LGUs, dapat handa rin sa balik-eskwela

by Info @Editorial | June 2, 2026

Sa nalalapit na pagbubukas ng klase, magiging abala na naman ang mga lansangan sa pagdagsa ng mga mag-aaral. 

Dahil dito, mahalagang pagtuunan ng pansin hindi lamang ang kahandaan sa mga gamit pang-eskwela kundi higit sa lahat ang kaligtasan at seguridad ng mga estudyante.

Taun-taon, may mga mag-aaral na nalalagay sa panganib dahil sa masasamang-loob, buwis-buhay na kalsada, mga pasaway na motorista, at iba pang suliraning pangkaligtasan sa paligid ng mga paaralan. 

Kaya naman, kinakailangang maging maagap ang mga lokal na pamahalaan, paaralan, at mga otoridad sa pagpapatupad ng mga programang magpoprotekta sa mga kabataan. 

Dapat tiyakin ang presensya ng kapulisan o mga tanod, maayos na daloy ng sasakyan, at ligtas na kapaligiran sa loob at labas ng paaralan.

Mahalaga rin ang papel ng mga magulang sa paggabay sa kanilang mga anak tungkol sa tamang pag-iingat habang bumibiyahe at nasa paaralan. 

Ang disiplina at pagiging mapagmatyag ay makakatulong upang maiwasan ang mga aksidente at iba pang panganib.

Ang edukasyon ay susi sa magandang kinabukasan, ngunit hindi ito magiging ganap kung nalalagay sa alanganin ang kaligtasan ng mga mag-aaral. 

Kaya sa pagbabalik-eskwela, dapat magtulungan ang lahat upang matiyak ang kaligtasan ng lahat. 

Imbestigasyon sa flood control scam, tapusin na

by Info @Editorial | June 1, 2026

Kasabay ng ingay ng impeachment at palit-liderato sa Senado, agad na binalikan ang isa sa pinakamabigat na isyu na ‘di dapat masapawan ng anumang kontrobersiya—ang flood control scandal.

Sa ilalim ni Senate President Alan Peter Cayetano, muling binuksan ang imbestigasyon sa mga maanomalyang flood control project. Bumuo ng isang flood control subcommittee sa pamumuno ni Senador Rodante Marcoleta.

Sa una pa lang, dapat ay malinaw na ang mandato: walang “sacred cows,” walang protektadong interes, at walang exempted sa imbestigasyon. 

Matatandaang sinuspinde noon ni Sen. Panfilo Lacson, dating namumuno sa Blue Ribbon Committee, ang nasabing imbestigasyon. Nakatengga rin ang partial report dahil kulang sa pirma ng mga senador para pormal na maisponsor sa plenaryo. 

Pero ngayong binuhay na ang imbestigasyon, umaasa ang publiko na magiging patas at lalabas na ang buong katotohanan. 

Ang perang nawawala at nasasayang ay pera ng taumbayan. Hindi ito dapat mabahiran ng pamumulitika; sa halip, dapat manaig ang pananagutan. 

Pagod na, asang-asa, at sawang-sawa na ang mga Pilipino sa walang katapusang bangayan at drama sa pulitika. Ang gusto ng ordinaryong mamamayan ay resulta, totoong serbisyo, at mga institusyon ng gobyerno na talagang nagtatrabaho. 

At sa halip na magbanatan, tutukan na lang kung paano gagamitin ng nakararami ang ipinagkatiwalang kapangyarihan. Kung may pang-aabuso, ibunyag. Pero sana, ang kritisismo ay ibatay sa katotohanan at resulta, hindi sa hinala at sariling interes. 

Deserve ng bawat Pilipino ang gobyernong matino at hindi ang walang katapusang teleserye sa pulitika.

Mas maraming school counselors, mas ligtas na kapaligiran para sa mag-aaral

by Info @Editorial | May 31, 2026

Dumarami ang kaso ng bullying sa mga pampublikong paaralan. Maraming estudyante ang natatakot pumasok, nawawalan ng kumpiyansa sa sarili, at naaapektuhan ang kanilang pag-aaral dahil sa pang-aapi.

Kaya makatwiran lamang na magdagdag ng 15,000 school counselors sa mga paaralan.

Malaki ang maitutulong ng mga counselor sa mga estudyanteng biktima ng bullying. Maaari silang magbigay ng gabay, payo, at agarang tulong sa mga nakararanas ng emosyonal at mental na problema. Makakatulong din sila upang matukoy at maagapan ang mga kaso ng bullying bago pa ito lumala.

Ngunit hindi sapat ang mga patakaran lamang laban sa bullying kung walang sapat na taong tututok sa mga estudyante. Kailangan ng mga paaralan ng mga propesyonal na handang makinig, umalalay, at magbigay ng tamang aksyon sa bawat insidente.

Ang pagkuha ng 15,000 school counselors ay hindi gastos kundi isang mahalagang pamumuhunan para sa kaligtasan at kapakanan ng mga mag-aaral. Kung seryoso ang pamahalaan sa paglaban sa bullying, dapat nitong tiyakin na may sapat na counselors sa bawat paaralan. Sa ganitong paraan, mas magiging ligtas at maayos ang kapaligiran para sa pag-aaral ng kabataan.