Bebot na naka-2-pc sumasayaw.. 'Live show' sa NBI conference, buking

ni Mai Ancheta | July 7, 2023

Paiimbestigahan ng Department of Justice (DOJ) ang viral video kung saan may babaeng nagsasayaw ng "sexy dance" bilang intermission number sa command conference ng National Bureau of Investigation (NBI) sa isang hotel.

Ayon kay Justice Secretary Crispin Remulla, hindi magandang tingnan sa mata ng publiko ang mga ganitong aksyon kaya dapat lamang na maimbestigahan ito.

“Definitely, we do not like this to happen, no. We will investigate it also,” ani Remulla.

Walang puwang aniya sa bansa ang mga ganitong asal at aksyon kaya walang sasantuhin kung sino man ang may pakana nito.

"These are the forms of misbehavior that we don’t need in the country,” dagdag ni Remulla.

Batay sa viral video, makikita ang isang babae na nakasuot umano ng panty at crop top habang sinasayawan ang mga naroon sa event.

Sa ngayon, wala pang pahayag ang NBI hinggil sa naturang isyu.

Remulla, inoperahan sa puso

ni Madel Moratillo | July 7, 2023

Matapos ang 2 linggong wellness leave, balik-trabaho na kahapon si Justice Secretary Jesus Crispin Remulla.

Sa pulong balitaan, kinumpirma ni Remulla na sumailalim siya sa heart bypass procedure matapos may nakitang bara sa kanyang puso sa ginawang medical check-up.

Maayos naman aniya ang kanyang recovery pero kailangan pa niyang sumailalim sa physical therapy.

Pero dahil sa therapy, hindi muna araw-araw makakapasok nang pisikal sa trabaho si Remulla pero puwede naman aniyang mag-online.

Pagtiyak ng kalihim, hindi apektado ang operasyon ng kagawaran kahit wala siya sa DOJ.

Binigyang-diin din ni Remulla na hindi siya magbibitiw sa posisyon.

Hangga't naniniwala pa aniya si Pangulong Ferdinand Marcos, Jr. sa kanyang kakayahan ay patuloy niyang pamumunuan ang DOJ.

"I serve at the pleasure of the President and I will continue to discharge my functions as long as the President believes in my capability to lead the department," pahayag ni Remulla.

Alam din naman aniya ni P-BBM ang kanyang kondisyon at natuwa aniya ito nang magdesisyon siyang sumailalim sa heart surgery.

Nangha-harass ng kliyente.. 3 lending companies, kinasuhan sa DOJ

ni Mai Ancheta | June 21, 2023

Nagsampa ng kasong kriminal ang Securities and Exchange Commission (SEC) sa Department of Justice (DOJ) laban sa mga kumpanyang nangha-harass at namamahiya ng mga indibidwal na mayroong pagkakautang sa kanila.

Nagtungo sa DOJ nitong Martes si Oliver Leonardo, Director ng SEC para magsampa ng kaso laban sa tatlong lending companies, isang financing corporation at dalawang business process outsourcing na umano'y sabit sa pamamahiya, pananakot at pangha-harass sa kanilang mga kliyente.

Tinukoy ni Leonardo ang mga kumpanyang sinampahan ng reklamo ay FESL Lending Investor Corp.; FESL Business Process Outsourcing Services; Realm Shifters Business Process Outsourcing Services; U-PESO.PH Lending Corp.; Philippine Microdot Financing Corp.; at Armorak Lending Inc. na nag-o-operate sa ilalim ng "Ayuda's at Weloan".

Sinabi ng SEC Official na 28 tauhan ng mga nabanggit na kumpanya ang ipinagharap ng reklamo kabilang na ang ilang Chinese nationals na may-ari at nagpapatakbo ng nabanggit na negosyo.

Nakitaan aniya ng SEC ang mga respondents ng paglabag sa Lending Company Regulation Act, at Financial Products and Services Consumer Protection Act.

Binigyang-diin ni Leonardo na mahigpit na ipinagbabawal sa batas ang anumang uri ng pambabastos, pamamahiya, paglapastangan sa karapatan ng mga umuutang, at pagpapakalat ng mga contact details.

Mahaharap aniya sa multang P2 milyon at kulong na aabot sa limang taon ang mga mapapatunayang guilty sa nabanggit na paglabag.