Registration para sa murang kuryente, start na

ni Mylene Alfonso @News | August 7, 2023

Sa hangarin na maabot ang mas maraming Pantawid Pamilyang Pilipino Program (4Ps) members at marginalized sector, nag-deploy ng kanilang personnel ang More Electric and Power Corporation (More Power) sa mga barangay para tumanggap ng aplikasyon para mabigyan ng diskwento sa singil sa kuryente o ang lifeline rate subsidy sa ilalim ng Epira Law.

"In addition to accepting applications in our office, we also deploy personnel to barangays for on-site registration," pahayag ni More Power President at CEO Roel Castro.

Ang full rollout ng aplikasyon para sa subsidy ay pinalawig ng DOE hanggang sa Setyembre dahil sa mababang turnout ng aplikasyon.

"There are 4.2 million household beneficiaries of 4Ps, and the registration for lifeline subsidy remains very low. Only those who register will continue to receive a reduction in their electricity bills beginning August 2023," nauna nang pahayag ni Energy Sec. Raphael Lotilla.

Ang discount rate ay depende sa konsumo, nasa 10 percent discount kung ang gamit na kuryente ay nasa 81 kWh hanggang 95 kWh, 20 percent kung 71kWh hanggang 80kWh, 35 percent naman sa kumukonsumo ng 61 kWh hanggang 70kWh, 45 percent kung 51 kWh hanggang 60kWh, 50 percent sa nakakagamit ng 21kWh hanggang 50 kWh, at 100 percent discount kung 20kWh o mababa pa ang buwanang konsumo sa kuryente.

Green energy agreement para sa mas murang kuryente

ni Mylene Alfonso @News | August 5, 2023

Isang tripartite agreement ang nilagdaan sa pagitan ng Energy Regulatory Commission (ERC), Iloilo City Government at More Electric and Power Corporation (More Power) na nagsusulong ng paggamit ng renewable energy resources na magbibigay daan sa pagbaba pa ng presyo ng kuryente.

Sa ilalim ng kasunduan, mag-eestablisa ng one-stop shop na nag-aalok ng renewable energy technologies gaya ng Net-Metering at Distributed Energy Resources (DER) na maaaring pagpilian ng mga consumers.

Ayon kay More Power President at CEO Roel Castro, ang kasunduan sa pagitan ng ERC at Iloilo City ay bilang pagsuporta sa target ng pamahalaan na mabawasan ang greenhouse gas emissions sa pamamagitan ng paggamit na ng renewable energy resources.

Sinabi ni ERC Chairperson at CEO Atty. Monalisa Dimalanta na sa ilalim ng kasunduan ang ERC ang magbibigay ng technical at regulatory expertise.

Nabatid na ang Iloilo City ang ikalawa lamang sa mga pilot Local Government Unit partner ng ERC para sa Net-Metering at sa kanilang greater renewable energy program.

Hinimok ni Iloilo City Mayor Jerry Treñas ang mga residente na lumipat na sa paggamit ng renewable energy para sa tiyak na pagbaba ng kanilang energy consumption.

Modernisasyon vs. taas-singil sa kuryente at brownout

ni Mylene Alfonso @News | July 17, 2023

Patuloy ang joint investigation ng Senate Committee on Energy at Committee on Public Services kaugnay sa malaking problema sa brownout sa iba’t ibang bahagi ng bansa bunsod ng mababang uri ng pamamalakad ng electric cooperatives.

Kaugnay nito, ayon kay Senadora Grace Poe, chairman ng Senate Committee on Public Services, ang pagpasok ng mga private players tulad ng More Electric and Power Corporation (More Power), ang susi para mapabuti ang power service at maiwasan na ang paulit-ulit na brownout.

Ayon sa mambabatas, sa loob lamang ng tatlong taon mula nang mabigyan ng legislative franchise ay nagawang maresolba ng kumpanya ang malaking problema sa brownout at mataas na singil sa kuryente sa Iloilo City.

Ayon naman kay More Power President and Chief Executive Officer Roel Castro, mula nang i-takeover ng kumpanya ang power supply sa Iloilo City mula sa Panay Electric Company (PECO) ay nakapag-invest na ng P1.5 bilyong halaga ng investments na nakatuon para sa modernisasyon ng power distribution facilities.

Bunsod ng modernisasyon, nabawasan ng 90% ang power interruptions, naiwasan ang overloading at illegal connections na nagresulta sa pagbaba ng system loss na ipinapasa sa mga consumer, ang response time sa consumer complaints ay agad ding natutugunan sa loob lamang ng 10 hanggang 15 minuto at bumaba ang singil sa kuryente.