13 bagong trainsets dumating na sa bansa

ni Jasmin Joy Evangelista | November 22, 2021

Dumating na ang 13 trainset para sa Philippine National Railways’ Clark line.

Ayon sa Department of Transportation (DOTr), ang nasabing mga trainsets ay bahagi ng binili ng bansa sa Japan Transport Engineering Company at Sumitomo Corporation.

Ang 8-car trainset na gagamitin sa PNR Clark Phase 1 ay sasailalim sa customs clearances at ito ay dadalhin sa Malanday Depot sa Valenzuela pagdating ng Disyembre.

Ang nasabing mga trainsets ay pumasa sa factory acceptance test sa Japan noong Oktubre bago ito ay i-deliver sa bansa.

Inaasahan pa ang pagdating ng ilang trainset sa second quarter ng 2022.

Operasyon ng MRT-3 panandaliang itinigil dahil sa tao sa riles

ni Jasmin Joy Evangelista | November 11, 2021

Panandaliang itinigil ang operasyon ng Metro Rail Transit-Line 3 (MRT3) nitong Miyerkules matapos may makitang hindi pa matukoy na indibidwal sa riles ng Guadalupe at Buendia station southbound.

Sa isang pahayag, sinabi ng pamunuan ng MRT3 na 11:35 a.m. nang makita ang tao sa riles.

“This refers to the incident today at 11:35am where an unidentified individual was seen along the tracks at the interstation of Guadalupe and Buendia (Southbound),” ayon sa tweet ng DOTr-MRT-3.

Agad namang naiulat sa Safety and Security personnel ang insidente, kaya 11:53 a.m. nang hulihin ang indibidwal ng mga security personnel at dinala sa Buendia Station platform.

Patuloy ang imbestigasyon at maglalabas ng opisyal na pahayag ang pamunuan ng MRT3.

Sa jeep, bus, tren, etc.... Mga kabataan, bawal pa rin isakay — DOTr

ni Lolet Abania | November 6, 2021

Ipinagbabawal pa rin ang mga menor-de-edad na pasakayin sa mga pampublikong transportasyon sa National Capital Region (NCR) kahit pa kasama nila ang kanilang mga magulang o guardians, ayon sa isang opisyal ng Department of Transportation (DOTr) ngayong Sabado.

Gayundin, kahit pa pinayagan na itaas sa 70 porsyento ang kapasidad ng mga pasahero sa mga public vehicles, kasabay ng pagluluwag ng quarantine protocols dahil na rin sa pagbaba ng kaso ng COVID-19.

Sa isang public briefing, sinabi ni DOTr Assistant Secretary Manuel Gonzales na wala pang inilalabas na mga guidelines mula sa ahensiya hinggil dito.

Ang kapasidad para sa rail lines at piling public utility vehicles (PUVs) sa rehiyon ay itinaas na sa 70% mula sa dating 50% noong Nobyembre 4.

“For the past 2 days, pinagbabawal po ng IACT, ng mga enforcers natin na magdala ng bata, na magsakay kasi po wala pa namang guidelines dito ang ating pamunuan sa transportasyon,” paliwanag ni Gonzales, na siya ring chief ng Inter-agency Council for Traffic (IACT).

“So ‘yung mga senior o ‘yung mga may dalang bata, hindi pa po natin pinasasakay dahil bawal pa nga po ‘yung mga bata for the past 2 days na ini-implement natin itong 70 percent,” dagdag ni Gonzales.

Matatandaang nitong kalagitnaan ng Oktubre pinayagan nang mag-travel ng Metropolitan Manila Development Authority (MMDA) ang mga minors sa NCR, na may 13 milyong indibidwal na naninirahan, basta may mga kasama silang adults.

At ngayon na ang Metro Manila ay isinailalim sa Alert Level 2, ang mga kabataan ay pinayagan na ring lumabas ng bahay at magpunta sa mga establisimyento at malls, anuman ang kanilang vaccination status.

Maaari na rin silang magtungo sa mga fairs, peryas o kids’ amusement areas gaya ng playgrounds, playroom, at kiddie rides na pinayagan na ring mag-operate sa ilalim ng pinababang quarantine level.