Mas maayos na koneksyon sa internet, dapat tutukan

by Info @Editorial | June 7, 2025

Sa panahon ng makabagong teknolohiya, hindi na limitado sa mga personal na interaksyon ang panlalait sa anyo at katawan ng isang tao. 

Sa social media, isang post lang ang kailangan upang mambastos, manira ng imahe, at makapanakit ng damdamin. 

Isa sa pinakatalamak na anyo ng online harassment ngayon ay ang body shaming — ang panlalait sa pisikal na anyo ng isang tao, tulad ng pagiging mataba, payat, maitim, may peklat, o kahit sa simpleng pagkakaiba sa ‘pamantayan’ ng kagandahan o kakisigan.Nakababahala na tila normal na lang ito sa online spaces. 

Marami ang nagtatago sa likod ng anonymous accounts at malayang bumabato ng masasakit na salita, hindi iniisip ang epekto nito sa mental health ng kanilang binibiktima. 

Ang masaklap, maraming biktima ang napipilitang manahimik, magdusa sa depresyon, mawalan ng kumpiyansa sa sarili — at sa ilang malulungkot na kaso, umaabot pa sa pagpapakamatay.Hindi sapat ang simpleng pangaral o paalala. 

Panahon na para papanagutin ang mga body shamers. Dapat kilalanin ng batas ang online body shaming bilang isang uri ng cyberbullying na may karampatang parusa. 

Kailangan ng konkretong hakbang — mula sa gobyerno, social media platforms, at edukasyon. 

Ang online body shaming ay hindi dapat palagpasin — dapat itong aksyunan.

Dagdag-sahod, nabuhay na naman

by Info @Editorial | June 6, 2025

Inaprubahan na ng Kamara ang panukalang P200 dagdag-sahod para sa mga manggagawa sa pribadong sektor. 

Sa unang tingin, tila magandang balita ito — isang hakbang tungo sa pagkilala sa sakripisyo ng manggagawang Pilipino. Ngunit sa likod nito ay ang paulit-ulit na pagkabigo, pagkaantala, at pangakong napapako.Sa harap ng tumataas na presyo ng bilihin, serbisyo, at iba pang pangangailangan, matagal nang hindi sapat ang kasalukuyang minimum wage. 

Marami ang nabubuhay sa sahod na malayo sa dapat ay sapat para sa isang pamilya upang mabuhay nang disente. 

Gayunman, imbes na konkretong solusyon, paasa at panandaliang pampalubag-loob ang natatanggap ng mga manggagawa.

Hindi na bago ang ganitong panukala na sa huli ay nauuwi sa wala — tinatabla ng mga makapangyarihan, kinukuwestiyon ng mga negosyante, at tinatabunan ng pulitika. 

Kung ito’y hindi kayang maipatupad, maging tapat. Huwag paasahin ang mga manggagawa na araw-araw na bumabangon upang itaguyod ang ating ekonomiya.

Panahon na upang ang kapakanan ng manggagawa ay hindi lamang ginagamit bilang plataporma o pakitang-tao. Dapat itong unahin, isabatas, at ipatupad nang may tunay na intensyong itaas ang antas ng kanilang pamumuhay.

Libreng serbisyong medikal, matupad sana

by Info @Editorial | June 5, 2025

Isinasaalang-alang ngayon ng Department of Health (DOH) ang isang panukala na maaaring magbago sa mukha ng serbisyong pangkalusugan sa Pilipinas. 

Ito ay ang pagbibigay ng libreng medical services sa lahat ng pampublikong ospital.

Masasabing ito’y ambisyosong hakbang, ngunit kung maisasakatuparan, maaari itong magsilbing pundasyon ng mas makataong sistemang pangkalusugan.

Ito ay magbibigay ng ginhawa, lalo na sa mga maralita. 

Mas mapapalapit din nito ang medikal na serbisyo sa malalayong komunidad.Ang tanong, may pondo ba para maisakatuparan ito? 

May sapat bang health workers at kagamitan upang matugunan ang posibleng pagdagsa ng mga pasyente? 

Dito papasok ang mahalagang papel ng gobyerno sa pagbibigay ng mas malaking badyet para sa kalusugan. Kailangang tiyakin ang tamang kompensasyon sa mga health workers, at masusing pagbabantay upang maiwasan ang katiwalian sa sistema.

Makabubuting makipag-ugnayan sa mga LGU, pribadong sektor, at mga eksperto upang bumuo ng isang sistemang epektibo at sustainable.