Travel ban sa UK dahil sa bagong Coronavirus, 'di pa final answer - Duque

ni Lolet Abania | December 29, 2020

Nilinaw ni Department of Health (DOH) Sec. Francisco Duque III na ang naunang inanunsiyo tungkol sa travel ban sa 20 bansa na may mga naitalang kaso ng bagong Coronavirus variant ay isa lamang rekomendasyon at wala pang pinal na desisyon.

"It's a recommendation... Hintayin na lang natin 'yung sa OP (Office of the President) issuance today," sabi ni Duque sa isang phone interview.

Unang inanunsiyo ngayong Martes ng umaga nina Duque, Department of Labor (DOLE) Sec. Silvestre Bello III at ng Department of Transportation (DOTr) na palalawakin ang travel ban sa 20 bansa mula December 30, 2020 hanggang January 15, 2021 dahil sa posibleng pagkalat ng bagong Coronavirus variant sa bansa.

Samantala, sa isang news briefing, pinayuhan ni Presidential Spokesperson Harry Roque ang publiko na maghintay sa ilalabas na mga guidelines mula sa Office of the President ngayong araw.

"What I understand now is the Office of the Executive Secretary is drafting guidelines that would conform to what the President said na walang Pilipino na nais umuwi na puwedeng pigilan," ani Roque.

"My office is the only one authorized to issue any information relating to COVID so, antayin n'yo pong mag-issue tayo ng anunsiyo kung epektibo na ang travel ban sa iba pang mga bansa sa may new variants... May dahilan po kung bakit nais ni Presidente na sentral po sa opisina natin ang pag-release ng impormasyon para maiwasan ang kalituhan," dagdag ng kalihim.

Matatandaang inaprubahan ni Pangulong Rodrigo Duterte ang extension ng travel ban sa United Kingdom, kabilang ang mga transited mula sa naturang bansa ng dagdag na dalawang linggo matapos ang December 31, 2020.

21,000 trabaho, bubuksan — DOLE

ni Thea Janica Teh | December 7, 2020

Tinatayang nasa 21,000 trabaho, local at overseas, ang alok ng Department of Labor and Employment (DOLE) sa mga Filipino sa gaganapin nitong online job fair ngayong darating na linggo.

Ayon sa DOLE, naghahanap ng trabahador ang 600 domestic companies pati na rin ang 15 licensed recruitment agencies na konektado sa Bahrain, Falkland Islands, Germany, Ghana, Ivory Coast, Japan, Jordan, Kingdom of Saudi Arabia, Lebanon, Micronesia, Myanmar, New Zealand, Palau, Qatar, Singapore, Taiwan at Turks and Caicos. Ilan sa mga puwedeng pasukang trabaho rito ay factory workers, nurses, nursing aides, care workers, engineers, CAD operators, telecommunications rigging technicians, maintenance technicians, carpenters, foremen, laborers at building cleaning workers.

Bukod pa rito, naghahanap din ang ilang kumpanya ng supervisors, physical fitness coaches, cake decorators, cooks, food servers, restaurant workers, waiters, waitresses, counter service staff at service staff.

Ang online job fair na ito ay sa pakikipagtulungan sa Bureau of Local Employment and Philippine Overseas Employment Administration (POEA) na gaganapin sa Huwebes at Biyernes (Disyembre 10 & 11).

Kaya naman, para sa lahat ng gustong mag-apply, ihanda na ang digital copies ng inyong resume o curriculum vitae at iba pang application requirements tulad ng certificate of employment, diploma at transcript of record.

Samantala, umabot sa 8.7% ang unemployment rate sa Pilipinas nitong Oktubre ayon sa Philippine Statistics Authority (PSA). Ito ay katumbas ng 3.8 milyong indibidwal.

Skyway extension project, ipinatigil ng DOLE dahil sa aksidente

ni Lolet Abania | November 23, 2020

Iniutos ng Department of Labor and Employment (DOLE) ngayong Lunes ang pagpapahinto ng trabaho sa Skyway extension project upang magbigay-daan sa gagawing imbestigasyon sa nangyaring aksidente noong Sabado na ikinamatay ng isa, habang apat ang sugatan at ikinasira ng anim na sasakyan dahil sa bumagsak na steel girder.

Ayon kay DOLE Spokesman Rolly Francia, nakasaad sa inilabas na order ng DOLE-National Capital Region ang pagpapatigil sa konstruksiyon ng buong proyekto, mula sa Susana Heights sa Muntinlupa City hanggang sa Sucat sa Parañaque.

“Ang pagpapahinto po ng construction ay ipinag-utos upang mabigyang-daan ang imbestigasyon upang malaman kung may mga violation na nagawa o na-commit sa construction site at upang alamin din ano ang hawak na lisensiya ng mga contractors at subcontractors at kung may paglabag sa labor and safety standards,” sabi ni Francia.

Inisyu ang order para sa contractor na EEI Corp. at kanilang subcontractors, kung saan inisyal lamang na sinagot nito ang gastos ng aksidente sa site na nasa Muntinlupa City.

“Both the northbound and southbound leading to Susana Heights kaya 'yun ‘yung hinihintay nating bagong order this afternoon,” sabi ni Francia.

Sinabi pa ni Francia na mananatili ang suspensiyon hanggang sa bawiin na ito ng regional office at matapos ang imbestigasyon sa insidente.

Samantala, ang extension project ay inisyal na makukumpleto sa December ngayong taon, kung saan nagdagdag ng dalawang northbound lanes at tatlong southbound lanes na target sanang matapos ang proyekto sa February 2021, subali’t ipinatigil dahil sa naganap na aksidente.

Magkakaroon ito ng direct connection sa Skyway 1, 2, at 3, at magagamit ng mga motorista mula sa south patungong Ninoy Aquino International Airport (NAIA), Makati, Manila, San Juan, Quezon City at sa North Luzon Expressway (NLEx) na hindi na dadaan pa sa Alabang at EDSA.