Mga borders, posibleng buksan sa mga dayuhang turista sa Abril — DOT

ni Lolet Abania | March 10, 2022

Posibleng mabuksan na ang mga borders para sa lahat ng mga dayuhang turista sa Abril, kung saan sa kasalukuyan ay tumatanggap lamang ang Pilipinas ng mga biyaherong mula sa visa-free na mga bansa, ayon sa Department of Tourism (DOT).

Sinabi ni DOT Secretary Bernadette Romulo-Puyat, tiwala ang ahensiya na aaprubahan ng gobyerno ang panukalang tumanggap na ng mga foreign tourists mula sa lahat ng mga bansa sa susunod na buwan.

“So far we’ve been doing well so we hope to open to all countries by April,” sabi ni Puyat sa isang interview ngayong Huwebes.

Ayon kay Puyat, sinimulan ng Pilipinas na magpapasok ng mga turista mula sa 157 visa-free countries noong nakaraang buwan at noon din ay nakatanggap na ng 73,178 tourist arrivals mula Pebrero 10 hanggang Marso 8, na sadya ring “surprising” o nakagugulat dahil inaasahan sanang dumating ang mga ito sa Hunyo.

“The reason why we started with visa-free countries was this was also the recommendation of the DFA [Department of Foreign Affairs]. They wanted to say ‘yung paunti-unti muna,” saad ni Puyat.

“They told us that they are ready to accept also, kasi they have to open the consular services all over the world so we hope that it will be approved and we will be able to accept by April,” anang opisyal.

Aniya, karamihan sa mga turista ay nagmula sa United States, Canada, Korea, Australia, Japan, Germany, at Vietnam. Ang mga foreign tourists mula sa visa-free countries ay required na magprisinta ng isang negative COVID-19 RT-PCR test result na kinuha ng 48-oras bago ang kanilang trip, kasama rin ang kanilang proof of vaccination para payagang makapasok sa Pilipinas.

Ayon pa kay Puyat, pinag-iisipan na rin ng gobyerno ang pagpapagaan ng mga requirements at payagan na ang isang negative result ng antigen test na kinuha ng 24-oras bago ang kanilang trip, habang aniya, iyong mga tinamaan na ng COVID-19 ay maaaring magpositibo sa RT-PCR ng hanggang tatlong buwan.

“I think the reopening to foreign tourists more of shows that we are slowly but surely going back to normal,” sabi pa ni Puyat.

7K fully vaxxed foreign travelers, dumating sa ‘Pinas — DOT

ni Lolet Abania | February 14, 2022

Mahigit sa 7,000 fully-vaccinated na mga dayuhan ang dumating sa bansa matapos na buksan uli ito sa kanila noong Huwebes, ayon sa Department of Tourism (DOT).

Sinabi ni DOT Secretary Bernadette Romulo-Puyat na umabot sa 7,051 foreign travelers, kung saan 45 porsiyento ay mga Pilipino na may foreign passports, ang dumating sa bansa mula Huwebes hanggang Linggo.

Mula ang mga dayuhang turista sa United States, Canada, Australia, UK, Japan, at South Korea.

“A lot were to be reunited with their families. May mga asawa dito na Filipina. Some said, ‘I haven’t seen my fiancé for 18 months and I’m excited to see her, I came home because I want to help the typhoon victims’,” sabi ni Romulo-Puyat sa isang virtual interview ngayong Lunes.

“Meron din nagsabi na, ‘I want to build homes for the typhoon victims.’ I saw a family from Bulgaria, they wanted to vlog... A lot were coming here because they wanted to come here for business,” ani kalihim.

“I hope tuloy-tuloy na ito, ‘wag sana magkaroon ng bagong variant of concern, but of course nobody can predict that. That’s the only thing I can see na will stop everything, if there’s a new variant of concern identified by the WHO (World Health Organization),” saad pa ng opisyal.

“Without it tuloy-tuloy na ito. We’re vaccinated, we’re getting our booster shots.” Ayon sa opisyal, ang ahensiya ay nakapagbakuna na kontra-COVID-19 ng 92 porsiyento ng mga tourism workers sa buong bansa habang ilang tourist destinations gaya ng Boracay, Baguio City ay may 100% vaccination rate na at sinimulan na ring mag-administer ng booster shots.

“Mas masaya sila sa bakuna kesa sa ayuda. This means kasi malapit na kami magbukas, this means we’re safe,” pahayag ni Romulo-Puyat. “Even a foreigner can get his booster shot for free. Now we have so much vaccines we’re ready to be vaccinated,” dagdag niya.

Nagpahayag naman ng kasiyahan ang DOT chief dahil sa nabuksan niyang muli ang turismo ng bansa bago siya umalis sa kanyang opisina.

“Akala ko lalakad lang ako by the beach, or promote (tourist destinations) but challenges after challenges. But ang maganda naman happy ang ending natin,” wika ni Romulo-Puyat.

1,582 tourism enterprises, nabigyan ng safety seals – DOT

ni Lolet Abania | February 10, 2022

Mahigit sa 1,500 safety seal certificates na ang nailabas ng Department of Tourism (DOT) para sa mga DOT-accredited tourism enterprises.

Sinabi ni DOT director Virgilio Maguigad, may kabuuang 1,612 tourism enterprises ang nag-apply para sa safety seals, kung saan 1,582 dito ang naaprubahan.

Aniya, may 30 aplikasyon naman ang pinoproseso pa at ini-evaluate nila.

“This particular safety seal issued by the DOT is valid up to 1 year upon which it’s linked to the accreditation. Once their accreditation expires or is due for renewal, they would have to be evaluated again,” pahayag ni Maguigad sa DOH Kapihan ngayong Huwebes.

Ayon kay Maguigad, ang National Capital Region, Region VI, at Region IV-A, ang nakapag-isyu ng may pinakamataas na bilang ng safety seals certificates na 264, 168, at 161, batay sa pagkakasunod.

Samantala, may kabuuang 317,892 o 92.51% ng mga tourism workers ang bakunado na kontra-COVID-19 sa buong bansa, kung saan target ng DOT na mabakunahan ang 349,543 manggagawa.

“NCR has the highest number of tourism workers vaccinated, followed by Region V, and Region III,” ani opisyal.

Binanggit din ni Maguigad na lahat ng tourism workers sa Baguio City, Aurora, Coron, El Nido, Puerto Princesa, San Vicente, Mandaue City, at Camiguin ay bakunado na laban sa COVID-19.

“Of course, booster shots are also on the pipeline for these tourism markers,” dagdag pa niya.

Ayon naman sa Department of the Interior and Local Government (DILG), ang DILG at ang local government units (LGUs) ay nakapag-isyu na ng kabuuang 59,139 safety seals.