756,083 poll workers, magsisilbi sa Election Day – DepEd

ni Lolet Abania | May 6, 2022

May kabuuang 756,083 poll workers ang itatalaga para magsilbi at mag-monitor hinggil sa nalalapit na May 9 elections, ayon sa Department of Education (DepEd) ngayong Biyernes.

Sa isang press conference, sinabi ni DepEd Undersecretary Alain Pascua na tinatayang 90% ng 647,812 ng kabuuang bilang ng mga poll workers ay kawani o personnel mula sa DepEd.

“The total poll workers that will be mobilized and deputized by the Comelec (Commission on Elections) is about 756,083 poll workers. And among that, the DepEd poll workers will account to about 90% — 647,812,” ani Pascua.

Ayon kay Pascua, sa DepEd personnel, nasa 319,317 ang electoral boards (EB); 200,627 EB support staff; 38,989 DepEd supervisor officials; (DESO); 87,162 DESO support staff; at 1,717 board of canvassers.

Sinabi rin ni Pascua na ang mga poll workers ay deputized ng Comelec.

Binanggit naman ni Pascua na bumuo ang DepEd ng isang hiwalay na grupo, ang DepEd Election Task Force, kung saan nakatuon ito sa mga concerns ng mga guro at paaralan sa gitna ng eleksyon. Ayon sa opisyal, ang nasabing task force ay hindi pinakikilos ng Comelec kundi ng DepEd.

Aniya pa, ang DepEd Election Task Force ay mayroong limang grupo sa bawat rehiyon at division. Ang operasyon ng mga ito ay magsisimula sa Mayo 8 hanggang 10.

Samantala, binigyang-diin ng Comelec na tanging mga trained teachers lamang ang hahawak ng vote counting machines (VCMs) sa araw ng eleksyon, matapos na lumabas ang mga reports kaugnay sa ilang personnel sa Cotabato City na pinalitan ng mga hindi sinanay na mga guro.

Ayon kay Comelec Commissioner George Garcia, nakikipag-ugnayan na sila sa mga awtoridad sa lugar at tinututukan ang naging problema.

Ipinunto naman ni Garcia na ang mga VCM handlers ay dapat na mayroong certification mula sa Department of Science and Technology (DOST).

“Paninindigan ng Comelec kung ano ang nakalagay sa ating guidelines na dapat ay makakapaglingkod lamang na mga miyembro ng electoral boards ay yung mga na-train namin sa napakahabang araw,” ani Garcia sa isang televised briefing.

May banta man sa buhay… Vargas, handa na sa Kongreso

ni Jeff Tumbado | May 6, 2022

Sa kabila ng tinanggap nang mga pagbabanta sa buhay, hindi aatrasan ni Quezon City Councilor PM Vargas ang hamon na maging bahagi ng Kongreso at tiwala ito sa mga naging karanasan mula sa kasalukuyang posisyon para higit na makapaglingkod.

Sinabi ni Vargas na itutulak nito sa Kongreso ang pagpapalakas ng mga lokal na pamahalaan upang higit na matugunan ang mga pangangailangan ng mga mamamayan.

Magsusulong din aniya siya ng mga batas na magpapataas ng suweldo ng mga health worker at pagtaas ng antas at lakas ng serbisyo ng mga pampublikong ospital.

“Kailangan tayo magfocus sa pandemic recovery at mabigyan ng kaukulang armas ang ating mga frontliners upang makaahon tayo nang sabay-sabay. Importante sa akin ang pandemic preparedness, health services, job generation and social services,” ani Vargas.

Nagsilbi rin si PM Vargas bilang Chief of Staff ng kanyang nakatatandang kapatid na si Rep. Alfred Vargas na patapos na ang ikatlong termino kaya't batid na ng konsehal ang mga regulasyon ukol sa paglikha at pagpasa ng mga batas.

Sa napipintong pagpasok sa Kongreso, handa si Vargas na makilahok sa mga talakayan ng komite sa Kapulungan upang mapabilis ang proseso ng pagsasabatas ng mga mahahalagang panukala.

"Ang importante ay may synergy at pagkakaisang-isip at puso para sa kapakanan ng mamayan. Given a chance to lead a committee, I will make sure that the legislation will always be pro people," ani Vargas.

Sa pamamagitan ni PM Vargas, naipamahagi ang aabot sa 272,388 na family packs bilang COVID-19 relief, gayundin ang mahigit 400,000 na feeding beneficiaries sa Distrito 5. Mayroon ding 21,335 ang natulungan sa livelihood programs, 18,124 ang natulungan sa pang-medical na pangangailangan at nalagyan ng libreng WiFi ang 14 barangay halls noong panahon ng pandemya.

Si Vargas ang kasalukuyang nangunguna sa labanan sa District 5 ng Quezon City at nakatanggap ng pag-endorso mula sa lahat ng sektor sa distrito, kasama na ang importanteng basbas ng Iglesia ni Cristo. Mga kalaban niya sa posisyon sina dating Congresswoman Annie Susano, Cathy Inday Esplana at Rose Nono Lin ng Pharmally na humaharap sa mga kaso sa Comelec.

Kumpiyansa si Vargas sa suportang ipinakita ni Mayor Joy Belmonte, Vice Mayor Gian Sotto at ng iba pang kasamang konsehal.

"Pero, ang pasasalamat ngayon pa lang ay para sa mga ka-distrito na siya namang nagpapakita ng patuloy at maigting na suporta" dagdag pa ng konsehal.

106K polling precincts, babantayan ng PPCRV sa Election Day

ni Lolet Abania | May 6, 2022

Nakatakdang magbantay sa mahigit 106,000 polling precincts ang grupong Parish Pastoral Council for Responsible Voting (PPCRV) kaugnay sa nalalapit na May 9 elections.

Sa isang interview ngayong Biyernes, sinabi ni PPCRV Chairperson Myla Villanueva na ang kanilang mga volunteers ay mag-a-assist sa mga botante na nasa mga polling centers sa araw ng eleksyon, habang itsi-check din nila ang mga election returns para tiyakin ang accuracy ng mga bilang ng boto.

“Alam niyo napakadaming presinto ngayong Lunes, 106,000 precincts po ang babantayan ng PPCRV. Kami po ay accredited citizen’s arm ng Comelec (Commission on Elections), nagtatrabaho po tayo para sa taumbayan,” ani Villanueva.

Bilang accredited citizen’s arm ng Comelec, matatanggap ng PPCRV ang ikaapat na kopya ng election returns. Susuriin naman ng PPCRV kung ang kopya ay magkatugma ang data sa electronic election return.

Ayon kay Villanueva, noong 2019 midterm elections, ang PPCRV ay nakapag-record ng 99.995% ng matching rate sa pagitan ng physical election returns at ng electronically transmitted copies.

Hinimok naman ni Villanueva ang publiko para sa May 9 elections, na mag-sign up bilang volunteers na poll watchdog o kaya naman ay mag-donate ng pagkain, tubig, mga masasakyan, at iba pang resources na maaari nilang boluntaryong maibigay.

Para sa mga interesadong maging PPCRV volunteers ay maaaring magtungo sa parokya o parish na malapit sa kanila o alamin ang iba pang detalye sa ppcrv.org or ivolunteer.com.ph.