Pagtaguyod ng PSAA Esports mas palalakasin ang MLBB

by MC @Sports News | October 9, 2026

Photo: Higit na palalakasin ng PSAA Esports ang larong Mobile Legends: Bang Bang (MLBB) sa pangunguna nina CreamLoops Marketing Manager Pamela Ann Abril,  PSAA founder at sports organizer Fernando “Butch” Arimado sa pagbisita sa TOPS “Usapang Sports” kasama sina Campaign Manager Racel Santos, Event Director Keith Christina Valler at P-pop sensation Believe bilang brand ambassador. (Gen Villota)

Malaking tulong para sa Esports ng Philippine Schools Athletic Association (PSAA) ang pagtataguyod ng kauna-unahang  competition ng school-based league ang Creamloops para sa ikalimang season  sa susunod na buwan. 

May kabuuang 16 na koponan mula sa walong miyembrong paaralan ng PSAA ang maglalaban-laban sa Mobile Legends: Bang Bang. 

Sisimulan ang torneo sa Nob. 11, matapos ang basketball season ng liga. Ang unang esports event ng PSAA ay nakikita bilang isa pang mahalagang hakbang sa patuloy na pagsisikap ng asosasyon na palawakin ang sports program. 

Ang partnership ay isang paraan upang masuportahan ang mga kabataang atleta at makatulong sa pagpapaunlad ng grassroots sports.

“Masaya at proud kami na ma-organize ang esports para sa PSAA. Ilang taon na rin kaming sumusuporta sa esports at palagi naming hinahangaan ang mga student-athlete na disiplinado at responsable, at kayang pagsabayin ang kanilang pag-aaral at sports,” pahayag ni CreamLoops Marketing Manager Pamela Ann Abril sa “Usapang Sports” ng Tabloids Organization in Philippine Sports, Inc. (TOPS) sa Philippine Sports Commission Conference Room kahapon. 

Partikular na pinili ng kumpanya ang Mobile Legends: Bang Bang para sa PSAA competition dahil kinikilala nito ang lumalaking popularidad ng esports sa mga estudyanteng Pilipino at ang potensiyal ng organisadong paglalaro bilang plataporma para sa disiplina, teamwork at pag-unlad sa kompetisyon. 

Ang kampeon ay tatanggap ng ₱100,000 cash at CreamLoops products, habang makakakuha naman ng ₱50,000 ang runner-up at ₱30,000 ang third-place finisher.

Malugod namang tinanggap ni PSAA founder at sports organizer Fernando “Butch” Arimado, na siya ring nagtatag ng National Youth Basketball League, ang partnership at inilarawan ito bilang malaking dagdag-suporta sa batang asosasyon. Kasama nina Abril at Arimado sa TOPS forum sina Campaign Manager Racel Santos, Event Director Keith Christina Valler, at Believe, ang pinakabagong P-pop sensation sa bansa at brand ambassador ng kumpanya. 

2nd bronze nakuha ng SIBOL sa Honor of Kings

by Gerard Arce @Sports News | September 29, 2026

Photo: Ika-9 na tansong medalya ang nasungkit ng Esports team ng Pilipinas na Sibol sa larong Honor of Kings sa 20th Aichi-Nagoya Asian Games sa Japan. (pocmedia)

Sinungkit ng SIBOL Esports ang ika-2 tansong medalyang ambag para sa kabuuang 10 ng 'Pinas matapos mabigo sa powerhouse na China sa Honor of Kings sa 20th Asian Games Aichi-Nagoya 2026 na ginanap sa Aichi Expo Sky Expo Hall D sa Tokoname City, Japan.

Binubuo ang Filipino squad ng kambal na sina Golden at Dragon Dajao, kasama sina Justine Tan, Charles Esguerra, at Chammy Nazarrea, sa gabay ni Coach Gerald Gelacio. Kasunod ng naunang bronze medal nitong Linggo ng gabi para sa Pokémon UNITE team.

Nagawang makausad sa semifinals ng SIBOL Esports sa Honor of Kings matapos sibakin ang Kazakhstan sa 2-0 sa Group B match, ngunit nabigo sa Malaysia sa 1-2 sa sumunod na laro.

Subalit nalampasan naman ng SIBOL ang South Korea sa quarterfinals sa 2-0 upang makatapat ang China sa semis. Patuloy na sumasabak ang SIBOL sa asymmetrical survival game na Identity V – Asian Games version, habang sisimulan ng koponan ang misyon sa MLBB laban sa Jordan habang gaganapin ang quarterfinals at semifinals ng Miyerkules, samantalang ang Finals ay sa Huwebes ng 1 p.m.

Dahil sa dagdag medalya umangat ang bilang ng medalya ng Pilipinas sa 13 mula sa 2 ginto, 2 pilak at 10 na tanso para sa 16th spot sa medal tally.

eGilas Pilipinas kampeon sa eFIBA World Finals Qatar S4

ni Anthony E. Servinio @Sports | July 6, 2026

Photo: Kampeon sa eFIBA  ang Team Philippines EGilas sa World Finals 2026 sa Qatar. Tinalo ng koponan ang Türkiye sa Grand Finals, 2-0 (64-62 at 68-60). (seasportsnewsfb)

Kampeon sa unang pagkakataon ang eGilas Pilipinas sa eFIBA World Finals Qatar Season 4! Winalis ng mga Pinoy ang Turkiye sa thrice-to-beat Grand Finals, 64-62 at 68-60, para sa $20,000 (₱1,228,917) gantimpala.

Binubuo ang koponan nina Miguel Carlo Hubillar, Prich Jayrald Diez, Joshua Miguel Machado, Kenneth Charles Gutierrez at Chris Edward Briones. Ang mga reserba ay sina Juan Gabriel dela Pena at John Emmanuel Reyes sa gabay nina Coach Nite Alparas at Coach Anthony de Jesus.

Bumuhos ng kabuuang 68 puntos sa Finals si Hubillar para mapiling MVP. Kasama niya sa All-star Five sina Best Defensive Player Gutierrez, Machado, Medhi Ben Sethoum ng Pransiya at Mecit Can Boy ng Turkiye.

Gamit ang pinakabagong NBA 2K para sa PS5, halos perpekto ang lakbay tungo sa makasaysayang kampeonato. Ang nag-iisang talo ay sa kamay ng Pransiya, 52-61, sa Upper Bracket Finals Game 1 subalit bumawi at kinuha ang dalawang sunod, 63-59 at 67-64, para sa unang upuan sa Grand Finals. Unang pinabagsak ng eGilas ang mga Pranses (64-53), Algeria (73-52) at Alemanya (72-45) para walisin ang Grupo A. Dinaig nila ang Lebanon, 67-58, sa knockout Upper Bracket Semifinals.

Walang pangkalahatang World Champion sa Season 1 na ginanap online at sa halip ay nag-korona sa bawat kontinente kabilang ang Pilipinas sa Asya.