8K trabaho alok sa face-to-face DOLE job fair sa gitna ng pandemya

ni Jasmin Joy Evangelista | December 4, 2021

Sa unang pagkakataon mula nang magkaroon ng pandemya ay magkakaroon ng limited face-to-face job application ang Department of Labor and Employment (DOLE).

Nasa 8,000 trabaho ang iaalok sa nationwide job fair ng sa susunod na linggo.

Para sa mga nais dumalo sa face-to-face application sa NCR, puwedeng mag-register sa jobquest.ph para malaman kung kailan ang schedule.

Kailangang magpa-schedule muna dahil kailangang kontrolin ang bilang ng mga tao sa venue.

Iba-iba rin ang schedule kada rehiyon kaya dapat alamin muna ang detalye sa mga DOLE regional office.

"Siguro at a given time, there will be 20 jobseekers na papapasukin po natin sa ating venue and then they will be allowed for about 45 minutes," ani DOLE Assistant Secretary Dominique Tutay. 

Karamihan sa 8,000 job vacancies ay sa IT at BPO, pero mayroon na ring ilang oportunidad sa agrikultura, sales at health sector. 

May job openings din sa ibang bansa para sa mga nurse, baker, auto-mechanic, household service worker at kitchen crew.

Pagpapadala ng domestic workers sa Saudi Arabia, suspendido – DOLE

ni Lolet Abania | November 28, 2021

Isinuspinde pansamantala ng Department of Labor and Employment (DOLE) ang pagpoproseso at deployment ng mga bagong hired na mga household service workers (HSWs) sa Kingdom of Saudi Arabia.

Sa ulat, ang kanilang mga deployments ay sinuspinde dahil sa nangyaring labor abuse incident, kung saan sangkot ang isang retiradong Saudi general na minamaltrato umano ang maraming overseas Filipino workers (OFWs) sa naturang teritoryo.

Ang iba’t ibang pangalan naman ng mga employer ay inilagay na rin sa employment contract ng HSWs.

Si DOLE Secretary Silvestre Bello III ang siyang nag-isyu ng nasabing memorandum habang inatasan na rin ang Philippine Overseas Labor Offices na ihinto muna ang beripikasyon ng mga newly-hired domestic workers.

Ayon pa sa report, ang domestic workers at skilled workers na nagre-renew ng contracts ay exempted sa ipinapatupad na deployment ban.

100 vaxx encorders, kailangan ng DOLE — DILG

ni Lolet Abania | November 18, 2021

Naghahanap ngayon ang Department of Labor and Employment (DOLE) ng karagdagang vaccine encoders dahil sa ang bilang ng mga indibidwal na gustong magpabakuna kontra-COVID-19 ay patuloy na dumarami, ayon sa isang opisyal ng Department of the Interior and Local Government (DILG).

Sinabi ni DILG Undersecretary Jonathan Malaya sa isang report ngayong Huwebes na kinakailangan ng mga karagdagang encoders upang mapadali ang reporting ng mga vaccination data.

Binanggit din ni Malaya sa naturang report na ang DOLE ay bukas para sa 100 slots ng mga aplikante sa National Capital Region (NCR) lamang.

Ayon pa kay Malaya, itatalaga ang mga newly-hired encoders sa mga local government units (LGUs) na mas kailangan ng assistance sa gagawing data encoding.

Matatandaang nito lamang Nobyembre, nagbabala ang DILG hinggil sa pag-iisyu nila ng show-cause order sa mga LGUs na mabibigong magsumite ng kanilang daily vaccination record.