Gilas Women naka-silver sa 3x3 Asian Beach Games

ni Anthony E. Servinio @Sports | April 30, 2026

Photo: Circulated

Laro sa Biyernes - Chengdu

10:25 AM Pilipinas vs. Brazil

12:15 PM Pilipinas vs. NZ

Umani ang Gilas Pilipinas ng pinakaunang medalya sa 3x3 sa kasaysayan ng Asian Beach Games - pilak para sa mga babae - kagabi sa Sanya Sports Centre. Napunta sa host Tsina ang ginto, 21-13, para patibayin ang estado bilang numero uno sa Asya sa FIBA3X3 Ranking.

Hindi nakauwi ng medalya ang mga lalake at yumuko sa Tsina sa laban para sa tanso, 21-13, pero ito pa rin ang pinakamataas na antas na naabot ng Gilas. Nakaganti ang mga host sa 18-21 talo nila sa mga Pinoy sa unang araw ng torneo noong Sabado. Tinatapos kagabi ang laban para sa ginto sa pagitan ng defending champion Qatar at Thailand. Nakamit ng Thailand ang tanso sa kababaihan kontra Singapore, 17-8.

Sa semifinals, iniligpit ng mga Pinay ang Singapore, 20-13. Gumawa ng walo si Mikka Cacho at sinuportahan nina Reynalyn Ferrer na may anim, Kaye Pingol na may lima at isa kay Gabi Bade.

Nabitin ang huling paghabol ng mga kabataan ng kalalakihan sa mga beterano ng Thailand, 18-20. Nasayang ang siyam ni Nic Cabanero habang apat si Jeff Manday, tatlo kay Aldous Torculas at dalawa kay Angelo Crisostomo.

Gilas Women silver, Australia gold sa FIBA 3x3 Asia Cup

ni Anthony E. Servinio @Sports | April 6, 2026

Photo: FIBA 3x3

Umulit ang defending champion Australia sa palaban na Gilas Pilipinas, 18-9, sa pagtatapos ng FIBA3x3 Asia Cup Singapore 2026 Linggo ng gabi sa OCBC Square. Ito ang ika-apat na sunod na kampeonato ng Aussies at kabuuang pang-anim subalit makasaysayan ang unang medalya ng mga Pinay sa torneo mula 2019.

Umarangkada ang Australia, 6-0, at inabot ng halos apat na minuto nang nakapuntos si Kacey dela Rosa. Lumaki ito sa 18-7 bago humabol ng dalawang buslo si Cheska Apag sa huling 30 segundo para sa huling talaan. Hinirang na MVP si Kristy Wallace na beterana rin ng WNBA.

Sinamahan siya sa Team of the Tournament nina Afril Bernardino ng Gilas at Zhang Zhiting ng Tsina. Sa elimination noong Biyernes binigo ng Australia ang Gilas, 21-10, at walisin ang Grupo D.

Pasok pa rin sa playoffs ang Pilipinas sa bisa ng 19-10 tagumpay sa qualifier Tonga sa nauna nilang laro. Ibang bangis ang ipinamalas ng Gilas at pinauwi ang paborito Mongolia sa quarterfinals, 15-12.

Sinundan ito ng mas nakakapanabik na 21-19 pagtakas sa Japan sa semifinals at itakda ang pangalawang sa sagupaan sa Australia. Nabawi ng Tsina ang pangatlong puwesto sa 20-15 panalo sa Japan.

Sa panig ng kalalakihan, kampeon sa unang pagkakataon ang Aotearoa New Zealand na sinundan ng Timog Korea at Tsina.

Nagtapos na pang-anim ang Gilas Men nang matalo sa mga Koreano sa quarterfinals, 15-18. Malaking angat pa rin ito kumpara sa ika-15 noong 2025 kung saan hindi lumampas sa qualifier ang mga Pinoy.

Gilas susubukin ang lakas sa FIBA 3X3 Asia Cup Singapore

ni Anthony E. Servinio @Sports | March 27, 2026

Photo: Ang teams Gilas men at women na sasabak sa FIBA Asia Cup 3x3 2026. (nolimithoopspix)

Malaking pagbawi ang puntirya ng mga koponan ng Gilas Pilipinas sa pagsabak nila sa FIBA 3X3 Asia Cup Singapore 2026 simula Abril 1 hanggang 5. Ito ay hakbang patungo sa pangarap na mapabilang sa Los Angeles 2028 Olympics.

Matapos maging ika-15 sa 25 bansa noong 2025 sa Singapore din, maninigurado ang Samahang Basketbol ng Pilipinas sa pamumuno ng bagong Direktor ng 3x3 Coach Ryan Gregorio. Itinalaga ang mga PBA player Jerrick Ahanmisi ng Terrafirma, Chris Koon ng Magnolia at Ralph Cu ng Ginebra at Sean Alter ng UP-Diliman.

Dahil mababa ang puwesto, kailangang dumaan ang mga Pinoy sa qualifier laban sa Maldives at Thailand. Kung papalarin, ilalagay sila sa Pool A kasama ang numero uno Mongolia at Chinese-Taipei.

Para sa Gilas Women, nais nilang higitan ang pagpasok sa semifinals noong 2025. Nakasalalay ito kay Afril Bernardino, Kacey dela Rosa, Cheska Apag at ang nag-iisang magbabalik na si Mikka Cacho.

Nabunot sila sa Pool D kasama ang defending champion Australia at ang lulusot sa qualifier sa pagitan ng Tonga, Macau at Maldives. Noong 2025 ay yumuko ang Gilas sa Aussies sa elimination, 8-21, pero pasok pa rin sa quarterfinals bunga ng 21-4 tambakan sa Indonesia.

Ginulat ng mga Pinay ang Mongolia sa quarterfinals, 19-15. Binigo sila ng Japan sa semifinals, 9-22 at ng Tsina para sa medalyang tanso, 11-21.

Maliban sa Asia Cup, magiging abala ang Gilas sa FIBA3X3 Women's Series kung saan magbubuo ng dalawang koponan ang Pilipinas. Nakatakda silang sumalang sa mga yugto sa Maynila (Mayo 7), Batam, Indonesia (Hulyo 23) at Tokyo (Agosto 1).