5 katao, sugatan sa pagsabog ng bus sa Koronadal City

ni Lolet Abania | May 26, 2022

Lima katao ang nasugatan matapos ang pagsabog ng hinihinalang improvised explosive device (IED) sa loob ng isang pampasaherong bus sa kahabaan ng Gensan Drive sa Koronadal City, South Cotabato ngayong Huwebes.

Kinilala ng pulisya ang tatlong biktima na sina Joseph Rodolfo Valenzuela, Jonalyn Ferrer at Angel Ferrer, habang inaalam pa ang pagkakakilanlan ng dalawa pang nasaktan.

Una nang sinabi ng pulisya na kabilang sa nasugatan ay dalawang tricycle drivers na nakasakay dito sa kahabaan ng highway na nasa tabi ng bus nang ang hinihinalang IED ay sumabog bandang alas-12:30 ng tanghali.

Mabilis na rumesponde ang Philippine National Police (PNP)-South Cotabato Explosives and Ordnance Disposal and Canine Group sa pinangyarihan ng insidente. Kinumpirma naman ito ni Koronadal City Mayor Eliordo Ogena. Agad na binigyan ang mga biktima ng first aid at dinala sa pinakamalapit na ospital.

“May isang na-injure na tricycle driver, kasi nasa likod ng Yellow Bus. At sinubmit namin siya sa MRI to determine whether may damage sa ulo niya. Kasi ang reklamo niya, mukhang naapektuhan ang ear drum niya,” ani Ogena isang interview.

“Siniguro lang namin na talagang walang impact ‘yung bomba sa kanya,” dagdag ng mayor. Nakuhanan naman ang pagsabog ng surveillance camera na pag-aari ng isang pribadong kumpanya, kung saan nagana pang explosion sa likuran ng bus.

“Nagtataka rin ako bakit nakalusot ‘yan. Ang pagkakaalam ko mahigpit naman ‘yung mga bus dito. Bago ka umakyat, ini-inspect naman ‘yan. Kung paano nakalusot, siguro that will be subject of an investigation also,” giit ni Ogena. Ayon kay Ogena ang bus ay nagmula sa Tacurong City, kung saan isa pang pagsabog din ang nangyari sa mga oras na iyon.

“Iniimbestigahan ito kasi, baka may koneksyon ito. Mahirap naman sabihin na coincidence eh. May sumabog din sa Tacurong, na ilang kilometro lang ‘yan, mga more or less 30 kilometers away from Koronadal City,” pahayag ni Ogena.

“We did not expect this to happen. Nabigla kami sa nangyari. Siguro, hihintayin ko na lang ‘yung resulta, kung ano ang dahilan, ano ang motibo ng mga grupo,” dagdag niya.

Sa isang military spot report na ibinigay ni Major Andrew Linao, public information officer ng Western Mindanao Command ng militar, ang naganap na explosion ay dahil sa isang improvised explosive device.

“Directed all units under JTF (Joint Task Force) Central to intensify checkpoint operations and intelligence monitoring,” batay sa report. Sa ngayon, wala pang karagdagang detalye na ibinigay ang mga awtoridad kaugnay sa insidente, habang tumanggi sila sa media interviews hanggang hindi anila, natatapos ang imbestigasyon.

13 patay sa pagsabog sa army bus sa Damascus

ni Lolet Abania | October 20, 2021

Patay ang 13 katao matapos ang naganap na pagsabog sa isang army bus sa Damascus, Syria, ngayong Miyerkules na itinuturing na pinakamadugong pag-atake sa loob ng mga nakaraang taon, batay sa report ng SANA state news agency.

“A terrorist bombing using 2 explosive devices targeted a passing bus on a key bridge in the capital,” ayon sa news agency, kung saan ang initial report ng mga nasawi ay 13 habang 3 ang nasugatan.

Makikita sa inilabas na mga larawan ng SANA, ang isang sunog na bus habang ang bomb squad ay dini-defuse naman ang ikatlong device na pampasabog na itinanim ng mga salarin sa pareho ring lugar.

Sa mga nakalipas na taon, humupa na ang kaguluhan sa Damascus, laluna nang ang tropa at allied militia ang manguna sa pagkubkob sa huling matinding rebelyon sa balwarte ng mga ito malapit sa capital noong 2018.

Granadang walang pin, iniwan sa harap ng broadsheet newspaper company

ni Lolet Abania | July 18, 2021

Isang granada na wala nang pin ang natagpuan ng mga awtoridad mula sa isang kahoy na kariton sa Port Area, Manila ngayong Linggo nang umaga.

Sa report, pasado alas-9:00 ng umaga nakita ang granada sa loob ng kariton na nakaparada sa harapan mismo ng opisina ng pahayagang “The Philippine Star.”

Agad na nilagyan ng pulisya ng kordon at na-secure ang area sa 13th Street at Railroad Street sa Port Area. Ayon kay Police Colonel Robert Domingo, hepe ng Port Area Station ng Manila Police District (MPD), nakita na lang ng may-ari ng cart at isang pedicab driver ang granada na wala na itong pin.

Mabilis namang rumesponde ang mga operatiba ng Explosives and Ordnance Division ng MPD at ang Philippine Coast Guard sa lugar dahil sa insidente. Inialis nila ang kariton sa lugar habang dinala ito sa kalayuan saka nila nai-detonate ang hand grenade.

Inaalam na ng pulisya kung may kaugnayan ito sa naganap na pag-aresto sa isang indibidwal isang oras bago nadiskubre ang granada. Isang lalaki ang nadakip malapit sa lugar matapos na ang kanyang live-in partner ay magsumbong sa mga pulis na siya ay pisikal na sinasaktan at ang kanyang cellphone ay ninakaw. Nakuha sa lalaki ang sinasabing cellphone at isang granada.