Pagpapadala ng domestic workers sa Saudi Arabia, suspendido – DOLE

ni Lolet Abania | November 28, 2021

Isinuspinde pansamantala ng Department of Labor and Employment (DOLE) ang pagpoproseso at deployment ng mga bagong hired na mga household service workers (HSWs) sa Kingdom of Saudi Arabia.

Sa ulat, ang kanilang mga deployments ay sinuspinde dahil sa nangyaring labor abuse incident, kung saan sangkot ang isang retiradong Saudi general na minamaltrato umano ang maraming overseas Filipino workers (OFWs) sa naturang teritoryo.

Ang iba’t ibang pangalan naman ng mga employer ay inilagay na rin sa employment contract ng HSWs.

Si DOLE Secretary Silvestre Bello III ang siyang nag-isyu ng nasabing memorandum habang inatasan na rin ang Philippine Overseas Labor Offices na ihinto muna ang beripikasyon ng mga newly-hired domestic workers.

Ayon pa sa report, ang domestic workers at skilled workers na nagre-renew ng contracts ay exempted sa ipinapatupad na deployment ban.

100 vaxx encorders, kailangan ng DOLE — DILG

ni Lolet Abania | November 18, 2021

Naghahanap ngayon ang Department of Labor and Employment (DOLE) ng karagdagang vaccine encoders dahil sa ang bilang ng mga indibidwal na gustong magpabakuna kontra-COVID-19 ay patuloy na dumarami, ayon sa isang opisyal ng Department of the Interior and Local Government (DILG).

Sinabi ni DILG Undersecretary Jonathan Malaya sa isang report ngayong Huwebes na kinakailangan ng mga karagdagang encoders upang mapadali ang reporting ng mga vaccination data.

Binanggit din ni Malaya sa naturang report na ang DOLE ay bukas para sa 100 slots ng mga aplikante sa National Capital Region (NCR) lamang.

Ayon pa kay Malaya, itatalaga ang mga newly-hired encoders sa mga local government units (LGUs) na mas kailangan ng assistance sa gagawing data encoding.

Matatandaang nito lamang Nobyembre, nagbabala ang DILG hinggil sa pag-iisyu nila ng show-cause order sa mga LGUs na mabibigong magsumite ng kanilang daily vaccination record.

Entry restrictions, binawi... Pagpapadala uli ng Pinoy workers sa South Korea, oks na – DOLE

ni Lolet Abania | November 7, 2021

Sisimulan na uli ng pamahalaan ang pagde-deploy ng mga manggagawang Pilipino sa South Korea matapos na bawiin na ng naturang bansa ang kanilang entry restrictions, batay sa anunsiyo ng Department of Labor and Employment (DOLE) ngayong Linggo.

Ayon kay DOLE Secretary Silvestre Bello III, nagbigay na ng direktiba ang DOLE sa Philippine Overseas Employment Administration (POEA) na simulan na nito ang proseso ng deployment ng mga manggagawa mula sa mga Asian neighbors ng bansa.

“This is a very good news not only to our EPS (entry permit system) workers and their families, but also to the Korean employers who have been waiting for our workers to return,” ani Bello sa isang emailed statement.

Ginawa ni Bello ang pahayag matapos na ang Ministry of Employment and Labor (MOEL) ng Korea ay ianunsiyo nitong Biyernes na papayagan na nila ang pagpasok ng mga workers sa ilalim ng kanilang EPS na magmumula sa ibang mga bansa kabilang na rito ang Pilipinas.

Ang tinatawag na entry of workers sa ilalim ng EPS ay inaasahang magsisimula bago matapos ang Nobyembre, kung saang libu-libong manggagawang Pinoy ang naghihintay ng kanilang deployment noon pang nakaraang taon.

Base sa itinakdang MOEL directive, ang mga manggagawa ay subject sa pre-entry measures gaya ng full vaccination, at dapat mayroong negative RT-PCR test result.

Gayundin, kailangang nagsagawa ng post-entry measures tulad ng mandatory quarantine at RT-PCR testing.

Para sa kanilang bahagi, ayon sa Korean Embassy in the Philippines, hinihintay naman nila ang itatakdang guidelines mula sa South Korean government para sa issuance ng E9 visas sa mga Filipino EPS.

Ayon pa kay Bello, inatasan na rin ng DOLE ang POEA na makipag-meeting sa mga Korean officials upang talakayin ang mga kinakailangang requirements at procedures para sa entry at re-entry ng Pinoy EPS workers sa Korea.

Ang Pilipinas ay nagde-deploy ng mga Filipino workers sa Korea sa ilalim ng tinatawag na government-to-government cooperation agreement simula noong 2004, subalit nasuspinde ang deployment ng mga Pinoy simula pa noong Hunyo 2020 sa gitna ng COVID-19 pandemic.