects.

Plano nang ipadala sa US ang 20 milyong Moderna vaccine ngayong buwan at 80 milyon sa unang quarter ng 2021.

Samantala, ipamamahagi naman ang 100 milyong dose ng Moderna vaccine sa second quarter ng taon.

Kulong sa nagbebenta ng ilegal na COVID-19 vaccines

ni Lolet Abania | October 29, 2020

Nagbabala ang Malacañang sa publiko laban sa mga nagbebenta ng vaccines kontra umano sa COVID-19 na may karampatang parusa para sa mga ito.

Sa naganap na news conference sa Bohol kanina, ayon kay Presidential Spokesperson Harry Roque, ang mahuhuling nagbebenta ng nasabing bakuna na hindi rehistrado sa Food and Drug Administration (FDA) ay papatawan ng pagkakakulong.

“Mayroon pong ipinapataw na parusa sa kahit sinong magbebenta ng gamot o bakuna na hindi po aprubado ng FDA. Mayroon pong kulong 'yan, itigil ninyo po 'yan,” sabi ni Roque.

Nag-isyu ng statement si Roque matapos ang naglabasang text messages tungkol sa sinasabi umanong COVID-19 vaccines na ibinebenta na nagkakahalaga ng P50,000 kada isang turok.

Gayundin, noong Martes, ayon kay FDA Director General Eric Domingo, nakatanggap siya ng report na isang establisimyento mula sa Makati City ang nagbebenta umano ng COVID-19 vaccines na may advertisements pang nakasulat sa Chinese.

“We’re continuously monitoring at mukhang mapapadalas po ang ating inspection doon sa facility na 'yun to make sure na hindi po nagbebenta or nag-a-administer ng unregistered na bakuna,” sabi ni Domingo.

Gayunman, patuloy ang paalala ng pamahalaan sa publiko na wala pang nadidiskubreng gamot o bakuna laban sa nakamamatay na sakit na COVID-19.

FDA, nagbabala sa mga asukal, tsokolate atbp. na 'di safe kainin

ni Thea Janica Teh | October 28, 2020

Binalaan ng Food and Drug Administration (FDA) ang publiko nitong Martes nang gabi sa pagbili at paggamit ng mga hindi rehistradong produkto tulad ng asukal na ang tatak ay SM Bonus.

Sa inilabas na advisory ng FDA nitong Oktubre 22, 2020, ito ang ilan sa mga produktong hindi pa rehistrado:

• Melvan Ginger Brew with Turmeric and Lemongrass

• Sweet Valley Freeze Dried Cranberry Coated with Milk Chocolate

• Lorenzo Farm Dark Chocolate

• SM Bonus Brown Sugar

• SM Bonus Refined Sugar

Nagsagawa umano ang FDA ng post-marketing surveillance sa mga produktong nabanggit at napag-alamang wala itong sapat na dokumento tulad ng Certificate of Product Registration (CPR).

Ayon sa FDA, hindi sigurado ang kalidad at kaligtasan sa pagbili at pagkain ng mga ito dahil hindi ito dumaan sa kanilang ebalwasyon. Ilan sa mga kinakailangan ng mga processed food operators ay ang 2 uri ng authorization mula sa FDA upang masiguro na pasado sa regulatory body standard ang kumpanya at produkto nito bago isapubliko.

Sa ngayon ay wala pang inilalabas na pahayag ang pamunuan ng SM Bonus at iba pang brand tungkol dito.

Matatandaang noong Setyembre ay nagbabala ang ahensiya sa pagbili ng liver spread na Reno dahil hindi ito rehistrado.

Agad naman itong inaksiyunan ng Reno at ngayong Oktubre ay bumalik na ulit sa merkado.