DILG at DTI, itinuro ng LTFRB.. Trike driver at delivery rider, wala pa ring ayuda

ni Mai Ancheta @News | October 1, 2023

Nganga pa rin ang mga tricycle driver at delivery rider sa fuel subsidy na pinondohan ng gobyerno para mapagaan kahit paano ang budget mula sa epekto ng mataas na presyo ng gasolina at diesel.

Ayon sa ilang tricycle drivers na miyembro ng Tricycle Operators and Drivers' Association (TODA), hanggang ngayon ay wala pang ibinibigay sa kanila na fuel subsidy matapos kunin ng lokal na pamahalaan ang kanilang aplikasyon, at wala rin silang natanggap na fleet card.

Maging ang delivery riders na nag-apply ng fuel subsidy ay wala pa ring natatanggap na tulong mula sa gobyerno sa kabila ng pahayag ng Land Transpotation Franchising and Regulatory Board (LTFRB) na kasama ang mga tricycle drivers at riders sa mga mabibigyan ng fuel subsidy.

Tinatayang 900,000 triycle drivers at 150,000 delivery riders ang naghihintay na mabiyayaan ng fuel subsidy.

Ayon sa LTFRB, wala pang ibibinigay na listahan ng benepisyaryo sa kanila ang Department of Interior and Local Government (DILG) at Department of Trade and Industy (DTI) na siyang nakatoka sa mga tricycle driver at delivery rider.

DTI sa manufacturers: Tigil sa taas-presyo

ni Mai Ancheta @News | September 15, 2023

Pakikiusapan ng Department of trade and Industry (DTI) ang mga manufacturer na huwag munang magtaas sa presyo ng kanilang produkto hanggang sa katapusan ng taon.

Kasunod ito ng survey na maraming kumpanya ng mga produkto ang nagbabalak na magtaas ng presyo dahil sa tumaas na halaga ng raw materials na kanilang ginagamit sa kanilang produkto.

Ayon kay DTI Assistant Secretary Mary Jean Pacheco, kakausapin nila ng mga manufacturer upang pakiusapang huwag munang sumabay sa mga nagtataasang presyo ng commodities.

Sa kasalukuyan ay mayroong pending request ang 14 na manufacturers para magtaas ng presyo ng kanilang produkto sa DTI.

Hindi pa ito inaaksyunan ng ahensya dahil binabalanse ang sitwasyon lalo na at mataas pa rin ang inflation.

Batid ng DTI na apektado rin ang mga manufacturer sa mataas na presyo ng kanilang ginagamit na raw materials kaya pakikiusapan ang mga ito na hangga't kaya pa ay huwag munang sumabay sa mataas na presyo ng mga pangunahing bilihin.

Bukas naman ang isang kumpanya ng sardinas na makipagdayalogo sa DTI upang ipaliwanag kung bakit kailangan nilang magdagdag sa presyo ng kanilang produkto.

Price cap sa bigas, 1 buwan lang — DTI

ni Madel Moratillo @News | September 7, 2023

Hindi umano magiging pangmatagalan ang ipinatutupad na price ceiling sa bigas.

Ayon kay Trade and Industry Asec. Agaton Teodoro Uvero, posibleng abutin lang ito ng ilang linggo o isang buwan. Inaasahan kasing huhupa rin ang presyo nito sa oras na magsimula na ang anihan.

Kapag marami ng suplay ng bigas, sunod ay bababa na ang presyo nito.

Sa pagtaya ng opisyal, posibleng sa susunod na 3 linggo lang ay bumuti na ang suplay ng bigas.

Ang napag-usapan rin naman aniya ay hindi lalagpas ng 1 buwan.

Sa ilalim ng inaprubahang executive order ni Pangulong Ferdinand Marcos, Jr., itinakda ang price ceiling sa regular milled rice sa P41 kada kilo, at P45 kada kilo sa well-milled rice.