Suplay ng tangke ng oxygen, tagilid — Duque

ni Ronalyn Seminiano Reonico | August 14, 2021

Siniguro ng Department of Health (DOH) na sapat ang suplay ng oxygen sa bansa ngunit ayon kay Secretary Francisco Duque III, posible umanong magkaroon ng kakulangan sa suplay ng tangke.

Aniya sa isang panayam, “Okay naman (ang oxygen supply) kasi palagi kaming nagpupulong ni Secretary Ramon Lopez ng DTI dahil siya ang nakikipag-ugnayan sa mga oxygen manufacturing companies.

“Ang sinasabi nila nu’ng huli kaming nag-usap, kung 203 tons of oxygen per day ang nagagamit, kaya nilang triplehin o kaya nilang gawing 605 tonnage per day ang isu-supply nila.”

Samantala, nanawagan din si Duque sa publiko na huwag mag-hoard ng mga oxygen tanks dahil posible umanong magkaproblema sa suplay ng mga tangke.

Aniya pa, “Inaantay ko pa rin ang pag-aangkat ng karagdagang tangke na walang kargang oxygen. ‘Yung tangke lang. Kasi ‘yung oxygen, meron, eh. Pero baka sa tangke, magkaproblema.”

Samantala, panawagan din ni Duque sa publiko, “Nananawagan ako sa ating mga kababayan na huwag kayong mag-hoard ng mga oxygen, unless meron kayong prescription ng mga doktor. Hayaan n’yo po 'yung mga tangke na umikot, hindi puwedeng nakaistasyon sa bahay ninyo ang mga tangke. Kailangan pong may sirkulasyon ang mga tangke na tuluy-tuloy na kapag naubos, ire-refill.”

DA at DTI, sanib-puwersa para sa presyo ng baboy

ni Lolet Abania | May 8, 2021

Inaasahang ilalabas ang suggested retail price (SRP) ng mga imported na baboy sa susunod na linggo, ayon sa Department of Agriculture (DA).

Sinabi ni DA Chief William Dar, kabilang ang mga senador, susuriin at susumahin nila ang presyo nito ayon sa napagkasunduang taripa.

Aniya, nakikipag-ugnayan na rin ang ahensiya sa Department of Trade and Industry (DTI) hinggil dito. “Well, ang presyo po base dito sa pinal na ibinaba na taripa, we are now making the calculations and we are doing this in tandem, in partnership with the DTI so, baka next week i-announce namin ang suggested retail price,” ani Dar.

Matatandaang nag-isyu si Pangulong Rodrigo Duterte ng executive order hinggil sa taripa ng mga imported na baboy. Subalit, ilang kongresista ang pormal na nagpasa ng resolusyon upang ipabawi ito kay Pangulong Duterte.

Gayunman, nagkasundo na ang DA at mga mambabatas sa ipinatupad na taripa sa dahilang maaaring makaapekto ito sa local hog industry.

Sinimulan ng pamahalaan ang pag-angkat ng imported na baboy sa kasagsagan ng pagdami ng kaso ng African swine fever (ASF) na labis na nakaapekto sa suplay nito sa bansa ng mga lokal na magbababoy.

Samantala, ayon kay Dar, posibleng bumuhos naman ang suplay sa bansa ng mga imported na isda, gulay at bigas habang sa ngayon ay sapat pa ang mga ito.

1.5 M, nawalan ng trabaho sa 2-week ECQ — DTI

ni Ronalyn Seminiano Reonico | April 15, 2021

Umabot sa 1.5 million ang nawalan ng hanapbuhay sa ipinatupad na enhanced community quarantine (ECQ) noong nakalipas na dalawang linggo sa NCR Plus na kinabibilangan ng Metro Manila, Bulacan, Cavite, Laguna at Rizal, ayon sa Department of Trade and Industry (DTI).

Dahil sa paglobo ng kaso ng COVID-19, noong March 29 hanggang April 11, ibinaba ang ECQ.

Pahayag ni Trade Secretary Ramon Lopez, "Base sa talaan ng mga labor force, iyong mga sectors na sarado noong ECQ, may mga 1.5 million estimate kami na na-displace, nawalan ng hanapbuhay.”

Nang luwagan ng pamahalaan ang quarantine classification sa modified ECQ, ayon kay Lopez, 500,000 ang nakabalik sa trabaho.

Aniya pa, “Therefore, meron pa tayong mga 1 million na inaasahan nating makakabalik [ng trabaho], hopefully ‘pag nag-GCQ tayo.”

Samantala, nananatili pa ring ipinagbabawal ang dine-in services, operasyon ng mga amusement parks, internet cafes, at personal care salons.

Epektibo ang MECQ sa NCR Plus hanggang sa April 30.