Ex-pulis at sundalo, scam hubs worker na — Jonvic

ni Mervin Reyes @News | October 23, 2026

Photo: Jonvic Remulla - DILG PH

Ibinunyag ni Interior and Local Government Secretary Jonvic Remulla na may mga sinibak na pulis at sundalong nagtatrabaho na sa mga scam hub, kabilang ang tatlong aktibong “micro hub” sa Metro Manila na iniimbestigahan ng mga awtoridad.

Ayon kay Remulla, bagong estratehiya ng mga scammer ang paggamit ng maliliit na bahay bilang taguan ng kanilang operasyon, sa halip na magtipon ng libu-libong tauhan sa iisanggusali.

Tinatawag na “micro hub” ang mga ito dahil nasa 10 hanggang 20 katao lamang ang kayang paglagyan ng bawat lugar.

Hindi pa tinukoy ng kalihim ang pagkakakilanlan at bilang ng mga dating pulis at sundalong hinihinalang sangkot, habang nagpapatuloy ang imbestigasyon.

Kinumpirma rin ni Remulla na mga dayuhan ang nagpapatakbo sa mga micro hub, ngunit may mga Pilipinong katuwang ang mga ito. Kabilang umano sa ginagamit na tauhan ng mga operator ang mga sinibak na pulis at sundalo.

Patuloy ang pagtugis ng mga awtoridad sa mga naturang hub kasunod ng pagsalakay sa isang hinihinalang scam hub sa Zamboanga Sibugay noong Oktubre 2.

Nagresulta ang operasyon sa pag-aresto at pagsagip sa 244 na dayuhan, karamihan ay Chinese.

Binigyang-diin ni Remulla na hindi malawakan ang operasyon ng mga micro hub at nakapokus lamang sa ilang lugar.

Mas mabigat na parusa sa pabayang gun owner — DILG

ni Jeff Tumbado @News | August 20, 2026

Photo: Sec. Jonvic Remulla - DILG

Nanawagan si Department of the Interior and Local Government (DILG) Secretary Jonvic Remulla sa Kongreso na pag-aralan ang posibilidad na amyendahan ang umiiral na batas upang mas malinaw na mapanagot ang mga may-ari ng baril kapag nagamit sa krimen ang kanilang mga armas dahil sa kapabayaan sa pag-iingat.

Ayon kay Remulla, dapat isaalang-alang ang paggawa ng panibagong batas o pagbabago sa kasalukuyang mga probisyon upang matiyak na may pananagutan ang mga gun owner na hindi maayos na nag-iingat ng kanilang mga baril.

Sa ilalim ng Republic Act No. 10591 o Comprehensive Firearms and Ammunition Regulation Act, may responsibilidad ang mga rehistradong may-ari na tiyaking ligtas at secure ang kanilang mga baril.

Gayunman, hindi awtomatikong mananagot sa krimen ang may-ari kung ginamit ng ibang tao ang kanyang lisensyadong baril.

Kailangan munang mapatunayan ang direktang partisipasyon ng may-ari o ang pagkakaroon ng kapabayaan, kabilang ang tinatawag na criminal negligence, bago siya maaaring papanagutin sa ilalim ng umiiral na batas.

Muling nabigyang-pansin ang usapin matapos makumpirma ng Bureau of Customs na isa sa mga baril na ginamit sa insidente ng pamamaril sa isang paaralan sa Zamboanga City ay kabilang sa mga armas na iniimbestigahan ng mga awtoridad.

Giit ni Remulla, hindi lamang pribadong usapin ang wastong pag-iingat ng baril dahil maaari itong maging banta sa seguridad ng publiko kapag napunta sa kamay ng ibang tao.

Dahil dito, nais ng DILG na pag-aralan ng Kongreso ang posibleng mga pagbabago sa batas upang mapalakas ang pananagutan ng mga may-ari ng baril at maiwasan ang paggamit ng mga rehistradong armas sa mga krimen.

Pagpatay sa lady cop at anak, case closed na — DILG

ni Mai Ancheta @News | February 4, 2026

File Photo: DILG

Sarado at nalutas na ang kasong pagpatay sa policewoman at anak nito na hiwalay na itinapon ang bangkay sa Bulacan at Tarlac.

Ito ang inihayag ni Department of Interior and Local Government Secretary Jonvic Remulla matapos sumuko sa mga otoridad ang pang-apat na suspek sa krimen.

Ayon kay Remulla, batay sa imbestigasyon, kakasuhan na ang mga pumatay kina Police Senior Master Sergeant Diane Mollenido at anak na si John Ysmael para panagutan ang nagawang krimen.

Tinukoy ni Remulla si Pia Katrina Panganiban bilang primary suspek kasama ang asawa nitong si Christian Panganiban na isang na-dismiss na police.

Huling nakitang buhay ang mag-inang biktima noong January 16 matapos magpaalam na pupunta sa bahay ng mga suspek para ibenta ang kanyang sasakyan at upang makumpleto ang bayad para sa bagong kotse.

Ayon kay Remulla, pinatay umano ng mga suspek ang mag-ina sa loob ng kanilang tahanan saka hiwalay na itinapon ang kanilang mga bangkay.

Sa ginawang follow-up ng mga otoridad ay nabawi sa suspek ang cellphone ng biktima at P100,000 cash at natagpuan naman sa Baguio City ang kotse nito.

Sinabi ng kalihim na isasailalim sa digital forensic test ang nabawing cellphone para sa iba pang ebidensyang makakatulong sa kaso.

Nabatid ng DILG na si Pia ay mayroong kinakaharap na reklamong estafa noong 2024 habang si Christian ay may record ng kidnapping at serious illegal detention noong 2017.