10.9 K gumaling sa COVID-19 ngayong linggo

ni Thea Janica Teh | November 22, 2020

Umabot sa 10,957 ang naitala ng Department of Health (DOH) na gumaling sa Coronavirus disease ngayong linggo. Ito umano ay dahil sa pagpapatupad ng lingguhang “mass recovery” kaya naman, may kabuuan na itong 386,486.

Nakapagtala naman ng 1,968 bagong kaso ng COVID-19 sa Pilipinas ngayong Linggo at may kabuuan nang 418,818. Nasa 24,209 na lamang ang aktibong may virus ngayong Linggo dahil nakapagtala rin ng 43 namatay ngayong araw na may kabuuan nang 8,123.

Sa mga naitalang bagong kaso ng COVID-19, 107 dito ay mula sa Cavite at ang lugar na ito ang nanguna ngayong araw. Sinundan naman ito ng Quezon City sa 97 bagong kaso, Davao City sa 86, Laguna sa 84 at Quezon Province sa 77.

Ayon sa Philippine Food and Drug Administration, inaasahan na makakukuha na ng COVID-19 vaccine sa second quarter ng taong 2021.

Kaya naman, sinabi ni Vice-President Leni Robredo sa pamahalaan na simulan na ang pagpili sa kung sino ang unang mabibigyan ng COVID-19 vaccine upang mas mapadali ang proseso ng pamamahagi nito.

Samantala, sa inilabas na datos sa worldometers.info, ang Pilipinas ang ikalawa sa pinakamaraming kaso ng COVID-19 sa Southeast Asia at pang-26 sa buong mundo.

Bagong sakit sa China na brucellosis, wala pa sa 'Pinas – DOH

ni Ronalyn Seminiano Reonico | November 6, 2020

Sinigurado ng Department of Health (DOH) ngayong Biyernes na wala pang naiuulat na kaso ng bacterial disease na brucellosis sa Pilipinas matapos mabalita ang outbreak sa northwest China.

Pahayag ng DOH, “There are documented reports of cases of Brucellosis in China. The Philippines has not reported any case of Brucellosis to this date.” Ang brucellosis ay nakukuha sa pagkakaroon ng close contact sa infected animals, pagkain o pag-inom ng kontaminadong animal product at paglanghap ng airborne agents at maaaring magdulot ng lagnat, pananakit ng kasukasuan at sakit ng ulo.

Nakikipag-ugnayan din umano ang DOH sa Philippine Inter-Agency Committee on Zoonoses, Department of Agriculture Bureau of Animal Industry, at Department of Natural Resources upang ma-monitor kung mayroon nang kaso ng brucellosis sa bansa.

Saad ng DOH, “Equipped with our ASEAN Biodiaspora Virtual Center, an artificial intelligence system to monitor international cases of infectious diseases and the coordinated surveillance with other member agencies… Are in place to ensure that cases of Brucellosis do not go unreported in the country.”

Noong Huwebes, mahigit 6,000 katao sa Lanzhou, China ang nagpositibo sa naturang bacterial disease na nagmula umano sa biopharmaceutical plant na gumagawa ng vaccines noong 2019.

P20-M ibinigay ng DOH sa mga ospital sa Bicol

ni Lolet Abania | November 5, 2020

Nagkaloob ang Department of Health (DOH) ng P20 million na financial assistance sa mga ospital at mga lugar na matinding tinamaan ng Super Typhoon Rolly.

Ayon kay DOH Usec. Rosario Vergeire, nagbigay ng tulong ang ahensiya sa tatlong DOH hospitals at mga apektadong lugar at siyudad sa Bicol region.

Ang mga nakatanggap ng aid na mga ospital ng DOH ay ang mga sumusunod:

* Bicol Regional Training and Teaching Hospital sa Legazpi, Albay (P5 million)

* Bicol Medical Center sa Naga City, Camarines Sur (P5 million)

* Bicol Region General Hospital and Geriatric Medical Center sa Cabusao, Camarines Sur (P2 million) Gayundin, nagbigay ang ahensiya ng P2 million sa lalawigan ng Camarines Sur, habang ang Albay at Catanduanes ay nakatanggap naman ng P1.5 million bawat isa.

Sa Naga City, nagkaloob ang ahensiya ng P1.2 million, habang sa Camarines Norte, Masbate at Sorsogon ay mayroong P600,000 bawat isa.

Samantala, ang Bagyong Rolly ang pinakamalakas na cyclone na tumama sa bansa ngayong taon, kung saan apektado nang husto ang Luzon, nagdulot ng 20 katao na namatay, 74 nasugatan at tatlo pa ang nawawala, ayon sa pinakabagong naiulat ng National Disaster Risk Reduction and Management Council (NDRRMC) ngayong araw.