NCR Plus Bubble, balik-ECQ simula Lunes — IATF

ni Mary Gutierrez Almirañez | March 27, 2021

Inirekomenda ng Inter-Agency Task Force on Emerging Infectious Diseases (IATF) kay Pangulong Rodrigo Duterte na ilagay sa enhanced community quarantine (ECQ) ang mga lugar na kabilang sa NCR Plus Bubble dahil umabot na sa 9,595 ang nadagdag na positibo sa COVID-19 ngayong araw, Marso 27.

Ayon sa ulat, dalawang magkasunod na araw nang pumalo sa mahigit siyam na libo ang nagpositibo sa virus at posible pa itong tumaas batay sa babala ng OCTA Research Group kung hindi ilalagay sa mas mahigpit na quarantine restrictions ang NCR.

Kabilang sa mga naging rekomendasyon ng IATF ang mga sumusunod:

• Ilagay sa ECQ ang NCR, Bulacan, Rizal, Cavite at Laguna simula sa Lunes hanggang sa ika-4 ng Abril

• I-review ang mga naunang guidelines sa ilalim ng ECQ

• Pahintulutan ang mga pampublikong transportasyon at limitahan ang kapasidad alinsunod sa ipapatupad na guidelines ng Department of Transportation (DOTr)

• Pahintulutan ang construction projects alinsunod sa ipapatupad na guidelines ng Department of Public Works and Highways (DPWH)

• Ipatupad ang Prevent, Detect, Isolate, Treat, Reassess (PDITR) actions mula sa National Task Force (NTF), Local Government Unit (LGU) at New Government Accounting System (NGAs)

• Ipatupad ang lockdown sa Cordillera Administrative Region (CAR), Region 3 partikular sa Zambales at CALABARZON. Sa ngayon ay 712,442 na ang naitalang kaso ng COVID-19, kung saan 81.6% o 581,161 ang gumaling at 1.85% o 13,159 naman ang namatay.

Samantala, ayon sa tweet ni Cavite Governor Jonvic Remulla sa kanyang Twitter account ngayong Sabado nang hapon, “Just talked to Spox Harry Roque. Cavite along with other areas will be under ECQ from Sunday, March 28-April 4, 2021. I will report details as I get it.”

'Di na kailangan ng ECQ… COVID patients, kayang-kaya nating gamutin — Roque

ni Lolet Abania | March 8, 2021

Hindi na kailangang bumalik sa full-scale lockdown sa kabila ng naitalang pagtaas ng kaso ng COVID-19 sa bansa. Ito ang ipinahayag ni Presidential Spokesperson Harry Roque, kung saan aniya, may 60% hanggang 75% na mga kama sa mga intensive care units, isolation facilities at hospital wards para sa mga pasyenteng may coronavirus, habang 77% naman ng mga ventilators ang hindi nagagamit noon pang Marso 7.

“For the month of March, it is uncalled for,” ani Roque sa Palace briefing ngayong Lunes nang tanungin kung muling ibabalik ang bansa sa enhanced community quarantine (ECQ).

“Handa po tayong gamutin ang mga magkakasakit. Meron pong available na beds, at inatasan na po natin ang mga local government units na paigtingin ang compliance sa minimum public health standards, contact tracing, testing, at may kapangyarihan po sila na magpatupad ng localized lockdown,” paliwanag ng kalihim.

Ipinagdiinan din ni Roque na napakahusay ng ginagawa ng Pilipinas sa pagkontrol ng COVID-19, kahit na bumagsak ang ekonomiya ng bansa ng hanggang -9% na naitalang pagsadsad nang husto mula pa noong 1946.

Ayon kay Roque, mahigit sa 90% ng mga kaso ng COVID-19 sa bansa ay mga mild at asymptomatic at ang mga naitalang namatay naman ay umabot lamang sa higit 12,000 na mas mababa kumpara sa United States na napakayamang bansa.

“We were excellent. Na-control po natin ang pagkalat ng sakit lalung-lalo na kung ikukumpara tayo sa mas mayayaman at mga bansa na mas mararami at mas moderno ang mga ospital," ani Roque.

"Hindi po tayo nasa top 5, hindi po tayo nasa 10, hindi po tayo nasa top 15, hindi tayo nasa top 20, hindi tayo nasa top 25. So we did a very good job given na talagang kulang na kulang po talaga ang ating health facilities at kulang iyong pondo na ibinubuhos natin para sa health sector,” dagdag ng opisyal.

Samantala, ipinahayag ng Department of Health (DOH) na hindi pa kailangan ng time-out para sa mga health workers sa ngayon kahit na tumataas ang mga tinamaan ng coronavirus.

“When we went around, nakita natin dumadami po talaga ang mga tao sa ER (emergency room), ang may mga sintomas ng COVID. Pero to say that the system is overwhelmed? No,” ani DOH Undersecretary Maria Rosario Vergeire sa isang online briefing ngayong Lunes. “'Pag tiningnan po natin ang healthcare utilization, we’re still at the manageable level na mayroon pa po tayong almost 50% na puwede ma-accommodate ang ating mga pasyente,” sabi pa ni Vergeire.