2 estudyante, ipinahiya raw online, titser iimbestigahan

ni Lolet Abania | Pebrero 12, 2023

Iniimbestigahan ngayon ng Department of Education (DepEd) ang umano’y pamamahiya sa dalawang high school students sa Cebu City, kung saan inakusahan ng isang guro ng pandaraya sa periodical exam.

Batay sa report ng GMA News, isang guro sa Tisa National High School ang umano’y kumuha ng isang video habang pinapagalitan niya ang mga estudyante at ipinost ito online. Isa sa mga estudyante ay itinangging nandaya siya sa test. At dahil sa takot na ma-bully, nagpasya na lamang itong manatili sa bahay.

“Hindi mabuti ang kanyang ginawa, sir. Ipinahiya kami, sir. Hindi ako nakatulog,” pahayag ng estudyante na itinago sa pangalang “Dodong.” Sinabi pa ng estudyante na wala siyang kamalay-malay na may kumukuha na pala ng video sa insidente.

“Nalungkot ako, nagalit kung bakit in-upload niya, na pwede namang ipatawag niya ang aming mga magulang,” ani “Dodong”. Sang-ayon din ang ina ng estudyante na mas maganda sana aniya, kung ang mga magulang ng mga bata ay ipinatawag sa paaralan.

Sinabi pa ng ina ng bata na makikipag-usap naman sila at susunod sa magiging desisyon ng school principal patungkol sa naturang usapin. Pinuntahan at hiningan na rin ng komento ng GMA News ang naturang paaralan kaugnay dito, subalit sinabi ng pamunuan ng eskwelahan na ang gurong sangkot ay hindi pa nagpakita o pumasok nitong huling dalawang araw.

Gayunman, nakipag-usap din ang principal ng paaralan na si Roy Genares na ayon dito, “Gusto lang sana niyang ipaalam na bad talaga ang cheating. Ngunit mali pa rin ang paraan na ginagamit ni teacher.”

Ipinahayag naman ni DepEd-7 Regional Director Dr. Salustiano Jimenez, “I-observe lang natin ang mga policy ng DepEd, ang batas na nag-protect the learners in the child protection policy.” Giit pa ni Jimenez, “the professionalism policies recently issued by Vice President and Education Secretary Sara Duterte needed to be followed as well.”

P150K each binili, P20K lang pala.. DepEd, buking sa overpriced camera

ni Madel Moratillo | February 3, 2023

Pakkatapos ng isyu sa overpriced laptop, overpriced camera naman ang kinakaharap ngayon ng Department of Education (DepED).

Una rito, isang post sa Facebook ng isang photographer ang nakatawag ng pansin matapos nitong i-share ang larawan ng Canon DSLR camera na binili umano ng DepEd sa halagang P155,929.

Ang halaga umano ng nasabing camera sa online shop ay nasa halagang P20K hanggang P30K lamang.

Tiniyak naman ni DepEd spokesperson Michael Poa na iimbestigahan nila ang isyu. Pero sa kanilang inisyal na pagsisiyasat, ang mga nasabing camera ay binili umano noon pang 2019.

Ang nasa larawan aniya ay entry level camera at nang magtanong siya sa Public Affairs Service kaugnay sa ginagamit na camera ng DepEd, lahat naman umano ay Mark 4. Ibig sabihin hindi entry level ang mga ito. Makaaasa aniya ang publiko na iimbestigahan itong mabuti ng kagawaran.

BBM at Sara, umamin.. K-12, palpak

ni Madel Moratillo | January 31, 2023

Aminado sina Pangulong Ferdinand ‘Bongbong’ Marcos, Jr. at Vice President/Education Secretary Sara Duterte na bigo ang Kto12 Program na matupad ang layunin ng pagbuo rito.

“We have failed them. We have to admit that we have failed our children. And let us not keep failing them anymore. Otherwise, we will not allow them to become the great Filipinos that we know they can be,” pahayag ni Marcos.

Ayon naman kay Duterte, sa pamamagitan ng K-12, target sana ng pamahalaan na pagka-graduate ng estudyante ay ready na ito for employment. Pero sa kanyang Basic Education Report 2023, sinabi ni VP Sara na batay sa ginawa nilang assessment,

mababa ang bilang ng mga nagtapos dito na nakahanap ng trabaho.

Katunayan, sa pag-aaral aniya ng Bureau of Curriculum Development sa mga nagtapos ng Senior High School, 83% ang kumuha pa ng higher education para may siguradong trabaho.

Habang 10% lang ng nagtapos ng senior high ang nakapasok ng trabaho.

Nakita rin aniya nilang bigo ang mga guro na matugunan ang 21st-century skills. Pero hindi naman daw ito kasalanan ng mga guro dahil ang naging problema ay sa sistema.

Dahil dito, rerebisahin aniya nila ang curriculum ng Kto12 Program at babawasan ang ilang subject.

“We will reduce the number of learning areas in K to 3 from 7 to 5 to focus on foundational skills in literacy and numeracy in the early grades, particularly among

disadvantaged students. We will strengthen our literacy and numeracy programs,” pahayag ni Duterte.

Palalakasin din aniya nila ang Reading, Science and Technology, at Math programs. Tiniyak din nito ang suporta para mapataas ang kanilang kapasidad at kakayahan ng mga guro.

Kabilang aniya rito ang pagbibigay ng graduate degree scholarship programs at certificate programs para sa mga guro.

Tiniyak din niya na aayusin nila ang pamamahagi ng workload ng mga guro at bayad kapag overloaded na ang mga ito ng trabaho.

Kasama rin sa plano ng DepEd ang pag-extend sa Special Hardship Allowances para sa mga guro, pagbibigay ng libreng annual physical examination at libreng legal assistance.

Samantala, naglaan na aniya ang DepEd ng P15.6 bilyong pondo para sa pagpapatayo ng mga bagong klasrum. Para masolusyunan ang mga isyu na ito, isinulong ng DepEd ang “MATATAG” education agenda.

Tiniyak din ni VP Sara na magkakaroon ng kuryente ang lahat ng paaralan sa bansa lalo ang nasa mga malayong lugar pagtatayo ng library hubs sa division offices ng DepEd.