Pagbubukas ng klase para sa SY 2022-2023 sa Agosto 22 na – DepEd

ni Lolet Abania | April 19, 2022

Iminungkahi na ng Department of Education (DepEd) na gawin ang pagbubukas ng klase para sa School Year 2022-2023 sa Agosto 22, 2022, habang isasagawa ang blended learning na may kasamang mas maraming face-to-face classes.

Sa isang press conference ngayong Martes, iprinisinta ni DepEd Undersecretary Diosdado San Antonio ang plano ng ahensiya na school calendar.

Ayon sa DepEd, may 11 linggo na nakaiskedyul sa bawat quarter ng academic year.

Ang first quarter ay itinakda mula Agosto 22 hanggang Nobyembre 4, 2022; ang second quarter ay mula Nobyembre 7, 2022 hanggang Pebrero 3, 2023; ang third quarter ay mula Pebrero 13 hanggang Abril 28, 2023, at ang fourth quarter ay mula Mayo 2 hanggang Hulyo 7, 2023.

Magsisimula naman ang Christmas break sa Disyembre 19, 2022 at magpapatuloy ang mga klase sa Enero 2, 2023. Nakaiskedyul din ang mid-year break mula Pebrero 6 hanggang 10, 2023. Ang end-of-year rites ay gaganapin naman mula Hulyo 10 hanggang 14, 2023.

Sa panahon ng “summer”, ayon sa DepEd, ang remedial, enrichment, o advanced classes ay maaaring gawin mula Hulyo 17, 2023 hanggang Agosto 26, 2023.

Inaasahan naman na magsisimula ang SY 2023-2024 sa Agosto 28, 2023, ayon pa sa DepEd.

Wanted: 200 byuting teachers-broadcasters

ni Lolet Abania | September 10, 2020

Naghahanap ang Department of Education (DepED) ng 200 teachers-broadcasters upang gumawa ng mga episodes sa DepEd TV na isa sa mga paraan ng pagtuturo na ipapatupad ng ahensiya para sa distance learning.

Ayon kay DepEd Usec. Alain Pascua, nagbibigay sila ng matitinding workshops at pagsasanay para sa lahat ng nag-a-apply sa ahensiya at ilan lang dito ang nakakapasa.

Tinatayang 3,000 na ang nag-apply sa DepEd, subali’t 100 pa lamang ang pinalad at napiling mag-umpisa bilang teacher-broadcaster, kung saan nagsimula na ang mga ito na mag-shoot para sa episode ng DepEd TV.

Aminado ang ahensiya na mahirap makahanap ng magiging teacher-broadcaster dahil kahit bihasa ang mga ito at matagal nang nagtuturo ng kani-kanyang asignatura, kinakailangan na mayroong personality habang nagle-lecture sa harap ng kamera.

Sa isasagawang DepEd TV, magkakaroon ng 130 hanggang 200 episodes ng mga lectures na ipo-produce ang mga teachers-broadcasters kada isang linggo o limang episodes bawat isa sa kanila.

Gayunman, kahit mayroon nang 100 na nakapasa, nangangailangan pa ng 200 teachers-broadcasters para mapunuan ang mga episodes ng DepEd TV bago magbukas ang klase sa public schools sa October 5.

Samantala, tiniyak ni DepEd Sec. Leonor Briones na may ipatutupad ang ahensiya na alituntunin upang hindi na maulit pa ang naipalabas kamakailan na maling lecture sa telebisyon.

Enrollment sa public school, extended hanggang Nobyembre

ni Thea Janica Teh | September 9, 2020

Inanunsiyo ngayong Miyerkules ng Department of Education (DepEd) na maaari pang humabol sa enrollment ang mga estudyante sa public schools hanggang Nobyembre.

Ayon kay Education Secretary Leonor Briones, maaaring humabol ang mga estudyante sa pasukan na magsisimula sa Oktubre 5 dahil mayroong late enrollment policy.

Nakapaloob dito na papayagan pa ring makapasok ang estudyante kahit 80% lamang ang napasukan nito sa buong school year.

Dagdag pa ni Briones, bago pa magkaroon ng pandemya ay isinasagawa na ito.

Umabot na sa 24.3 milyong estudyante ngayong taon ang enrolled sa Alternative Learning System, pribado at pampublikong paaralan. Ang bilang nito ay 87.82% pa lamang ng kabuuang bilang noong 2019, ngunit nalagpasan na nito ang target ng DepEd na 80%.