Dagdag sa minimum wage, aprub ng NCR at Western Visayas wage boards – DOLE

ni Lolet Abania | May 14, 2022

Inanunsiyo ng Department of Labor and Employment (DOLE) ngayong Sabado na ang National Capital Region (NCR) at Western Visayas wage boards ay inaprubahan nang itaas ang minimum wage ng mga manggagawa sa naturang rehiyon.

Sa isang pahayag, sinabi ng DOLE na noong Mayo 13, 2022, nag-isyu ang Regional Tripartite Wages and Productivity Board (RTWPB)-NCR ng Wage Order No. NCR-23.

Batay sa order, P33 ang wage increase, kung saan ang bagong minimum wage rate ay P570 para sa mga manggagawa na nasa non-agriculture sector, at P533 para sa mga manggagawa na nasa agriculture sector, ayon sa DOLE.

“It is expected to protect around one million minimum wage earners in private establishments in the region from undue low pay. The increase considered the restoration of the purchasing power of minimum wage earners because of the escalating prices of basic goods, commodities, and petroleum products,” paliwanag ng DOLE.

Matatandaan na ang huling wage order para sa mga manggagawa na nasa mga pribadong establisimyento sa NCR ay naging epektibo noon pang Nobyembre 22, 2018.

Gayunman, ang inaprubahang minimum wage hike ay napakalayo sa minimum wage hike petitions na inihain ng Unity for Wage Increase Now (UWIN) noong Nobyembre 25, 2019 at Metro East Labor Federation (MELF) noong Marso 4, 2022, na kapwa humihiling ng P213 increase, at isa pang petisyon mula naman sa Solidarity of Unions in the Philippines for Empowerment and Reforms (SUPER) noong Marso 4, 2022 na may panukalang dagdag-sahod na naglalaro sa P213 hanggang P250.

Mababa rin ito kumpara sa apela ng Trade Union Congress of the Philippines’ (TUCP) para sa P470 increase sa daily minimum wage sa NCR upang maging P1,007, kung saan agad ni-reject ng RTWPB-NCR.

Una nang ipinag-utos ni DOLE Secretary Silvestre Bello III sa RTWPBs sa buong bansa na repasuhing mabuti ang minimum wages.

Ayon pa kay Bello, ang kasalukuyang P537 daily minimum wage sa NCR ay hindi na magiging sapat para matugunan ang mga pangunahing pangangailangan at bilihin gaya ng pagkain, electricity, at water bills.

Kaugnay nito, mayroong 10 petisyon ng dagdag-sahod na inihain sa anim na regional wage boards kabilang ang NCR, Regions 3, 4A, 6, 7, at 8.

Samantala, nag-isyu rin ang RTWPB-VI ng Wage Order No. RBVI-26 para sa Western Visayas.

Batay sa latest order ng Western Visayas wage board, may dagdag-sahod sa mga manggagawa na nasa non-agriculture, industrial at commercial establishments ng P55 at P110, na aabot na sa daily minimum wage sa rehiyon ng P450 at P420 para sa mga nagpapatrabaho nang mahigit 10 manggagawa at iyong nag-e-employ ng 10 o mas kaunting manggagawa, ayon sa pagkakasunod.

“In addition, the Board granted a P95 increase for workers in the agriculture sector bringing the daily minimum wage to P410,” sabi ng DOLE.

Sinabi rin ng DOLE na inaasahang ang minimum wage hike sa Western Visayas ang poprotekta sa tinatayang 214,836 minimum wage earners sa mga pribadong establisimyento sa rehiyon mula sa tinatawag na undue low pay.

“The increase considered the restoration of the purchasing power of minimum wage earners because of the escalating prices of basic goods, commodities, and petroleum products as well as to bring the minimum wage rate above the 2021 first semester poverty threshold,” pahayag ng ahensiya.

Binanggit pa ng DOLE, “Western Visayas wage board issued Wage Order No. RBVI-DW-04 which provided a wage increase of P500 bringing the new monthly minimum wage rate for domestic workers to P4,500.”

“The last Wage Order for workers in private establishments and for domestic workers in Western Visayas took effect on November 26, 2019 and May 8, 2019, respectively,” ani ahensiya.

Paliwanag pa ng DOLE, ang NCR at Western Visayas wage orders ay isusumite sa National Labor Relations Commission (NLRC) para i-review habang magiging epektibo ito 15-araw matapos mailathala sa pahayagan ng general circulation.

DOLE: Double pay para sa mga empleyadong papasok sa regular holidays

ni Jasmin Joy Evangelista | April 5, 2022

Doble dapat ang matanggap na suweldo ng mga empleyadong papasok sa araw ng regular holiday, paalala ng labor department nitong Lunes.

Sa isang advisory, sinabi ng Department of Labor and Employment (DOLE) na ang mga manggagawang papasok sa April 9 o Araw ng Kagitingan, April 14 o Huwebes Santo at April 15 o Biyernes Santo, ay dapat na makatanggap ng 200% ng kanilang regular salary para sa unang walong oras.

Kailangan din silang bayaran ng karagdagang 30% ng kanilang hourly rate para sa overtime work, at karagdagang 30% sa kanilang basic pay ng 200% kung matatapat sa kanilang rest day ang holiday.

Para sa overtime work sa regular holiday, ang mga empleyado ay kailangang bayaran ng additional 30% ng kanilang hourly rate sa naturang araw.

Para sa April 16 o Black Saturday, ang “no work, no pay” principle ay maia-apply maliban na lamang kung mayroong polisiya ang kumpanya sa pagpapasuweldo sa special day.

Ang mga magtatrabaho tuwing special day ay kailangang bayaran ng karagdagang 30% sa unang walong oras ng trabaho, at karagdagang 30% ng kanilang hourly overtime work rate.

Ang mga manggagawang magre-report sa special day sakaling matapat sa kanilang rest day ay dapat bayaran ng karagdagang 50% ng kanilang basic pay sa unang walong oras, at karagdagang 30% sa overtime.

Nauna nang inanunsiyo ng Malacañang ang April 9, 14, at April 15 bilang regular holidays, at April 16 bilang special non-working holiday.

Pinoy health workers, nakasama sa €1-B COVID care bonus ng German gov’t — DOLE

ni Lolet Abania | March 15, 2022

Nakatakdang mabenepisyuhan ang mga Filipino healthcare workers sa Germany na nagsilbi sa gitna ng COVID-19 pandemic mula sa COVID care bonus ng German government, ayon sa Department of Labor and Employment (DOLE).

Naglaan ang gobyerno ng Germany ng €1 billion para sa COVID care bonus, kung saan hahatiin equally ito sa mga nurse na nasa care homes at mga nurse sa mga ospital, ayon kay Labor Attaché Delmer Cruz ng Philippine Overseas Labor Office (POLO) sa Berlin sa kanyang report kay DOLE Secretary Silvestre Bello III.

“The initiative of Germany to reward the frontline workers including our very own for their service during the pandemic is really commendable. This will inspire all the more our healthcare workers in providing the brand of service that the Filipinos are known for even in the midst of crisis,” pahayag ni Bello.

Sinabi ng DOLE na ang mga healthcare workers na nakatalaga sa elderly care ay makatatanggap ng insentibo na naglalaro mula 60-550 Euros o P3,400-P31,000.

Kabilang sa mabebenepisyuhan nito ay mga nursing staff na nagtatrabaho sa geriatric care ng tinatayang tatlong buwan sa pagitan ng Nobyembre 1, 2020 at Hunyo 30, 2022, at iyong nananatiling employed hanggang Hunyo 30.

Ang iba pang beneficiaries ng COVID care bonus ay mga support staff, gaya ng administrators at iyong mga nasa building services, kitchen, cleaning, reception at security services, gardening at grounds maintenance, at laundry o logistics.

Ang mga trainees naman para sa elderly care, ibang empleyado, volunteers, at nakilahok sa “voluntary social year” scheme ay eligible din para makatanggap ng naturang insentibo.