Bentahan ng baby online, talamak

by Info @Editorial | July 19, 2025

Habang abala ang mga pulitiko sa pagpapasikat at pagbabangayan sa social media, isang mas malalim na problema ang tila nababalewala — ang patuloy at talamak na bentahan ng sanggol sa internet.Hindi ito bagong balita. Ilang beses nang nailathala ang mga kasong may mga sanggol na ibinebenta sa Facebook groups, buy-and-sell pages, at kahit sa mga pribadong chat groups. 

May ilan pa ngang may resibo, parang ordinaryong transaksyon lang. Habang sinasabi ng pamahalaan na nakabantay sila, patuloy naman ang pagkalat ng mga post ng mga batang ibinebenta online. 

Tila walang matibay na mekanismo para bantayan ang cyberspace laban sa child trafficking. 

Walang sapat na suporta para sa mga ina na gustong iligtas ang anak sa kahirapan. At higit sa lahat, parang walang malinaw at matatag na direksyon para tapusin ang ganitong uri ng krimen.Hindi sapat ang pahayag na iimbestigahan, ang kailangan ay konkretong polisiya at aksyon.

Mas mabilis na rescue and response system, at mabigat na parusa sa mga sangkot — kasama na ang mga opisyal na nagpabaya.

Pamumulitika, out sa medical assistance

by Info @Editorial | July 18, 2025

Isang mambabatas ang nagsusulong na alisin ang umano’y pamumulitika sa Medical Assistance to Indigent and Financially Incapacitated Patients (MAIFIP) program ng Department of Health (DOH) sa pamamagitan ng pagsasailalim nito sa Universal Health Care Act – at pagpataw ng parusa sa pamumulitika.

Dapat lang naman na ang tulong-medikal ay manggaling direkta sa gobyerno sa paraang malinaw, pantay, at walang kinikilingan — hindi na kailangang dumaan pa sa opisina ng mga pulitiko. Sa ganitong paraan, nabibigyang-diin na ang tulong ay karapatan ng mamamayan, hindi isang pabor at ‘di rin limos.

Kapag naalis ang kulay ng pulitika sa pagbibigay ng serbisyong medikal, mas mapapalakas ang tiwala ng taumbayan sa gobyerno.

Ang kalusugan ay isang karapatang pantao, hindi premyong ibinibigay kapalit ng suporta o boto. Ang medical assistance ay dapat ihiwalay sa pulitika. 

Tungkulin ng estado at ng mga halal na opisyal na tiyaking ang bawat Pilipino, anumang kulay ng pananaw o paniniwala ay may pantay na access sa serbisyong medikal.

Panahon na upang baguhin ang mga patakaran sa pagbibigay ng tulong-medikal, at ilayo ito sa kamay ng mga naghahanap ng kapangyarihan. 

Bisyo at karahasan, ‘wag hayaang maging normal sa kabataan

by Info @Editorial | July 17, 2025

Kamakailan, isang insidente ng inuman at pambubugbog ang muling kinasangkutan ng ilang estudyante. 

Madalas, ang kasiyahan, nauuwi sa kaguluhan, pananakit, at kahihiyan — hindi lang para sa mga sangkot, kundi maging sa mga institusyong dapat gumagabay sa kanila.Hindi na ito simpleng “kabataan lang ‘yan” na palusot. 

May malinaw na mga tanong na kailangang sagutin: Bakit may access sa alak ang mga menor-de-edad? Nasaan ang mga magulang o guardians habang nagaganap ito? At ano ang ginagawa ng eskwelahan at ng lokal na pamahalaan upang maiwasan ang mga ganitong pangyayari?

Sa maraming pagkakataon, tila pinapasan ng mga estudyante ang sisi, habang ang mga nakatatanda sa paligid nila ay nananatiling tahimik, o kaya’y umiiwas sa responsibilidad. May kakulangan sa pangangalaga, disiplina, at sa malinaw na pagpapatupad ng batas.

Hindi sapat ang pag-post ng paalala sa social media matapos ang insidente. Hindi rin sapat ang internal investigation na walang malinaw na resulta. Kung may pananagutan, dapat managot. Kung may kahinaan sa sistema, dapat tugunan.

Hindi natin nais ipako sa krus ang mga kabataan. Ang gusto natin ay magkaroon sila ng ligtas na kapaligiran — na hindi nagiging normal ang bisyo, away, at pananakit.