Meralco, nagbukas ng bidding para sa 900-MW power supply

by Mervin Reyes @News | September 30, 2026

Photo: File

Sinimulan na ng Manila Electric Company (Meralco) ang bidding o competitive selection process (CSP) para sa 900-megawatt (MW) baseload power requirement nito na magsisimula sa 2031.

Ayon sa Meralco, inilunsad ang CSP matapos maglabas ang Department of Energy (DOE) ng Certificate of Conformity para sa Terms of Reference (TOR) ng Power Supply Agreements (PSAs).

Inimbitahan ng Meralco ang mga power generation company na magsumite ng Expressions of Interest sa Bids and Awards Committee para sa PSAs hanggang Oktubre 15, 2026.

Itatakda naman ang pre-bid conference sa Nobyembre 6, habang Disyembre 9 ang deadline ng pagsusumite ng bids.

Ayon sa Meralco, ang 15-year PSA na magmumula sa CSP ay sasaklaw sa 600-MW supply pagsapit ng Pebrero 26, 2031, at karagdagang 300 MW pagsapit ng Pebrero 26, 2032, subject sa pag-apruba ng Energy Regulatory Commission (ERC).

Sinabi ng Meralco na layunin ng CSP na matiyak ang sapat at maaasahang suplay ng kuryente para sa lumalaking pangangailangan ng kanilang mga customer.

Bawas ₱0.07 sa singil ng kuryente sa Metro Cebu

by BRO @News | September 29, 2026

Photo: File / Visayan Electric

Bawas ng ₱0.07 kada kilowatt-hour (kWh) ang singil ng Visayan Electric sa mga residential consumer sa Metro Cebu at karatig lugar ngayong Setyembre.

Mula ₱14.96 kada kWh noong Agosto, magiging ₱14.89 na lang ang overall rate ngayong buwan.

Ayon sa Visayan Electric, naiwasan ang mas malaking dagdag-singil dahil sa pakikipagkasundo sa IEMOP na ipagpaliban ang ilang charges at sa bagong price cap ng Energy Regulatory Commission (ERC) para sa Visayas.

Samantala, isinusulong ni Sen. Jinggoy Estrada ang panukalang batas na tuluyang mag-aalis sa system loss charges na ipinapasa ngayon sa mga consumer.

Layunin nitong hindi na pasanin ng mga kabahayan ang gastos sa kuryenteng nawawala dahil sa technical losses, meter tampering at iba pang dahilan.

Bawas-singil sa kuryente

by Mervin Reyes @News | September 26, 2026

Posibleng maramdaman ng mga konsyumer sa Nobyembre ang pagbaba ng singil sa kuryente kasunod ng pagtanggal ng 12% Value-Added Tax (VAT) sa allowable system loss charge.

Naglabas ang Bureau of Internal Revenue (BIR) ng Revenue Memorandum Circular No. 97-2026 noong Setyembre 14, 2026, na nag-aalis ng VAT sa system loss charge na pasok sa cap na itinakda ng Energy Regulatory Commission (ERC).

Layunin ng hakbang na mabawasan ang buwanang gastos ng mga konsyumer sa kuryente.

Tinatayang nasa P20 hanggang P30 ang maaaring matanggal sa VAT component ng system loss charge. Para sa isang karaniwang household na kumokonsumo ng 200 kilowatt-hour (kWh) kada buwan, posibleng umabot sa P20 ang matitipid.

Gayunman, nanawagan ang mga konsyumer para sa iba pang hakbang na makatutulong sa karagdagang pagpapababa ng presyo ng kuryente, lalo na sa gitna ng patuloy na pagtaas ng presyo ng mga produktong petrolyo.