LGUs, kayod pa more vs. basura

by Info @Editorial | July 31, 2025

Sa harap ng patuloy na lumalalang problema sa basura, isang malinaw na katotohanan ang dapat harapin ng mga lokal na pamahalaan, hindi sapat ang mga hakbang sa waste management.

Sa bawat tambak ng basura sa lansangan, kanal, at karagatan, ay repleksyon ng pagkukulang sa implementasyon, edukasyon, at disiplina.

Bagaman may umiiral na batas, maraming LGU ang hindi pa rin ganap na sumusunod dito. Kakulangan sa maayos na segregation, hindi sapat na pasilidad para sa composting at recycling, at limitadong impormasyon sa publiko ang ilan sa mga ugat ng problema.

Ang mga LGU ang nasa unang hanay ng serbisyo-publiko. Sila ang mas may kakayahang magpatupad ng mga programang akma sa lokal na kalagayan — mula sa pagkakaroon ng material recovery facilities, hanggang sa pagtatalaga ng community-based monitoring ng tamang pagtatapon ng basura.

Higit pa rito, kailangang maging aktibo ang mga barangay sa kampanya laban sa maling pagtatapon ng basura. Dapat itong samahan ng mas mahigpit na pagpapatupad ng batas at nararapat na parusa sa mga lalabag. 

Ang kalinisan at kaayusan ng isang komunidad ay hindi lamang isyu ng estetika — ito ay usapin ng kalusugan, kalikasan, at kinabukasan.

Matupad sana ang mga pangako sa SONA

by Info @Editorial | July 30, 2025

Sa ikaapat na State of the Nation Address (SONA) ni Pangulong Ferdinand Marcos, Jr., muling umasa ang sambayanang Pilipino. 

Mula sa edukasyon at kalusugan, hanggang sa agrikultura, enerhiya, at kapayapaan — puno ng magagandang layunin at pangako ang kanyang talumpati. 

Ang tanong ng taumbayan: Kailan ito maisasakatuparan?Isa sa mga sentrong punto ng SONA ay ang pagtutok sa edukasyon. Dagdag-guro, scholarships, libreng laptops at internet access.Pinalakpakan din ang pahayag na wala nang babayaran sa mga pampublikong ospital. Napakalaking bagay sana nito lalo’t marami pa rin ang ayaw magpagamot dahil mas takot sa gastusin.

Malaking punto rin ang kanyang pangako na pananagutin ang lahat ng palpak sa serbisyo-publiko at sangkot sa mga anomalya sa proyekto ng gobyerno.Sa lahat ng ito, malinaw na ang SONA 2025 ay puno ng ambisyon. Ngunit ang mga salita ay hindi sapat.

Ang bawat binitiwang pangako ay may kaakibat na pananagutan. 

Hindi ito simpleng listahan ng mga gustong mangyari kundi isang kontrata sa sambayanan.Sana ay hindi lamang ito maging bahagi ng taunang seremonya. 

Sana ay maging simula ng tunay na pagbabago. Dahil ang Pilipino ay marunong umasa — ngunit mas natuto nang maghintay, magtanong, at maningil.

Mga hirit sa SONA, wa’ ‘wenta kung ‘di matutupad

by Info @Editorial | July 29, 2025

Dahil sa mga bagyong nananalasa sa bansa, kasabay na napag-uusapan ang ayuda — ang mga pangakong tulong na dapat ay mabilis, sapat, at direktang nakararating sa mga nasalanta.

Kung pagbabatayan ang pahayag ng mga opisyal ng pamahalaan sa State of the Nation Address (SONA), malinaw ang layunin: walang maiiwan, lalo na sa panahon ng sakuna. 

Ngunit sa realidad, hindi iilang ulat ang nagsasabing may mga lugar pa ring hindi naabot ng tulong, may mga pamilya ang nagsasabing wala silang natanggap, at may ilang lokal na opisyal ang kinukuwestiyon ang distribusyon ng pondo.

Ang ayuda ay hindi dapat maging palabas lamang tuwing may kalamidad. Isa itong patunay ng malasakit ng pamahalaan. Kaya’t nararapat lamang na ito’y bantayan — mula sa alokasyon hanggang sa aktuwal na distribusyon. 

Dapat ay may malinaw na sistema, may transparency, at may pananagutan ang bawat ahensya at opisyal.Kung sinsero ang gobyerno sa layunin nitong “Bagong Pilipinas” gaya ng binanggit sa SONA, dapat maparamdam ito lalo na sa panahong ang tao ay lugmok at nangangailangan. 

Hindi sapat ang mga talumpati; kailangang makitang epektibo ang sistema para sa kapakanan ng taumbayan.