DND OIC Faustino, positive sa COVID-19

ni Lolet Abania | June 30, 2022

Nagpositibo si incoming Department of National Defense (DND) officer-in-charge Jose Faustino Jr. sa test sa COVID-19.

Sa isang statement ng DND ngayong Huwebes, si Faustino ay asymptomatic at kasalukuyang sumasailalim sa isolation.

Pansamantala naman niyang isasagawa ang mga tungkulin doon, habang magre-report physically sa trabaho matapos ang kanyang prescribed quarantine period.

Ayon sa DND, si Faustino na isang retired Armed Forces of the Philippines (AFP) general, ay tinamaan ng coronavirus matapos na magkaroon ng close contact sa isang COVID-positive na indibidwal sa isa sa mga naging engagements niya bago ang kanyang pag-upo sa puwesto ngayong Huwebes.

Sinabi pa ng DND, nagsasagawa na ng contact tracing sa lahat ng nakasalamuha niya. Isasagawa naman virtually ang transition ceremony para kay Faustino sa Biyernes, Hulyo 1.

Pasilidad ng National Defense, sumabog… 2 patay, 2 sugatan

ni Lolet Abania | May 27, 2021

Dalawang kawani ang patay habang dalawa naman ang sugatan matapos ang pagsabog na naganap sa isang primer composition mixing facility ng Explosives Division ng Department of National Defense (DND)-Government Arsenal (GA) sa Limay, Bataan nitong Miyerkules.

Kinilala ni GA Director Arnel Rafael Depakakibo ang mga nasawi na sina Ricardo Solomon, 40, at Marvin Tatel, 38.

Ang dalawa namang nasugatan na duty din nang oras na iyon ay sina Macreldo Rodriguez, 57, at Allan Wisco, 36.

Sa inisyal na imbestigasyon, naganap ang pagsabog habang inihahanda ng mga biktima ang priming composition para sa mga bala ng caliber .45.

Ayon kay Depakakibo, nagsasagawa na ang GA ng hiwalay na imbestigasyon sa naging sanhi ng pagsabog, at isusumite nila ang buong report sa DND.

“Meanwhile, we are looking after the welfare of the families of the victims and ensuring that the two other affected personnel are receiving the appropriate medical attention,” ani Depakakibo.

Iniutos na rin ni Police Regional Office 3 director Police Brigadier General Valeriano na magsagawa ng hiwalay na pagsisiyasat sa naging dahilan at pinagmulan ng pagsabog.

Ayon naman sa Bataan Provincial Police Office director na si Police Colonel Joel Tampi, bandang alas-10:45 ng umaga kahapon nang makarinig sila ng pagsabog sa Bldg. 27 ng DND Government Arsenal.

Isang bahagi ng gusali at iba pang mga makina ang napinsala dahil sa pagsabog.

2 attack helicopters mula Turkey, darating na sa ‘Pinas — DND

ni Ronalyn Seminiano Reonico | May 25, 2021

Darating na ang first batch ng T-129 attack helicopters na binili ng Pilipinas sa Turkey sa Setyembre, ayon sa Department of National Defense (DND).

Pahayag ni DND Spokesperson Arsenio Andolong, “Based on latest developments, we are expecting the first two units of T-129 Attack Helicopters for the Philippine Air Force to be delivered this September.”

Aniya pa, anim na T-129 helicopters mula sa Turkish Aerospace Industries ang binili ng Pilipinas. Inaasahan namang darating sa bansa ang 2 pang helicopters sa February, 2022 at ang iba pa ay sa February, 2023.