Tatakbo sa BSKE na 'nagpaparamdam' na, 6 yrs. kulong — COMELEC

ni BRT @News | August 23, 2023

Binalaan ng Commission on Elections (Comelec) ang mga kakandidato sa 2023 Barangay and Sangguniang Kabataan Elections (BSKE) na iwasang masangkot sa maagang pangangampanya.

Ayon kay Comelec Chairman George Garcia, maaari lamang mangampanya ang mga kandidato sa official campaign period para sa halalan na itinakda sa Oktubre 19-28.

Paliwanag ni Garcia, ang premature campaigning ay may katumbas na kulong na isa hanggang anim na taon at diskwalipikasyon.

“Bawal umikot. ‘Yung pamimigay ng ayuda na wala namang ayudang dapat ipamigay at

hindi naman regular na ginagawa ay pangangampanya na ‘yan,” aniya pa sa isang panayam,

Batay sa calendar of activities na inilabas ng Comelec, magsisimula ang election period sa Agosto 28.

Ang botohan naman ay nakatakda sa Oktubre 30.

Mananalo sa Barangay at SK Elections, 2 yrs. lang sa puwesto

ni Madel Moratillo | June 29, 2023

Dalawang taon lamang magsisilbi ang mga mananalo sa gaganaping Barangay at Sangguniang Kabataan Elections sa Oktubre.

Salig na rin ito sa nakasaad sa desisyon ng Korte Suprema na nagdedeklarang unconstitutional ang Republic Act 11935 na nagpaliban sa halalan noong December 5, 2022. Matatandaan na ang pagpapaliban ng halalan ay para makatipid ang gobyerno sa

gitna na rin ng pandemya.

Ayon sa SC, para maiwasan ang kalituhan, ang susunod na BSKE ay gagawin sa unang Lunes ng December 2025 at kada 3 taon pagkatapos nito.

Ayon kay Commission on Elections Chairman George Garcia, dahil dito mas maiksi ang magiging termino ng mga mananalo sa 2023 BSKE.

Tiniyak naman ng opisyal na walang epekto ang SC decision sa gagawing halalan sa Oktubre.

Nasa 95% na aniya silang handa para sa BSKE. Itinakda ang paghahain ng kandidatura para rito sa Agosto 28 hanggang Setyembre 2.

Hirit sa Comelec.. Smartmatic, out sa 2025 Elections

ni Madel Moratillo | June 18, 2023

Nais ng ilang dating opisyal ng gobyerno at eksperto pagdating sa information technology na madiskwalipika ang Smartmatic sa gagawing bidding para sa bagong makina na gagamitin sa 2025 midterm polls.

Kabilang sa mga petitioner sina dating Department of Information and Communications Technology Undersecretary at dating Commissioner ng National Telecommunications Office na si retired Brigadier General Eliseo Rio, Jr., dating Comelec Commissioner at NAMFREL President Augusto Lagman; Franklin Isaac, isang software app developer at dating presidente ng Financial Executives Institute of the Philippines at dating AFP Colonel Leonardo Odoño.

Nag-ugat ang petisyon sa natuklasang seryoso umanong iregularidad sa ginanap na automated election system noong May 2022 kung saan ang ginamit ay makina ng Smartmatic.

Sa kanilang petisyon, sinabi nila na may mga nakitang discrepancies o pagkakaiba sa mga transmission logs at reception logs ng election returns mula sa mga presinto na tinanggap ng transparency server ng poll body.

0Hindi rin umano nagtutugma ang transmission at reception logs ng transparency server.

Nais nilang repasuhin ng poll body ang kwalipikasyon ng Smartmatic at kung mabibigo ang kumpanya na ipaliwanag nang maayos ang mga nakitang isyu ay idiskwalipika ito sa bidding.