Duty sa Bgy. at SK elections.. Dagdag-bayad sa titser, aprub

ni Madel Moratillo | March 24, 2023

Inanunsyo ng Commission on Elections (Comelec) ang pagbibigay ng mas mataas na honoraria para sa mga guro na magsisilbi sa Barangay at Sangguniang Kabataan Elections sa Oktubre 30,2023.

Ayon kay Comelec Chairman George Garcia, mula sa dating 4 hanggang 6 na libong piso na honoraria, itataas ito sa 8 hanggang 10 libong piso.

Dahil d’yan, magiging kapareho na ito ng halaga ng honoraria ng mga gurong nagsisilbi sa automated elections.

Ayon kay Garcia, pinag-aaralan din nila kung kayang maibigay nang mas maaga ang kanilang honoraria gaya ng hiling ni Vice Pres. Sara Duterte pero depende ito kung papayagan sila ng Commission on Audit.

Sakali namang matuloy ang paghahalal ng delegado para sa constitutional convention, tatanggap pa sila ng dagdag na 2 libong piso na allowance.

Inanunsyo rin ni Garcia na ang mga susunod na BSKE ay gagawin na nilang automated.

Sa ngayon, pinag-aaralan pa nila kung anong makina ang maaaring gamitin sa susunod

na halalan.

Ayon kay Garcia, malaking tulong ito para mapababa ang mga insidente ng karahasan tuwing Barangay elections.

Inihalimbawa niya noong May 2019 automated elections na nasa 23 lang ang naitalang election related violence dahil mabilis lumabas ang resulta ng halalan.

Halalan 2022, 'pinakamapayapa' sa kasaysayan ng Sulu

ni Zel Fernandez | May 12, 2022

Naitala umano nitong Mayo 9, 2022 National and Local Elections ang pinakamapayapang halalan sa buong kasaysayan ng lalawigan ng Sulu.

"We are happy and proud to say that the election in Sulu is successful, with zero election-related violent incidents. In all areas we were deployed, the election went on smoothly as scheduled and planned. The presence of the security forces provided confidence to our people to vote and prevented those who have planned to conduct atrocities. This is remarkably the most peaceful election in the history of Sulu," pahayag ni Joint Task Force (JTF) Sulu ar 11th Infantry “Alakdan” Division Commander, Maj. Gen. Ignatius Patrimonio.

Ani Maj. Gen. Patrimonio, zero election-related incident ang naitala sa Sulu nitong nagdaang halalan at naging “smooth” at “on schedule” ang sitwasyon sa lahat ng panig ng lalawigan sa tulong ng mga naka-deploy na tropa ng militar.

Dagdag pa ng heneral, "Malaki na ang ‘pinagbago ng security landscape ng Sulu. Although, there were three (3) minor incidents, our troops and police counterparts were able to respond immediately and stabilize the situation in those areas. Mga minor na alitan lang at suntukan ang nangyari. So, generally, the election in Sulu is very peaceful and orderly."

Maliban aniya sa tatlong maliit na insidente ng suntukan na agad ding nirespondehan at naresolba ng militar at pulis, nanatili umanong kalmado ang kalagayan sa mga lugar na ito.

Tinatayang aabot umano sa kabuuang 2,976 na sundalo kabilang ang 168 officers, at 125 reserve troops ang idineploy ng JTF Sulu upang mag-election duty sa lalawigan nitong Mayo 9.

"Let us continue to work together and march in unison towards our collective vision of bringing lasting peace and stability in the province of Sulu," saad pa ni Patrimonio.

Samantala, pinasalamatan din ni Patrimonio ang lahat ng mga tauhan ng JTF Sulu at mga partner stakeholders sa pagsusumikap makamit ang mapayapa at matagumpay na eleksiyon sa Sulu ngayong taon.

9 sa 10 presidential bets nagkumpirma na ng pagdalo sa Comelec debates — Jimenez

ni Jasmin Joy Evangelista | March 14, 2022

Siyam sa sampung presidential candidates ang nagkumpirma na dadalo sila sa Commission on Elections' PiliPinas Debates na gaganapin ngayong buwan at sa Abril, ayon sa Comelec.

Sa isang tweet, sinabi ni Comelec spokesperson James Jimenez na as of 6:30 p.m. nitong Linggo, March 13, ang mga sumusunod na kandidato ay kumasa na sa inorganisa nilang debate:

* Former Foreign Affairs undersecretary Ernesto Abella

* Labor leader Leody De Guzman

* Manila Mayor Isko Moreno Domagoso

* Senator Panfilo Lacson

* Former Defense secretary Norberto Gonzales

* Businessman Faisal Mangondato

* Physician Jose Montemayor, Jr.

* Senator Manny Pacquiao

* Vice President Leni Robredo

Si dating senador Ferdinand ‘Bongbong’ Marcos ay hindi pa nagkukumpirma ng pagdalo, ayon sa Comelec.

Noong March 8, sinabi ng spokesperson ni Marcos na si Vic Rodriguez na ipa-finalize nila noong linggong iyon kung dadalo si BBM sa debate.

Sa isang hiwalay na tweet, sinabi ni Jimenez na pitong vice presidential candidate ang nagkumpirma na dadalo sa debate:

* Professor Walden Bello

* Rizalito David

* Manny Lopez

* Dr. Willie Ong

* Senator Francis Pangilinan

* Carlos Serapio

* Senate President Vicente Sotto III

Ang running mate ni Pacquiao na si Buhay party-list Representative Lito Atienza ay pormal na nag-decline sa imbitasyon dahil sa medical reasons.

Ang vice presidential bet naman na si Davao City Mayor Sara Duterte ay hindi rin nagkumpirma ng kanyang pagdalo. Gayunman, nauna nang sinabi ni Duterte na hindi siya dadalo sa anumang debate para sa eleksiyon 2022.

Nakatakdang ganapin ang presidential debates sa March 19 at April 3. Sa March 20 naman ang para sa mga VP bets. Mayroon ding townhall events para sa presidential at vice presidential bets na gaganapin naman sa April 23 at 24. Lahat ng event ay maaaring panoorin online o sa TV, o pakinggan sa radyo.