Konektado sa Clark Freeport Zone, Pampanga... South Korea, magtatayo ng ‘smart city’ sa ‘Pinas!

ni Zel Fernandez | April 23, 2022

Ibinalita ng Department of Foreign Affairs (DFA) nitong Abril 22, kahapon, na isang smart city ang itatayo ng Korea Land & Housing Corporation (LH) sa Clark Freeport Zone sa Pampanga.

Pirmado na ng government-owned Clark Development Corporation (CDC) at Korea Land & Housing Corporation (LH) ang smart city memorandum of understanding (MOU), sa pangunguna ni CDC President Manuel Gaerlan sa Philippine delegation sa signing ceremony na sinaksihan nina Philippine Embassy Economic Officer and Third Secretary Reisha Olavario at Commercial Counselor Jose Ma. Dinsay noong Abril 15, sa Songdo International Business District sa Incheon province, 30 kilometers southwest ng Seoul, South Korea.

Batay sa pinirmahang MOU, ipinahayag na ang LH ay magtatayo ng smart city na konektado sa Clark International Airport, na kalaunan ay magiging isang logistics hub na mayroong imprastruktura para sa tourism, recreation, at aviation maintenance.

Ani Gaerlan, inaasahan niya ang “technology sharing” sa pamamagitan ng MOU, partikular ang Korea communications network na gagamitin ng LH Urban Development para sa K-Smart City Development.

Hiwalay ding nakaharap ni Philippine Ambassador to South Korea, Ma. Theresa de Vega, ang mga CDC officials upang talakayin ang planong Manila-Seoul cooperation projects at investment promotion sa Clark Freeport Zone, sa hinaharap.

Ayon sa DFA, ang makabagong smart city ay gagamit umano ng artificial intelligence at malaking data para maproseso nang real-time ang mga impormasyon na kokolektahin sa pamamagitan ng mga sensors, at gagamitin naman ng mga city operators para mag-analyze ng mga datos para sa mga plano sa hinaharap.

"The Smart City MOU is a leap forward in the Philippines' shift to the 4th Industrial Revolution and a testament to the Philippines and Korea's shared ideas on prosperity in the Asia Pacific and our increased economic cooperation," pahayag ng DFA.

Walk-in sa mga embahada ng ‘Pinas at konsulado, puwede na — DFA

ni Lolet Abania | March 16, 2022

Ipagpapatuloy na ang mga walk-in transactions sa lahat ng mga embahada ng Pilipinas at mga konsulado simula Marso 21, ayon sa Department of Foreign Affairs (DFA).

Sa isang tweet ngayong Miyerkules, sinabi ni DFA Undersecretary Brigido Dulay na iniutos na ni DFA Secretary Teodoro Locsin Jr. sa lahat ng Philippine embassies at consulates sa buong mundo na magbalik na sa operasyon gaya noong panahon ng pre-pandemic.

“SFA @teddyboylocsin has ordered all our Embassies & consulates worldwide to return to normal (pre-pandemic) operations just like @DFAPHL Manila. We cannot discriminate against those slaving in PH HQ. WALK-IN transactions in all posts abroad shall RESUME on Monday, March 21st,” sabi ni Dulay.

Samantala, naglabas naman ng direktiba si Locsin hinggil sa pagtanggap ng mga refugee applications habang aniya, pinapayagan pa ang isang agreement sa Department of Justice (DOJ).

“My Department of Foreign Affairs is instructed to receive applications for refugee status while it works out an arrangement with the Department of Justice for an efficient process (to be initiated by my foreign posts) with the DOJ having the last say. Period,” pahayag ni Locsin sa isang hiwalay na tweet.

Una nang sinabi ni Locsin na ang Pilipinas ay tumanggap ng mga Afghan refugees, ilang linggo matapos na i-takeover ng Taliban ang Afghanistan noong nakaraang Agosto.

Gayunman, hindi ipinahayag ni Locsin kung ilang mga Afghans ang ginawang kanlungan ang Pilipinas.

63 Pinoy mula sa Ukraine, nasa ‘Pinas na; naghihintay na 136, safe — DFA

ni Lolet Abania | March 9, 2022

Umabot na sa 63 Filipinos na mula sa Ukraine ang nakauwi na sa bansa, ayon sa Department of Foreign Affairs (DFA) ngayong Miyerkules.

“We are happy that 199 Filipinos are already out of harm’s way. A total of 63 have arrived from Ukraine, and 136 are awaiting repatriation,” sabi ni DFA Undersecretary for Migrant Workers’ Affairs Sarah Lou Arriola sa Laging Handa briefing.

Una nang itinaas sa Alert Level 4 ng DFA nitong Lunes ang sitwasyon sa Ukraine sanhi ng tumitinding sigalot sa pagitan ng naturang bansa at Russia.

Agad ding ibinaba ng ahensiya, ang mandatory repatriation sa mga Pinoy na nasa Ukraine.

Gayunman, ayon kay Arriola, may mga Pinoy pa rin sa Ukraine ang tumatangging umuwi ng Pilipinas dahil hindi umano nila maiwan ang kanilang mga trabaho habang ang iba naman ay may mga pamilya na roon.

“Doon po talaga sa iba who refused to go back home, binigyan natin sila ng financial assistance mula sa Honorary Consulate natin sa Kyiv at ‘yung presence ng ating embahada sa Lviv. ‘Yung ating seafarers, nakikipag-ugnayan ang DFA with POEA (Philippine Overseas Employment Administration) and the local manning agencies, and we’re doing everything we can para ma-extract sila,” saad ni Arriola.

Aniya pa, nakikipag-ugnayan na rin ang ahensiya sa Department of Labor and Employment (DOLE), Overseas Workers Welfare Administration (OWWA), at Department of Social Welfare and Development (DSWD) upang agad na matulungan ang mga nagnanais na umuwing mga kababayan.

“Specially, kailangan din po nila ng stress debriefing dahil napansin po namin doon sa ibang umuwi, lalo na doon sa galing sa matindi ‘yung armed conflict, medyo meron pa rin silang war shock at medyo tulala pa ‘yung ang ating mga kababayan which is understandable,” ani Arriola.

Matatandaang ipinahayag ng DFA na may mahigit sa 300 Pinoy ang nagtatrabaho at naninirahan na sa Ukraine.