Listahan ng mga ‘di bakunadong residente, isumite ng mga barangay – DILG

ni Lolet Abania | January 12, 2022

Iniutos na ng Department of the Interior and Local Government (DILG) sa lahat ng barangay ng lokal na pamahalaan na magsumite na ng listahan ng mga hindi pa bakunadong residente kontra-COVID-19, ayon kay spokesperson Undersecretary Jonathan Malaya.

Sa Laging Handa public briefing ngayong Miyerkules, sinabi ni Malaya na si DILG Secretary Eduardo Año ay nag-isyu ng order para sa implementasyon ng paghihigpit sa galaw ng mga indibidwal na hindi pa nababakunahan laban sa COVID-19.

“Nagpalabas po si Secretary Año ng memorandum circular para magsagawa ang lahat ng mga barangay sa buong bansa para malaman ‘yung hindi pa nagpapabakuna sa barangay,” ani Malaya.

Ayon kay Malaya, ito ay bilang pagtugon sa pahayag ni Pangulong Rodrigo Duterte na higpitan ang galaw ng mga hindi pa nababakunahang indibidwal.

Kapag ang inventory ay available na, aniya ang mga barangay ay maaari nang ipatupad ang restrictions sa mga unvaccinated individuals sa pamamagitan ng isang ordinance.

Sa hiwalay na interview kay Malaya, sinabi nitong ang inventory ay ipapasa kada buwan sa DILG.

Sa Metro Manila, ayon kay Malaya ang Pasig, Makati, at Navotas na lamang ang hindi pa nakakapagpasa ng isang ordinance hinggil sa restriksyon. Gayunman aniya, sa mga susunod na araw, lahat sila ay makukumpleto na ring maipasa ang kanilang ordinansa.

Sa ibang lugar, sinabi ni Malaya na inaasahan na niyang makapagpapasa na rin ang mga LGUs ng katulad na mga ordinances, habang ang League of the Provinces of the Philippines (LPP) ay nag-isyu na ng isang resolusyon, kung saan hinihimok ang kanilang mga miyembro na isagawa na ito.

Pag-aresto, “last resort” sa unvaccinated kontra-COVID-19 – DILG

ni Lolet Abania | January 8, 2022

Binigyang-linaw ng Department of the Interior and Local Government (DILG) ngayong Sabado na ang pag-aresto ng mga opisyal ng barangay sa mga hindi bakunadong indibidwal kontra-COVID-19 na pinipilit na lumabas ng tirahan ay gagawin bilang “last resort” lamang.

Ayon kay DILG Secretary Eduardo Año, ang mga barangay officials na susunod sa ibinabang order ni Pangulong Rodrigo Duterte hinggil sa paghihigpit sa galaw ng mga unvaccinated individuals ay isasagawa aniya, “within the bounds of the law.”

Una nang iniutos ni Pangulong Duterte nitong Huwebes sa mga barangay officials na i-direct ang mga indibidwal na hindi pa nabakunahan laban sa COVID-19 na manatili sa bahay sa gitna ng pagtaas ng coronavirus infections na pinaniniwalaang dulot ng Omicron variant.

Sinabi ni Año na ang mga barangay chairman ay maaaring arestuhin ang mga unvaccinated individuals kung tatanggi ang mga ito na makipag-cooperate sa kanila.

“The President is merely exercising his authority as chief executive under the public health emergency.

He was very clear in his directive that an arrest will only be a last resort,” ani Año sa isang statement.

“Pakiusapan muna na pumirmi sa bahay. Barangay officials may only arrest the unvaccinated individuals who refuse to cooperate and who are leaving the homes for non-essential purposes,” dagdag ng opisyal.

Payo naman ni Año sa publiko na iprisinta agad ang kanilang mga vaccination cards sa mga barangay officials at police officers bilang katunayan ng kanilang vaccination.

Samantala, ayon kay DILG Undersecretary Jonathan Malaya, kailangan na ang mga barangay officials ay guided ng mga ordinances na ipinasa ng kani-kanilang local government units (LGUs).

Binanggit ni Malaya na pitong LGUs sa Metro Manila ang nag-aprub ng mga ordinansa ng paghihigpit sa mga galaw ng mga hindi bakunadong indibidwal.

Kabilang sa mga nasabing ordinances ay ang Caloocan City Ordinance No. 0959, Quezon City Ordinance No. 3076, San Juan City Ordinance No. 2022-1, Valenzuela City Ordinance No. 976, Pateros City Ordinance No. 2022-01, Las Piñas City 02-2022, at Taguig City No. 62.

“The other LGUs in Metro Manila are currently in the process of deliberating their respective ordinances which should pass next week,” sabi ni Malaya.

Una nang inaprubahan ng Metro Manila Council (MMC), kabilang dito ang 17 alkalde, na ang mga unvaccinated residents sa National Capital Region (NCR) ay inaatasan na manatili sa bahay maliban kung kukuha at bibili ng mga essential goods at services habang ang NCR ay nasa ilalim ng Alert Level 3.

“We are doing this to protect the unvaccinated themselves because they are prone to critical illness and hospitalization and we need to protect our health care system from being overwhelmed with the exponential rise of coronavirus cases because of the Omicron variant,” sabi ni Malaya.

P20K-P30K multa at kulong — DILG... Paggamit ng ilegal na paputok, bawal

ni Lolet Abania | December 28, 2021

Naglabas ng direktiba ang Department of the Interior and Local Government (DILG) ngayong Martes sa lahat ng local government units (LGUs) at mga ahensiya ng gobyerno na gumawa ng aksiyon laban sa paggamit ng ilegal na mga firecrackers o paputok at indiscriminate firing para sa nalalapit na selebrasyon ng Bagong Taon.

Sa isang statement, sinabi ni DILG Secretary Eduardo Año na dapat tiyakin ng Philippine National Police (PNP), Bureau of Fire Protection (BFP), at LGUs na ang publiko ay sumusunod hinggil sa panuntunan na ipinatutupad sa mga paputok.

“Inaatasan ko ang PNP na doblehin ang pagmomonitor at pag-iinspeksyon para siguruhing hindi kakalat sa merkado at walang gagamit o madidisgrasya sa ilegal na paputok,” giit ni Año.

Ayon kay Año, ang PNP at LGUs, ang may responsibilidad na magpatupad ng mga national at local policies tungkol sa mga paputok upang maiwasan ang anumang disgrasya at mga insidente ng sunog.

Inatasan na rin ng kalihim ang PNP na arestuhin ang sinumang lalabag sa regulasyon sa mga firecrackers. May multang P20,000 hanggang P30,000, anim na buwan hanggang isang taon na pagkakulong, kanselasyon ng lisensiya at business permit, at pagkumpiska sa mga inventory stocks ang kanilang ipapatupad laban sa mga violators.

Nagbabala rin si Año laban sa paggamit ng mga firearms o baril para salubungin ang Bagong Taon.

“The DILG will not tolerate the use of firearms in welcoming the New Year. We will apply the full force of the law against those that will fire their firearms during the New Year.

Let’s welcome the New Year with clean hands and clean hearts,” sabi ni Año.

Tiniyak naman ng opisyal sa publiko na papanagutin at papatawan ng kaukulang parusa ng mga awtoridad ang sinumang mahuhuling nagsagawa ng indiscriminate shooting o walang habas na pagpapaputok ng baril.

Samantala, sa isang interview kay BFP spokesperson Fire Superintendent Annalee Carbajal-Atienza, sinabi nitong nagsasagawa sila ng kampanya laban sa paggamit ng ilegal na paputok.

“Ang ating pong mga firetrucks, ating kabomberuhan ay nag-iikot sa mga barangay and doing rekorida, pag-aanunsiyo at pagpapaalala,” ani Carbajal-Atienza.

Pinayuhan naman ng opisyal ang publiko na manood na lamang ng mga fireworks display sa mga inilaang lugar na inorganisa ng kanilang LGUs.

Sa ngayon, ayon kay Carbajal-Atienza wala pang iniulat na insidente ng sunog sanhi ng mga paputok.