E-Gilas, nagtala ng 3 wins sa FIBA ESports Open II

ni VA / Anthony E. Servinio - @Sports | November 16, 2020

Namayani ang Pilipinas at Australia sa unang araw ng 2020 FIBA ESports Open II Sabado ng gabi matapos parehong magtala ng tatlong panalo at maagang siguraduhin ang kanilang pagharap para sa kampeonato ng Timog Silangang Asya at Oceania. Ang seryeng best-of-three para sa kampeonato ay nilaro noong Linggo ng gabi.

Hindi maganda ang simula ng kampanya ng E-Gilas at natalo agad sa mga Australyano, 53-70. Subalit hindi sumuko at bumawi ang mga Pinoy sa pamamagitan ng tatlong sunod-sunod na tagumpay.

Nahanap ng Pilipinas ang kanilang paboritong sandata, ang three-points na hindi gumana laban sa Australia, at binuhos ang sama ng loob sa Indonesia, 65-37. Nanguna para sa mga Pinoy sina Aljon Cruzin na may 28 puntos at Rocky Brana na may 17 puntos.

Sumunod ang pangalawang pagharap sa Australia at nakaganti ng malaki ang Pilipinas, 81-55. Nagpaulan muli ng kaliwa’t kanan na tres ang E-Gilas upang lumayo agad at nagulat na lang ang kalaban.

Biglang nasubukan ang tibay ng loob ng mga Pinoy sa 65-50 na pangalawang panalo sa Indonesia. Sinayang ng Pilipinas ang 53-40 at nagpasabog ng 10 sunod-sunod na puntos ang mga Indones upang manakot, 50-53, subalit sinagot ito ng apat na tres sa loob ng huling minuto ng mainitang laban upang makatakas.

Tinalo rin ng Australia ang Indonesia ng dalawang beses, 75-61 at 80-59. Tabla ang Pilipinas at Australia sa kartadang 3-1 panalo-talo habang walang panalo ang Indonesia na 0-4 upang magpaalam kahit may nakatakdang tig-dalawang laro ang mga koponan sa elimination round.

Samantala, isang panalo nalang ang kailangan ng Saudi Arabia para umulit bilang kampeon ng Gitnang Silangan kontra sa Lebanon, 3-1. Nanalo ang mga Saudi sa unang laro, 73-69, pero natabla ng Lebanon ang serye sa pangalawa, 56-50.

Nagising ang Saudi Arabia at kinuha ang sumunod na dalawang laban, 62-45 at 71-64. Sa Aprika, lumamang ng walang hirap ang Cote d’Ivoire, 3-0, bunga ng suliranin sa internet sa panig ng Gabon.

2020 FIBA ESports Open II: Phl vs. Indonesia, start na

ni Anthony Servinio - @Sports | November 14, 2020

Sisimulan ngayong araw ang kampanya ng Pilipinas sa FIBA ESports Open II. Haharapin ng E-Gilas ang panibagong hamon galing sa Australia at Indonesia sa online bakbakan sa NBA2K simula 5:30 ng hapon.

Babalik muli sina Rial Polog, Custer Galas, Philippe Herrero IV, Clark Banzon at Aljon Cruzin matapos nila blankahin ang Indonesia sa kanilang serye ng limang laro noong Hunyo para mauwi ang kampeonato ng Timog Silangang Asya, 5-0. Subalit hindi magiging madali ngayon ang labanan dahil papasok sa eksena ang Australia na nagkampeon ng Oceania kontra New Zealand, 4-1.

Maglalaro ang tatlong bansa ng triple round robin o anim na beses bawat isa mula ngayon hanggang bukas. Ang dalawang may pinakamataas ng kartada ay tutuloy sa championship na lalaruin bukas simula 7:20 ng gabi.

Ang mga reserba ng pambansang koponan ay sina Rocky Brana at ang bagong dagdag na si Arnie Sison na pinalitan si David John Timajo. Babalik bilang coach si Nite Alparas.

Masusubaybayan ng live ang lahat ng laro ng Pilipinas sa opisyal na YouTube Channel ng FIBA sa wikang Ingles. Gagamitin muli ang makabagong studio na tinayo ng FIBA sa Riga, Latvia noong Hunyo para sa unang ESports Open.

Sabay din bubuksan ang mga serye sa iba pang bahagi ng mundo. Ipagtatanggol muli ng Saudi Arabia ang kanilang korona laban sa Lebanon habang maghaharap ang Cote d’Ivoire at Gabon para malaman ang unang kampeon ng Aprika sa magkahiwalay na serye ng tatagal ng pitong laro.

Samantala, sa Disyembre 12 at 13 ang torneo ng Europa. Susundan ito agad ng mga torneo sa Hilaga at Timog Amerika sa Disyembre 19 at 20.

E-Gilas Pilipinas, sasabak sa NBA2K20 Pacific Pro-Am Tourney

ni VA - @Sports | August 30, 2020

Muling sasabak sa virtual hardcourt ang E-Gilas Pilipinas bilang Playbook Laus Esports (PLE) club ngayong araw na ito kontra sa mga pinakamagagaling na Asian esports teams sa idaraos na NBA2K20: The Pacific Pro-Am tournament.

Buhat sa kanilang matagumpay na performance sa FIBA Esports Open noong nakaraang Hunyo, kabilang sa makakatunggali ng Nationals ang mga koponang Taiwan’s The Answer, Hong Kong’s Secret Loves, Indonesia’s Take Over, Korea’s Promy, Singapore’s Team Tekong at Japan’s 2KJ.

Makakasama nila ang isa pang Pinoy esports squad-ang Bad Boys sa pagsabak sa dalawang araw na torneo na suportado ng SMART, Philippine Esports Organization (PEsO) az Esports National Association of the Philippines (ESNAP).

Optimistiko ang koponan na muling magwawagi ng international title sa tulong at pagsuporta na rin sa kanila ng Samahang Basketbol ng Pilipinas (SBP).

“I wouldn’t say our chances are very high but I’m confident that we can make it. We are well prepared for this,” wika ni Rial Polog Jr.

“The SBP continues to support Philippine basketball, even the virtual kind, and we are enthusiastic about the possibilities The Pacific would bring in fostering greater ties between the Philippines and other countries,” pahayag naman ni SBP president Al Panlilio.

Makakasama ni Polog Jr. sa koponan sina Aljon Cruzin, Custer Galas, Philippe Herrero IV at Clark Banzon na sya ring kakampi nya nang magwagi sila ng Southeast Asian Conference title sa inaugural FIBA esports tournament.

Nais ng koponan na mas maging maganda ang kanilang chemistry bilang paghahanda sa susunod na FIBA Esports tournament sa Oktubre maliban sa pagkamit ng Asian title at premyong $10,000 (P500,000).

Maaaring subaybayan ang event sa GG Network at ONE Sports.