95% nuisance candidates – Comelec... Pinal na listahan ng mga kandidato sa Disyembre pa

ni Lolet Abania | October 17, 2021

Ipinahayag ng Commission on Elections (Comelec) na kanilang ilalathala ang pinal na listahan ng mga kandidato para sa 2022 elections sa Disyembre upang alisin ang mga nuisance candidates mula sa kasalukuyang listahan nito.

Sa isang interview kay Comelec spokesman James Jimenez ngayong Linggo, inaasahan na nila na maaalis ang tinatayang 95% nuisance candidates sa listahan.

“Ine-expect natin ang final list around December. ‘Yun ang final. Ang pagsasala magagaganap ngayon,” ani Jimenez.

“Napakarami. Again, sa pagka-Presidente mayroong 97. Madami kang sasalain. Sa VP, 28. Medyo maraming trabaho,” dagdag ng opisyal nang tanungin hinggil sa bilang ng mga nuisance candidates.

“Unang tingin pa lang alam mong makakatanggal ka ng mga 95% na mag-file. Siguro matitira sa atin hindi lalampas ng sampu,” diin ni Jimenez.

Ang paghahain ng certificate of candidacy para sa national at local posts ay nagtapos noong Oktubre 8, subalit ang substitution para sa isang kandidato sa national o local post ay maaaring ihain mula sa pagtatapos ng COC filing hanggang Nobyembre 15, 2021.

Samantala, sinabi ni Jimenez na wala nang isasagawa pang extension matapos ang deadline ng voter registration nito para sa susunod na eleksyon.

Matatandaang itinakda ng Comelec ang deadline para sa voter registration noong Setyembre 30, subalit na-extend ito mula Oktubre 11 hanggang 30, 2021 para pagbigyan ang marami pang botante na makapagrehistro sa gitna ng pandemic restrictions.

Gayundin, dinagdagan ng poll body ang oras ng registration tuwing weekdays at Sabado sa National Capital Region at iba pang piling lugar.

Alamin: Senatorial lineup ni presidential candidate Leody De Guzman

ni Jasmin Joy Evangelista | October 17, 2021

Nag-anunsiyo na ang labor leader at presidential aspirant na si Leody de Guzman ng kaniyang senatorial lineup.

“Maraming nagtanong mula kahapon kung sino ang aking mga senador sa 2022. Narito ang aking personal na mungkahi. Wala silang obligasyong dalhin ang aking kandidatura. Hindi ito transactional politics. Nagtitiwala ako sa kanilang hangarin para sa bayan,” ani de Guzman.

Sa kanyang Facebook post, inihayag niya ang kanyang Senate bets:

“Ang aking mga kapartido:

• Luke Espiritu, labor leader

• Roy Cabonegro, environmentalist

• David D’angelo, environmentalist

Di ko man kapartido ay lubos kong pinagkakatiwalaan:

• Chel Diokno, human rights lawyer

• Risa Hontiveros, senator/feminist

• Neri Colmenares, activist lawyer

• Bong Labog, trade unionist

• Sonny Matula, labor lawyer

• Leila de Lima, senator”

“Hindi na pwedeng magpatuloy ang ganitong kalagayan. Kailangang baguhin ang mga batas at patakaran na nagliligalisa sa pagkakamal ng yaman ng iilan, at pagpapahirap sa mga manggagawa at masa ng sambayanan,” giit niya noong nag-file ng kanyang COC sa pagkapangulo.

May Sabado sa NCR, iba pang lugar... Oras ng voter registration, extended – Comelec

ni Lolet Abania | October 16, 2021

Pinalawig ng Commission on Elections (Comelec) ang oras ng voter registration ng hanggang alas-7:00 ng gabi tuwing weekdays at nagdagdag din ng Sabadong iskedyul sa National Capital Region (NCR) at iba pang piling lugar.

Gayunman, ang voter registration tuwing Sabado ay hanggang alas-5:00 ng hapon lamang. Bukod sa NCR, ang mga lugar kung saan ipatutupad din ito simula Oktubre 16 ay sa mga munisipalidad ng Alcala at San Quintin sa Pangasinan; Tarlac City at mga munisipalidad ng Capas at Concepcion sa Tarlac; lahat ng munisipalidad at lungsod ng Quezon Province; Labo, Camarines Norte; Castilla, Sorsogon; at siyudad ng Cebu, Mandaue at Lapu-Lapu sa Cebu Province.

Samantala, ang mga lugar na mayroon ding registration ng Sabado ng Oktubre 16 at 23, habang ang weekday registration ay mula alas-8:00 ng umaga hanggang alas-5:00 ng hapon lamang ay sa mga munisipalidad ng Anda, Sto. Tomas at Sual sa Pangasinan; mga munisipalidad ng Aringay, Balaoan at Caba sa La Union; lahat ng siyudad at munisipalidad ng Ilocos Sur; at mga munisipalidad ng Balatan, Bula, Cabusao, Goa, Lagonoy, Libmanan, Magarao, Minalabac, Ragay, Sagnay, San Fernando, San Jose, Tigaon at Tinambac sa Camarines Sur.

“The rest of the country will follow the registration days and hours of Mondays to Fridays, 8:00 A.M. to 5:00 P.M. However, registration will be conducted on the last day, October 30, 2021, which is a Saturday,” ayon sa Comelec.

“To reiterate, all types of application will be accepted, not just those that may come from first-time registrants,” ani Comelec spokesperson James Jimenez.

Ayon pa sa Comelec, ang last leg ng voter registration ay isasagawa kung saan kayang i-accommodate ang maraming bilang ng registrants sa piling malls gaya ng Robinsons Malls, Ayala Malls at SM Supermalls. Ang mga gymnasium, ibang commercial establishments at malalaking lugar ay posible ring gawin bilang satellite registration sites.

Ang huling araw ng voter registration ay noong Setyembre 30, subalit in-extend ito ng dalawang linggo, mula Oktubre 11 hanggang 30, 2021.