Sekyu todas, 2 pulis, sapul... ‘Drug underworld’, buking, 34 arestado

ni Justine Berganio @Overseas News | September 3, 2026

Photo: Umabot sa 34 katao ang naaresto kaugnay ng insidente, kabilang ang mga French, Belgian, Algerian at Dutch nationals. Nasamsam din sa operasyon ang ilang armas, data storage devices at mga sasakyan.

Patay ang isang 51-anyos na hinihinalang security guard habang dalawang pulis ang nasugatan sa bakbakan matapos salakayin ng grupo ng armadong lalaki ang isang bahay sa Overasselt, Netherlands nitong Martes alas-4 ng madaling-araw.

Ayon sa pulisya, nakasuot ng balaclava at armado ang mga suspek nang lumapit sa isang bahay at nagsimulang magpaputok. Nang rumesponde ang mga awtoridad, pinaputukan din ang mga pulis.

Hindi naman malubha ang mga tama ng dalawang pulis na isinugod sa pagamutan.

Umabot sa 34 katao ang naaresto kaugnay ng insidente, kabilang ang mga French, Belgian, Algerian at Dutch nationals. Nasamsam din sa operasyon ang ilang armas, data storage devices at mga sasakyan.

Pinaniniwalaang may kaugnayan ang barilan sa alitan sa drug underworld na kinasasangkutan ng wanted Dutch drug lord na si Jos Leijdekkers, alyas “Bolle Jos.”

Nabatid na nahatulan na si Leijdekkers dahil sa kanyang papel sa international cocaine trafficking at sinasabing naninirahan sa Sierra Leone sa nakalipas na hindi bababa sa tatlong taon.

Ayon sa local media, posibleng nag-ugat ang sagupaan sa away tungkol sa ilang daang kilo ng cocaine na umano’y ipinuslit ng grupo ni Leijdekkers.

Sinabi naman ni Deputy Chief Prosecutor Monique Vinkesteijn na may naganap ding pamamaril sa parehong bahay noong nakaraang taon na konektado sa isang matagal nang alitan.

Kabilang sa mga kasong kinakaharap ng mga naaresto ang murder, manslaughter at paghahanda umano sa isang kidnapping. Hindi rin isinasantabi ng mga awtoridad ang posibilidad na madagdagan pa ang bilang ng mga arestado.

Dahil sa banta ng karagdagang panganib, pinayuhan ng pulisya ang mga residente ng Overasselt na manatili muna sa loob ng kanilang mga bahay at isara ang mga pinto at bintana habang hinahanap ang posibleng iba pang suspek.

Nagpahayag naman ng pagkabigla si Overasselt Mayor Joerie Minses sa nangyaring karahasan, na aniya’y labis na ikinagulat ng buong komunidad.

P38M shabu sa parcel, buking

ni Gina Pleñago @News | April 2, 2026

Photo: Ang inabandonang parcel sa Central Mail Exchange Center (CMEC) sa Pasay City na nakuhanan ng mga hinihinalang shabu na nakasiksik sa mga foot massager, motorcycle jackets, at steel roller. (Gina Pleñago)

Nadiskubre ang tinatayang P38 milyong halaga ng hinihinalang shabu sa tatlong inabandonang parcel sa Central Mail Exchange Center (CMEC) sa Pasay City, Martes ng hapon, ayon sa Philippine National Police-Aviation Security Group.

Batay sa ulat ng AVSEGROUP, tumitimbang ng 5,691 gramo na katumbas ng P38,698,800 halaga ang hinihinalang shabu sa mga parcel na nagmula sa Canada, Pakistan, at Zambia, na ang mga recipients ay pawang sa munisipalidad ng Cavite.

Naharang ang mga parcel matapos sumalang sa cargo x-ray screening ng Bureau of Customs at ini-report sa NAIA Inter-Agency Drug Interdiction Task Group.

Agad isinailalim sa manu-manong pagbubukas ang mga pakete kaya nakumpirma sa kontrabando na nakasiksik sa mga foot massager, motorcycle jackets, at steel roller.

“This operation highlights our vigilance and the strength of inter-agency coordination in securing our air cargo system. We remind the public to remain cautious and never allow their identities or addresses to be used for suspicious shipments, as authorities will relentlessly pursue those involved in illegal drug activities,” ani P/Brig. Gen. Dionisio Bartolome, Jr., Director ng PNP AVSEGROUP.

P3.8B shabu, buking sa bodega sa Pampanga

ni Mylene Alfonso @News | September 29, 2023

Nasamsam ng pinagsanib na tauhan ng National Bureau of Investigation (NBI), Philippine Drug Enforcement Agency (PDEA), Bureau of Customs (BoC) at National Intelligence Coordinating Agency (NICA), ang may 560 kilo ng shabu na may halagang

P3.8 bilyon, na itinago sa plastic ng chicharon at dried fish kamakalawa ng gabi sa isang bodega sa San Jose Malino, Mexico City, Pampanga.

Ayon kay Justice Secretary Jesus Crispin Remulla, sa isang press briefing, ito na ang pinakamalaking huli ng ilegal na droga ngayong taon sa bansa.

Sinabi ni Remulla na ang shabu ay nagmula sa Thailand sakay ng Sitc Shekou at dumaong sa Subic Port in Subic Bay Freeport Zone noong Setyembre 18, 2023.

Nagawa umano ng crack team ng NBI na mapasok ang sindikato at nahubaran ng maskara ang mga sangkot sa pagpasok ng droga sa bansa.

Kinumpirma ni Remulla na may mga sangkot na dayuhan at may iniimbestigahan na rin na taga-BOC.

Inamin ni Remulla na napakasopistikado na ng operasyon ng sindikato dahil maski ang mga K-9 dogs ay nahirapan at dapat na muling sanayin sa pag-amoy ng ilegal na droga.

Gayunman, tumanggi si Remulla na magbigay ng pangalan sa mga taong sangkot sa sindikato.

Dahil sa naturang malaking huli, nakatakdang magkaroon ng masusing pakikipag-ugnayan ang NBI sa National Prosecution Service para sa pagsasampa ng kaso.

Magkakaroon din ng imbestigasyon sa kaso ang Anti-Money Laundering Council.

Layunin nito na kilalanin ang korporasyon na ginamit para sa pagpupuslit ng droga sa bansa.