19 may COVID-19, PTV stop!

ni Lolet Abania | March 17, 2021

Nakapagtala ang People's Television Network (PTV) ng kabuuang 19 active cases ng COVID-19 ngayong Miyerkules, ayon sa Presidential Communications Operations Office (PCOO).

Mula sa dating 23 cases, naging 19 na aktibong kaso na lamang ng COVID-19 habang 84 na ang nakarekober sa nasabing istasyon at 2 ang namatay.

Una nang inanunsiyo ng PTV na hindi muna sila eere ng March 17 at magbabalik sa March 18, habang ang pagsasagawa ng regular na flagship program na Laging Handa Public Briefing at Ulat ng Bayan ay babalik on air sa Lunes, March 22.

Ito ay para sumailalim ang istasyon sa extensive disinfection dahil sa pagtaas ng COVID-19 cases. Samantala, lima ang aktibong kaso sa PCOO habang tig-isa naman ang RTVM, Philippine Information Agency, News and Information Bureau, at Bureau of Broadcasting Service.

Nag-abiso na rin ang government radio station na Radyo Pilipinas na itinigil muna nila ang operasyon simula alas-3:00 ng hapon kanina habang muli silang eere bukas nang alas-6:00 ng umaga. Ito ay upang magsagawa rin ng disinfection sa announcer booth at master control room ng kanilang istasyon.

MRT-3, palpak ang disinfection, mga empleyado, kakastiguhin

ni Mary Gutierrez Almirañez | March 14, 2021

Isinailalim sa ‘disciplinary actions’ ang ilang empleyado ng Metro Rail Transit Line 3 (MRT-3) matapos lumabas sa internet ang video kung saan makikitang minamadali at hindi inaayos ng mga ito ang pagdi-disinfect ng tren, ayon sa pahayag ng Department of Transportation (DOTr) ngayong araw, Marso 14.

Anila, "We are assuring the riding public that matters have been taken to prevent a repeat of that unfortunate incident and that the personnel involved are now facing disciplinary action."

Nauna nang iniulat na nagpositibo sa UK variant ng COVID-19 ang ina ng isang empleyado sa MRT-3 na nagdulot ng pagkabahala sa mga biyahero at buong administrasyon ng MRT-3.

Sa ngayon ay sinisigurado ng Department of Transportation ang malinis at maayos na pagdi-disinfect sa lahat ng tren at iba pang pasilidad sa bawat istasyon upang maiwasan ang pagkalat ng virus.