Mga posibleng aberya sa halalan, paghandaan na

by Info @Editorial | May 9, 2025

Umaasa ang taumbayan sa isang malinis, tapat, at maayos na proseso ng pagboto. Gayunman, kasaysayan na mismo ang nagsasabing hindi nawawala ang mga aberya tuwing araw ng halalan — mula sa mga sirang vote counting machines (VCMs), kakulangan ng mga tauhan ng Commission on Elections, teknikal na problema, hanggang sa mga isyung may kaugnayan sa seguridad.

‘Ika nga, hindi puwedeng iasa sa swerte ang kaayusan ng eleksyon. Kailangan ito ng paghahanda at agarang pagtugon sa mga kahina-hinalang senyales ng kapalpakan. 

Sa panig ng Comelec, kailangang tiyakin na maagang nasusuri ang mga gamit — lalo na ang mga makina at transmission equipment. Dapat ding malinaw ang mga contingency plan sakaling magkaroon ng teknikal na problema sa araw ng eleksyon.

Kasabay nito, kailangang mapalakas ang kampanya para sa mapayapang halalan. Dapat tiyakin ang seguridad sa mga presinto, at mahigpit na ipatupad ang mga batas laban sa pananakot, pamimili ng boto, at iba pang anyo ng pandaraya.

Mahalaga rin ang papel ng mamamayan. Hindi sapat ang bumoto lamang — kailangan ding maging mapagmatyag at handang iulat ang anumang iregularidad. 

Sa panahon ng teknolohiya, napakadali nang gamitin ang social media para ilantad ang mga kahina-hinalang pangyayari, ngunit dapat pa ring tiyakin na tama at beripikado ang mga impormasyong ipinopost. Mas mainam kung sa mga otoridad magsusumbong para maaksyunan.

Ang halalan ay hindi lamang isang araw na kaganapan. Ito’y bunga ng mahabang proseso ng paghahanda. 

Ngayon pa lamang, kailangang paghandaan na ang lahat ng posibleng aberya. Dahil sa huli, ang tiwala ng bayan sa halalan ay tiwala rin sa demokrasya ng bansa.

Bumoto para sa tunay na pagbabago

by Info @Editorial | May 8, 2025

Sa pagdedeklara ng eleksyon bilang holiday, muling ipinapaalala sa atin ang kahalagahan ng pagboto — isang sagradong karapatan at tungkulin ng bawat mamamayan. Hindi ito basta araw ng pahinga, kundi isang pagkakataon upang maipahayag ang tinig ng taumbayan at makibahagi sa direksyong tatahakin ng bayan.

Ang pagdedeklara ng holiday tuwing halalan ay hindi simpleng administratibong desisyon. Isa itong hakbang upang alisin ang hadlang sa partisipasyon ng mga manggagawa at estudyante na maaaring hindi makalabas para bumoto dahil sa obligasyon sa trabaho o eskwelahan. 

Sa kabila nito, nananatiling hamon ang mababang turnout ng mga botante.Kaya’t ngayong idineklara na ang araw ng eleksyon bilang holiday, wala nang dahilan upang hindi bumoto. 

Hindi sapat ang pagrereklamo sa social media o ang pagdedebate. Ang tunay na pagbabago ay nagsisimula sa balota — sa responsableng pagpili ng mga pinuno na may integridad, kakayahan, at malasakit sa bayan.

Sana’y gamitin natin ang halalan bilang araw ng pananagutan at pagkilos. Bawat boto ay boses; bawat boses ay may kapangyarihang magtakda ng kinabukasan.

Sa Mayo 12, bumoto — dahil ang demokrasya ay buhay lamang kung tayo ay nakikilahok.

Bawas-oras sa pamamasada, pag-aralang mabuti

by Info @Editorial | May 7, 2025

Matapos ang magkakasunod na vehicular accident na ikinasawi at ikinasugat ng ilang katao, pinag-aaralan ng gobyerno ang rekomendasyong bawasan ang oras ng pamamasada ng mga driver ng public utility bus.

Una nang ipinag-utos na gumawa ng hakbang upang matiyak ang kaligtasan ng mga pasahero habang nasa biyahe. Kaugnay nito inirerekomendang ibaba sa apat na oras, mula sa anim na oras, ang haba ng pamamasada ng mga bus driver.

Maaari kasi umanong makaapekto sa kapasidad sa pagmamaneho ng mga drayber kung lagpas sa itinakdang oras ang tagal ng kanilang pamamasada.

Para naman sa atin, kailangang pag-aralan munang mabuti ang hirit dahil maaari nitong maapektuhan ang kabuhayan ng mga tatamaang bus drivers. Dapat ding isaalang-alang ang economic impact nito sa lahat ng drayber.

Sa likod ng bawat biyahe, malaking papel ang ginagampanan ng mga tsuper na inaasahang maihahatid nang ligtas ang bawat pasahero sa kanilang patutunguhan. Kaya naman, napakahalaga ng responsableng pagmamaneho — isang tungkuling hindi lang basta trabaho kundi isang moral na pananagutan.

Ang responsableng pagmamaneho ay hindi dapat ituring na opsyon kundi isang obligasyon. Kasama rito ang pagsunod sa batas-trapiko, pagiging alerto sa kalsada, at pagkakaroon ng disiplina at malasakit sa kapwa. 

Dapat ding isama sa usapin ang pangangalaga sa kalagayan ng sasakyan upang maiwasan ang aberya o aksidente.

Higit sa lahat, kailangang paigtingin ng pamahalaan ang edukasyon at regulasyon sa sektor ng pampasaherong transportasyon. Kailangang tiyaking lisensyado at dumaan sa tamang pagsasanay ang mga tsuper, at may regular na pagsusuri sa kanilang kalusugan at kakayahan.