BBM at Sara, umamin.. K-12, palpak

ni Madel Moratillo | January 31, 2023

Aminado sina Pangulong Ferdinand ‘Bongbong’ Marcos, Jr. at Vice President/Education Secretary Sara Duterte na bigo ang Kto12 Program na matupad ang layunin ng pagbuo rito.

“We have failed them. We have to admit that we have failed our children. And let us not keep failing them anymore. Otherwise, we will not allow them to become the great Filipinos that we know they can be,” pahayag ni Marcos.

Ayon naman kay Duterte, sa pamamagitan ng K-12, target sana ng pamahalaan na pagka-graduate ng estudyante ay ready na ito for employment. Pero sa kanyang Basic Education Report 2023, sinabi ni VP Sara na batay sa ginawa nilang assessment,

mababa ang bilang ng mga nagtapos dito na nakahanap ng trabaho.

Katunayan, sa pag-aaral aniya ng Bureau of Curriculum Development sa mga nagtapos ng Senior High School, 83% ang kumuha pa ng higher education para may siguradong trabaho.

Habang 10% lang ng nagtapos ng senior high ang nakapasok ng trabaho.

Nakita rin aniya nilang bigo ang mga guro na matugunan ang 21st-century skills. Pero hindi naman daw ito kasalanan ng mga guro dahil ang naging problema ay sa sistema.

Dahil dito, rerebisahin aniya nila ang curriculum ng Kto12 Program at babawasan ang ilang subject.

“We will reduce the number of learning areas in K to 3 from 7 to 5 to focus on foundational skills in literacy and numeracy in the early grades, particularly among

disadvantaged students. We will strengthen our literacy and numeracy programs,” pahayag ni Duterte.

Palalakasin din aniya nila ang Reading, Science and Technology, at Math programs. Tiniyak din nito ang suporta para mapataas ang kanilang kapasidad at kakayahan ng mga guro.

Kabilang aniya rito ang pagbibigay ng graduate degree scholarship programs at certificate programs para sa mga guro.

Tiniyak din niya na aayusin nila ang pamamahagi ng workload ng mga guro at bayad kapag overloaded na ang mga ito ng trabaho.

Kasama rin sa plano ng DepEd ang pag-extend sa Special Hardship Allowances para sa mga guro, pagbibigay ng libreng annual physical examination at libreng legal assistance.

Samantala, naglaan na aniya ang DepEd ng P15.6 bilyong pondo para sa pagpapatayo ng mga bagong klasrum. Para masolusyunan ang mga isyu na ito, isinulong ng DepEd ang “MATATAG” education agenda.

Tiniyak din ni VP Sara na magkakaroon ng kuryente ang lahat ng paaralan sa bansa lalo ang nasa mga malayong lugar pagtatayo ng library hubs sa division offices ng DepEd.

Dahilan ng non-stop krimen sa iskul — DepEd.. Mababang suweldo!

ni Madel Moratillo | January 29, 2023

Aminado ang Department of Education (DepEd) na kulang ng guidance counselors sa mga paaralan sa bansa.

Pagtiyak ni DepEd Spokesperson Michael Poa, agad nilang aayusin ang problema. Hirap kasi aniya ang DepEd na makakuha ng guidance counselors na tutugon sa psychosocial

needs ng mga estudyante.

Mas mababa kasi aniya ang suweldo at wala ring career progression. Aniya, malaking tulong ang guidance counselor para matugunan ang mental health needs ng mga mag-aaral.

Una rito, ilang karahasan sa paaralan ang naitala nitong mga nakalipas na linggo.

Kabilang dito ang naganap sa Culiat High School sa Quezon City, kung saan isang 13-anyos na estudyante ang sinaksak at napatay ng kanyang 15-anyos na kaklase sa

loob mismo ng kanilang eskuwelahan.

100% face-to-face classes sa Nobyembre — P-BBM

ni Lolet Abania | July 5, 2022

Pinag-iisipan na ng Department of Education (DepEd) na simulan ang face-to-face classes sa ilang mga paaralan sa Setyembre bago magsagawa ng 100% in-person schooling sa Nobyembre, ayon kay Pangulong Marcos Jr. ngayong Martes.

Ito ang inanunsiyo ni Pangulong Marcos matapos ang unang Cabinet meeting sa ilalim ng kanyang administrasyon.

“There are some things immediately accessible we can start doing something about it already,” pahayag ni Pangulong Marcos sa isang news briefing matapos ang Cabinet meeting.

“The first thing that is an example of that is Inday Sara’s announcement that we have a plan for full face-to-face by November of this year,” dagdag ng Pangulo, na ang tinutukoy niya ay si Vice President Sara Duterte na DepEd secretary.

Ayon sa Pangulo, ang vaccination laban sa COVID-19 at iba pang mga isyu ang kanilang mauunang tatalakayin para sa planong face-to-face classes sa lahat ng elementary at high schools.

Sinabi na ng DepEd na nasa 38,000 paaralan ang handa na para sa face-to-face classes kapag ang School Year 2022–2023 ay nagsimula sa Agosto.