Ilang lugar sa Luzon at Mindanao, kokontrolin ng Comelec para sa BSKE

ni Madel Moratillo @News | September 10, 2023

Planong ilagay ng Commission on Elections (Comelec) sa ilalim ng kanilang kontrol ang ilang lugar sa Luzon at Mindanao para sa darating na Barangay at Sangguniang Kabataan polls.

Ayon kay Comelec Chairman George Garcia, ang Malabang, Lanao del Sur ay tiyak nang mailalagay sa Comelec control.

Mismong siya ay hihikayatin aniya ang kanyang mga kasamahan para suportahan ang pagsasailalim nito sa kanilang pamamahala.

Matatandaang noong Agosto 31, nagpaputok ng baril ang ilang lalaki para mapigilan ang paghahain ng Certificate of Candidacy.

Ayon kay Garcia, sumuko na ang dalawa sa nagpaputok ng baril na nakuhanan ng video, habang binigyan na rin ng show cause order ang alkalde ng Malabang para magpaliwanag sa pangyayari.

Ayon sa Comelec chief, pag-aaralan din nilang isailalim sa control ang Albay, 2 lugar sa BARMM at mayroon din sa Northern Luzon.

Sa susunod na linggo posibleng mailabas na ang listahan ng mga lugar na isasailalim sa areas of concern kaugnay ng BSKE.

1.3M nag-file ng COC para sa BSKE

ni BRT @News | September 4, 2023

Mahigit 1.3 milyon ang naghain ng kanilang certificate of candidacy para sa mga posisyon sa ilalim ng Barangay at Sangguniang Kabataan Elections (BSKE) na nakatakda sa huling bahagi ng taong ito.

Batay sa ulat, alas-11:30 ng umaga, Linggo, Setyembre 3, umabot sa 1,316,265 na mga aspirante ang naghain ng kanilang COC — 92,173 para sa posisyon sa punong barangay, 690,531 para sa sangguniang barangay member, 85,816 para sa SK chairperson, at 447,745 sa SK members.

Sa kabuoan, 65.43% ng mga aplikante ay lalaki, habang ang natitirang 34.57% ay babae.

Ang mga kandidato ay maglalaban para sa kabuuang 672,016 na puwesto — 42,001 punong barangay, 294,007 sangguniang barangay, 42,001 SK chairpersons, at 294,007 SK members.

Samantala, mayroong 2,085,142 na nagparehistro na mga botante para sa BSKE noong Enero 28, 2023, kabilang ang 2.076 milyon na dumaan sa regular na proseso, habang 8,651 ang naproseso sa pamamagitan ng Registration Anywhere Project.

Kahit walang 'vote for' — Comelec.. Campaign poster, post online, bawal

ni Madel Moratillo @News | August 29, 2023

Pinaalalahanan ni Commission on Election (Comelec) Chairman George Garcia ang mga maghahain ng certificate of candidacy (COC) para sa Barangay and Sangguniang Kabataan Elections na hindi pa maaaring mangampanya.

“Basta lahat po ng mag-file ng certificate of candidacy simula bukas hanggang September 2, kayo po ay considered nang kandidato. Bawal ang premature campaigning. Lahat ng mga materials na mayroon kayo, kailangang tanggalin. Bawal maglagay ng kahit anong materials, kahit walang nakalagay na 'vote for'. Kinakailangan na nasa social media post, kailangan tanggalin lahat,” ani Garcia sa isang panayam.

Dagdag pa ni Garcia, lahat ng magsusumite ng COC ay maaari nang masampahan ng reklamong premature campaigning at disqualification.

“Kaya po kayo ay kandidato na, puwede po kayong ma-file-an ng kasong kriminal na premature campaigning at disqualification kung kayo ay mangangampanya na pagkatapos mag-file ng certificate of candidacy,” ani Garcia.

Nagsimula nang tumanggap ng COC ang Comelec kahapon, Agosto 28 na tatagal hanggang Setyembre 2.

Magsisimula naman ang campaign period sa Oktubre 19 hanggang 28.