WHO, nanawagan ng tigil-putukan sa lumalalang Ebola outbreak sa Congo

ni Jenny Rose Albason @World News | May 29, 2026

Nanawagan ang World Health Organization (WHO) ng agarang tigil-putukan sa silangang bahagi ng Democratic Republic of the Congo (DRC) upang mapigilan ang pagkalat ng Ebola habang nagpapatuloy ang labanan sa rehiyon.

Ayon sa WHO, lumalala ang Ebola outbreak sa gitna ng patuloy na sigalot, dahilan upang magsiksikan ang mga lumikas sa evacuation at displacement camps kung saan mas mabilis na kumakalat ang sakit.

Sinabi ni WHO Director-General Tedros Adhanom Ghebreyesus na lubhang naaapektuhan ng digmaan at outbreak ang sitwasyon sa eastern DRC, kung saan nahihirapan ang mga health worker na makapaghatid ng tulong dahil sa kaguluhan.

Ayon kay Tedros, hindi magiging epektibo ang pagtugon sa outbreak habang nagpapatuloy ang pambobomba at labanan, kaya nanawagan siya sa lahat ng panig na magpatupad ng agarang ceasefire.

Ang kasalukuyang Ebola outbreak ay mula sa Bundibugyo strain na wala pang aprubadong bakuna o lunas, at idineklara ng WHO bilang international health emergency dahil sa mabilis na pagdami ng kaso.

Mahigit 900 na ang pinaghihinalaang kaso at higit 200 ang pinaghihinalaang nasawi sa tatlong probinsya sa eastern Congo, kabilang ang mga lugar na kontrolado ng mga rebeldeng grupo.

Ayon sa mga humanitarian organization, marami sa mga nasawi ay mga bata, habang lampas na rin sa kapasidad ang mga refugee sites sa karatig-bansang Uganda dahil sa pagdagsa ng mga lumikas.

2nd Ebola outbreak sa Guinea, tapos na — WHO

ni Ronalyn Seminiano Reonico | June 20, 2021

Idineklara ng World Health Organization (WHO) ngayong Sabado na natapos na ang second Ebola outbreak sa Guinea. Noong Pebrero tumama sa Guinea ang second Ebola outbreak kung saan naitala ang 16 kumpirmadong kaso at 7 “probable” infections at ayon sa WHO, 12 sa mga ito ang pumanaw.

Saad ng opisyal ng WHO na si Alfred Ki-Zerbo, "I have the honor of declaring the end of Ebola (in Guinea)."

Saad naman ni Health Minister Remy Lamah, "In the name of the head of state (President Alpha Conde) I wish to declare the end of resurgence of Ebola in Guinea."

Noong 2013 hanggang 2016, tumama sa West Africa ang Ebola epidemic kung saan tinatayang aabot sa 11,300 ang namatay sa Guinea, Liberia at Sierra Leone.

Samantala, ilan sa mga sintomas ng Ebola ay mataas na lagnat at labis na pagdurugo. Nakakahawa rin ito sa pamamagitan ng close contact sa bodily fluids.

3 patay sa Ebola virus sa Africa

ni Lolet Abania | February 15, 2021

Tatlo ang naitalang patay matapos na tamaan ng Ebola virus sa Guinea, bahagi ng West Africa. Mula nu'ng 2016, ngayon lang uli dinapuan ang nasabing bansa ng ganitong klase ng sakit.

Bukod sa mga namatay, may limang inoobserbahan pa sa ospital dahil sa nagpositibo rin ang mga ito sa Ebola virus.

Nakaranas ang mga pasyente ng pagsusuka, matinding pagdumi o diarrhea at pagdurugo matapos na sila ay makipaglibing. Hindi naman nagbigay ang mga awtoridad ng iba pang detalye sa pagkakakilanlan ng tatlong namatay at limang pasyente na infected ng Ebola virus.

Matatandaang sa pagitan ng 2013 at 2016, mahigit sa 11,000 katao ang naitalang namatay sa West Africa dahil sa Ebola epidemic na nagsimula sa Guinea.

Ayon sa mga eksperto, nakukuha ang Ebola virus kapag ang isang tao ay nagkaroon ng close contact sa mga infected o maysakit na hayop gaya ng chimpanzees, fruit bats at forest antelope.

Habang nahahawahan naman ang mga tao sa pamamagitan ng direct contact sa nagpositibo sa nasabing virus. Gayunman, bilang pagtugon sa epidemya, maraming vaccines ang isinagawa para labanan ang pagkalat ng nasabing sakit sa Democratic Republic of Congo.

Ang mga nais namang maging volunteer sa trial ay kailangan lamang sumagot sa maikling questionnaire. Samantala, mahigit sa 200 milyong doses kada buwan ang gagawin ng AstraZeneca pagsapit ng Abril dahil sa kanilang target na magkaroon ng 3 bilyong doses ngayong taon.