Covid cases, dumami dahil sa mga pasaway… 75 K establishments, iniinspeksyon ng DOLE

ni Lolet Abania | September 2, 2021

Ipinahayag ng Department of Labor and Employment (DOLE) na tinatayang nasa 4,000 kumpanya sa bansa ang nai-report na tinamaan ng COVID-19 infection ang kanilang mga empleyado.

“Of the 48,000 establishments, 4,000 reported having COVID-19 cases,” ani DOLE Assistant Secretary Maria Teresita Cucuenco sa Laging Handa briefing ngayong Huwebes.

“Most of these are in the services, manufacturing, wholesale/retail trade, finance/insurance and construction sectors,” dagdag niya.

Ayon kay Cucuenco, plano ng DOLE na magsagawa ng physical inspection sa 75,000 establisimyento sa loob ng isang taon.

“Due to surge in COVID-19 cases in NCR Plus, we really intensified inspection for compliance with minimum public health standards as well as other health and safety standards not related to COVID-19,” sabi ng kalihim.

Sinabi pa ng opisyal na sa 75,000 target na kumpanya ng DOLE, nakapagsagawa na rin ang ahensiya ng physical inspection sa 72,000 establisimyento.

Kabilang dito ang mga lugar na nasa NCR Plus, gaya ng Metro Manila at ang mga karatig-probinsiya ng Bulacan, Laguna, Cavite at Rizal.

Ayon pa kay Cucuenco, nakapag-isyu na rin ang DOLE ng safety seal para naman sa 292 establisimyento.

“These are mostly in NCR where most of establishments are, as well as Region 4A and Region 3,” sabi ni Cucuenco.

Bakunadong OFWs, oks na sa HK — Bello

ni Ronalyn Seminiano Reonico | August 23, 2021

Maaari nang makapasok sa Hong Kong ang mga Filipino workers na nabakunahan sa Pilipinas sa susunod na linggo, ayon kay Department of Labor and Employment (DOLE) Secretary Silvestre Bello III noong Linggo.

Matatandaang kamakailan, ang mga nabakunahan lamang na OFWs sa Hong Kong ang pinapapasok sa naturang bansa at hindi tinatanggap ng kanilang pamahalaan ang mga vaccination certificates mula sa mga local government units ng Pilipinas.

Ngunit ayon sa DOLE, sa pakikipag-ugnayan ng ahensiya sa Bureau of Quarantine (BOQ) at Philippine consulate sa HK, inaprubahan na ang pagpapapasok sa mga overseas Filipino workers (OFWs) na bakunado na laban sa COVID-19 ngunit nararapat na ipakita nila ang mga valid vaccine certificates mula sa BOQ.

Ayon kay Bello, 3,000 OFWs ang nakatakdang i-deploy sa Hong Kong.

Samantala, sasailalim umano ang mga OFWs sa quarantine sa mga specified hotels na sasagutin ng kanilang mga employers.

Ayon pa sa kanya, nakikipag-ugnayan na ang pamahalaan ng HK sa mga partner hotels para sa mga iku-quarantine na OFWs.

DOLE Secretary Bello, positibo sa COVID-19

ni Lolet Abania | August 17, 2021

Nagpositibo si Department of Labor and Employment (DOLE) Secretary Silvestre Bello III sa test sa COVID-19.

Sa isang statement ng DOLE, kahit na tinamaan ng sakit ang 77-anyos na opisyal, “He is asymptomatic and remains on top of his health.”

Si Bello na fully vaccinated na ay kasalukuyang sumasailalim sa self-quarantine sa kanyang hometown sa Iligan, kung saan siya nai-test nitong weekend.

“Even while in isolation, the Secretary continues to discharge his functions,” pahayag ng DOLE.

“The Secretary wishes to thank the public for their prayers, and expresses hopes to resume leading DOLE officials in the distribution of assistance funds under its Serbisyong TUPAD (Tulong Panghanapbuhay sa Ating Disadvantaged/Displaced Workers) as soon as his quarantine period is over,” ayon pa sa ahensiya.

Ang DOLE chief ay tumatanggap ng mga bisita sa kanyang opisina habang madalas na bumibiyahe sa buong bansa upang pangunahan ang pamamahagi ng assistance para sa mga displaced at disadvantaged workers.

Ang DOLE ay mayroong assistance program para sa mga informal workers at nagbibigay ng cash aid sa mga formal workers na apektado ng pandemya ng COVID-19. Maaari ring mag-avail ng cash assistance ang mga overseas Filipino workers (OFWs) mula sa ahensiya.

Isa si Bello sa maraming public officials, kabilang din ang mga miyembro ng gabinete na tinamaan ng COVID-19.