P-Duterte, lalahok sa APEC Summit

ni Lolet Abania | November 16, 2020

Ipinahayag ni Pangulong Rodrigo Duterte na lalahok siya sa nakatakdang online meeting ng mga lider sa buong mundo sa Asia Pacific Economic Cooperation (APEC) Summit na gaganapin sa Biyernes, November 20, kasabay ng pagtalakay ng mga ito sa nanghihinang ekonomiya ng mga bansa dahil sa COVID-19 pandemic, ayon sa Malacañang.

Ito ang kauna-unahang pagsasagawa virtually ng APEC Economic Leaders’ Meeting, kung saan ayon kay Presidential Spokesperson Harry Roque ay magkakaroon ng dalawang sessions sa nasabing summit.

Ayon sa Malaysia, ang host country ngayong taon, asahan na tatalakayin ang paglulunsad ng bagong vision na magbibigay gabay sa 21 Pacific Rim economies sa mga susunod na taon.

Ang summit noong nakaraang taon sa Chile ay nakansela dahil sa mga violent protests sa mga bansa sa South America.

Samantala, noong nakaraang linggo, lumahok virtually si Pangulong Duterte sa 37th Association of Southeast Nations (ASEAN) Summit and Related Summits, kung saan binanggit niya ang tungkol sa pagpapalalim ng regional integration at pagpapalakas ng supply chain connectivity.

Hinimok din ni P-Duterte ang mga Southeast Asian countries sa pagkakaroon ng kooperasyon para tiyakin na ang kani-kanilang mamamayan ay maka-access sa COVID-19 vaccines.

Pinangunahan din ni Pangulong Duterte ang mga lider ng mga bansa para sa isang open dialogue at tinukoy niya ang pagpapaigting ng multilateralism para sa pagtugon sa COVID-19 pandemic at recovery, climate action, at pagkakaroon ng kapayapaan at isyu ng seguridad sa Asia Pacific, partikular na ang South China Sea disputes.

Sangley Airport sa Cavite, tuloy! — P-Duterte

ni Thea Janica Teh | September 1, 2020

Pumayag na si Pangulong Rodrigo Duterte na ituloy ang proyekto ng Sangley Airport sa Cavite at prayoridad umano ng pamahalaan na matapos ang lahat ng major infrastructure programs bago matapos ang administrasyon ng pangulo sa 2022, ayon sa Malacañang.

Nagbigay na ng go-signal si P-Duterte sa airport project kahit lumabas ang balita na isinama sa blacklist ng US ang foreign contractor nito na China Communications Construction Co (CCCC).

Ayon kay Presidential Spokesperson Harry Roque, hindi umano susunod si Pangulong Duterte sa direktiba ng mga Amerikano dahil malaya at independiente ang ating bansa.

Dagdag pa nito, kinakailangan umano natin ang mga namumuhunan galing sa bansang China.

Noong August 28, nagdesisyon ang United States na i-blacklist ang ilang Chinese firms kasama ang CCCC dahil sa mga alegasyon patungkol sa pagpapatayo ng building sa South China Sea.

Ang CCCC ay pinapatakbo ng Chinese government at kasama sa Sangley Point International Airport Project ang MacroAsia ni Lucio Tan.

Ayon naman sa MacroAsia, hinihintay na lamang nito ang ibibigay na instruction ng pangulo.

Ang proyektong ito ay nagkakahalaga ng $10 billion kasama na ang land reclamation at expansion ng kasalukuyang airport.

P-Duterte, lumuhod at hinalikan ang pinangyarihan ng pagsabog sa Jolo, Sulu

ni Thea Janica Teh | August 31, 2020

Binisita nitong Linggo ni Pangulong Rodrigo Duterte ang pinangyarihan ng pagsabog sa Jolo, Sulu para parangalan ang mga namatay na sundalo at magbigay ng pakikiramay sa pamilyang naiwan.

Habang suot ang face mask at cap, lumuhod si Pangulong Duterte at hinalikan ang sahig kung saan nangyari ang pagsabog. Naglagay din ito ng bulaklak at nagtirik ng kandila.

Sa kanyang talumpati, sinabi ni Pangulong Duterte na ang ginawa niyang ‘yun ay para sa mga sundalo at sibilyang naging biktima sa pagsabog nang walang kalaban-laban.

Aniya, "This unfortunate incident is only one of the countless incidents that proved that we should never be complacent when it comes to terrorism. The recent bombings that took the lives of several civilians including those of your fellow soldiers will only further strengthen our resolve to crush the lawless elements behind this cowardly act.”

Ang pagsabog sa Jolo, Sulu ang pumatay sa 15 sundalo. Una nang kinilala ang dalawang suspek sa pagsabog at ito ay isang Indonesian widow ng 2019 Filipino suicide bomber at asawa ng Abu Sayyaf leader.