COVID-19 vaccines, babawiin sa probinsiya

ni Mary Gutierrez Almirañez | March 19, 2021

Magkakaroon ng redeployment ng COVID-19 vaccines mula sa mga probinsiya pabalik sa Metro Manila sapagkat tumigil na ang ilang local government units (LGUs) sa pagbabakuna matapos maubos ang mga bakunang nakalaan sa kanila, ayon sa pahayag ni Department of Health (DOH) Secretary Francisco Duque III ngayong umaga, Marso 19.

Aniya, “’Yung mga hindi pa nagagamit sa ibang regions, ipadala na, bawiin. Dalhin lahat sa Metro Manila, para ‘yung mga barangay health workers, 'yung mga healthcare workers doon sa quarantine and isolation facilities, mabigyan. Maghintay-hintay lang either today or tomorrow, magre-redeployment tayo.”

Paliwanag niya, babawiin ang mga ipinamahaging sobrang bakuna sa bawat probinsiya dahil mas kailangan ng Metro Manila ang proteksiyon kontra COVID-19 na silang episentro ng virus.

Tinatayang umabot na sa 640,984 ang kabuuang bilang ng naitalang kaso sa bansa at karamihan sa mga nadagdag na positibo ay na-detect sa NCR. Nananawagan na rin ang ilang alkalde para sa karagdagang suplay ng mga bakuna sa kanilang lungsod.

Ayon pa kay Quezon City Mayor Joy Belmonte, “Kung puwede sana kaming matulungan na makipag-ugnayan. Nawawala ‘yung momentum kasi payag na sila, eh. Happy na sila. Excited na nga silang magpabakuna pero wala naman tayong maibigay na bakuna. Baka naman nasasayang lang po ang ating efforts kung sobra na nating ikinakampanya ang vaccination program and yet, wala tayong maibigay sa kanila.”

Dagdag naman ni Marikina Mayor Macy Teodoro, “Hindi po puwedeng malalaking ospital lamang ang mabigyan ng bakuna kundi lahat ng medical frontliners... Mag-concentrate kung nasaan ‘yung epicenter ng Covid cases, sa ground zero dapat, para ma- contain natin 'yung spread.” Sumang-ayon naman dito si Dr. Guido David ng OCTA Research Team at aniya, dapat munang ilaan ang mga bakuna sa Metro Manila dahil hindi na biro ang sitwasyon sa bansa.

Giit niya, “Hindi na ‘to biro, hindi na ito parang ‘yung dati na ok lang tayo, chill lang tayo. Ngayon, medyo seryoso ‘yung nagiging problema natin. ‘Yun ‘yung reality. Hindi natin puwedeng i-sugarcoat ‘yan na sabihin natin na ok 'yung sitwasyon natin kasi hindi naman. Alam naman ‘yan pati ng mga doctors, alam naman ‘yan na talagang tumataas ‘yung bilang ng mga kaso sa mga ospital.” Sa ngayon ay ilang frontliners na ang nahawa sa virus at patuloy ang hawahan sa loob ng ospital dahil sa lumolobong kaso ng COVID-19 sa Metro Manila.

“Unfortunately nga ho, marami ho sa kanila, nagkakaroon na rin ho ng COVID,” saad pa ni Legal Officer at Makati City Spokesperson Atty. Arthur Camina.

‘Pinas gagawa ng sariling COVID-19 vaccines

ni Mary Gutierrez Almirañez | March 18, 2021

Nakikipagnegosasyon na ang Pilipinas sa mga international vaccine manufacturers sa posibilidad na makagawa ng sariling COVID-19 vaccines ang bansa, ayon sa pahayag ni Vaccine Czar Carlito Galvez, Jr..

Aniya, “Before we were the ones who were producing our vaccines and even donating it to other countries such as China. President Duterte is more inclined in his earlier statement to reactivate and revive that capability.”

Kaugnay nito, inihayag din ng Vietnam na inihahanda na nila ang Nanocovax COVID-19 vaccines para maging available sa ika-apat na bahagi ng 2021.

Anila, ang pagbuo ng sariling bakuna ay mainam para mas malabanan ang lumalaganap na pandemya. Sa ngayon ay Sinovac at AstraZeneca pa lamang ang mga bakunang nasa ‘Pinas kung saan tinatayang 240,297 indibidwal na ang naturukan kontra COVID-19 simula noong ika-1 ng Marso.

Health worker na naturukan ng COVID-19 vaccine, nagka-Covid, patay

ni Lolet Abania | March 17, 2021

Isang health worker na naturukan na ng COVID-19 vaccine ang nasawi noong March 15, subalit hindi ang bakuna ang dahilan ng pagkamatay nito, ayon sa mga opisyal ng Department of Health at ng Food and Drug Administration ngayong Miyerkules.

“On March 15, a death was reported in an individual who had received the COVID-19 vaccine and subsequently tested positive for COVID-19,” batay sa inilabas na statement ng DOH at FDA. Ayon sa DOH at FDA, ang national at regional committees, na siyang naatasang mag-monitor ng mga adverse effects following immunization ay nagsabing “concluded that the cause of the death was COVID-19 itself, not by the COVID-19 vaccine.”

“COVID-19 vaccines cannot cause COVID-19,” dagdag pa ng mga nasabing ahensiya. Hindi naman nagbigay ng iba pang detalye ang DOH tungkol sa namatay na health worker.

Patuloy naman ang paalala ng mga awtoridad sa publiko na sumunod sa mga health protocols gaya ng pagsusuot ng face masks, face shield at pagkakaroon ng social distancing kasabay ng isinasagawang pagbabakuna.

Hinihimok din ang mga health workers na magpabakuna kontra COVID-19 dahil sa muling pagtaas ng kaso ng mga nagpopositibo.

“Millions of people around the world have received this vaccine, and evidence continues to show that the benefit of vaccination outweighs the risk of severe disease and death caused by COVID-19,” sabi pa ng dalawang ahensiya, kung saan may kabuuang 240,297 indibidwal na ang naturukan ng unang dose ng COVID-19 vaccine.