DOLE, may P2 bilyon pang pondo pang-ayuda para sa mga manggagawa

ni Jasmin Joy Evangelista | October 16, 2021

Nasa P2-bilyon na budget pa ang natitirra sa Department of Labor and Employement (DOLE) na tulong para sa mga informal workers na apektado ng COVID-19 pandemic.

Ayon kay DOLE Secretary Silvestre Bello III, balak nilang ipamahagi ang nasabing halaga sa mga kwalipikadong benepisaryo.

Aniya, umabot sa P7 billion na cash assistance ang naipamahagi na para sa 2.6 million informal workers sa bansa.

Mayroon ding P6 bilyon ang naipamigay na sa mga formal workers na naapektuhan din ng COVID-19.

Samantala, mayroon nang kabuuang P12 billion na cash aid ang naipamahaging tulong sa 725,000 overseas Filipino workers sa ilalim ng programa ng DOLE.

Financial aid para makapagbigay ng 13th month pay ang mga negosyo, hirit ng KMU

ni Jasmin Joy Evangelista | October 15, 2021

Iginiit ng isang labor group na dapat tulungan ng gobyerno ang mga small at medium enterprises na maharap ang kanilang obligasyon sa mga manggagawa.

Ayon sa labor group na Kilusang Mayo Uno, kailangang maglaan ng pamahalaan ng pondo para matulungan ang mga negosyante na maibigay pa rin ang 13th month pay ng mga manggagawa sa kabila ng pandemya.

“Hindi puwedeng excluded sa pagbabayad ang mga employers sa 13th month pay sa kabila ng epekto ng pandemya dahil sa ngayon pa lang matinding kagutuman at kakulangan na ang nadarama ng mga manggagawa," ani KMU chairperson Elmer Labog sa isang panayam.

Ayon pa sa grupo, dapat hindi loan kundi grant ang ibigay ng gobyerno sa mga negosyong nabangkarote dahil sa COVID-19 pandemic.

Kamakailan ay sinabi na ng Employers Confederation of the Philippines na mahihirapang magbayad ng 13th month pay ang mga maliliit na negosyo sa mga empleyado nito.

Gustong magbigay ng mga employer ng benepisyo para sa kanilang mga tauhan kaya't sana ay bigyan sila ng pautang na walang interes o kondisyon, dagdag ng ECOP.

Samantala, nagpaalala naman ng Department of Labor and Employment na mandatory ang 13th month pay maliban na lang kung papayag ang mga empleyado na hindi muna ito makuha dahil apektado ang negosyo sa pandemya.

600K empleyado, balik-trabaho ng Setyembre — DOLE

ni Lolet Abania | October 2, 2021

Nasa tinatayang 600,000 manggagawa ang muling nakapasok sa trabaho nitong Setyembre, ayon kay Department of Labor and Employment (DOLE) Secretary Silvestre Bello III.

Ito ang naging pahayag ni Bello matapos na i-report kamakailan ng Philippine Statistics Authority (PSA) na tumaas ang unemployment ng 3.88 milyon noong Agosto sa gitna ng ipinatutupad na mas mahigpit na lockdown para maiwasan ang pagkalat ng mas nakahahawang Delta COVID-19 variant.

“Ngayon lumuluwag na, mukhang mga 600,000 plus na napare-employ,” ani Bello sa isang interview ngayong Biyernes.

“The labor force participation bounced back for an increase of 3.375 million,” sabi ng kalihim.

“This indicates jobseekers’ confidence to enter the labor market and become economically active,” dagdag pa ni Bello.

Ang naitalang labor force participation rate, bilang ng mga indibidwal na aktibong naghahanap ng trabaho, ay lumaki ng 63.6% mas mataas kumpara sa 59.8% noong Hulyo.