DOH, nagbabala… Mga nagba-bike, delikado sa heat stroke

ni Lolet Abania | May 4, 2021

Nagpaalala ang Department of Health (DOH) sa publiko, partikular sa mga siklista at commuters na maging mas maingat habang kailangang magkaroon ng proteksiyon sa sarili para maiwasan ang heat stroke o heat exhaustion lalo na ngayong panahon ng tag-init.

Ayon kay DOH Director IV Dr. Beverly Ho, ang unang dapat gawin ng mga commuters ay alamin ang lagay at taya ng panahon, laging magdala ng inuming tubig at magsuot ng tama at naaayong kasuotan bago lumabas ng bahay.

Ipinaliwanag ni Ho na ang heat exhaustion ay pagkakaroon ng malamig at clammy na mga kamay, nausea, isang mabilis subalit weak na heartbeat at muscle cramps.

Sinabi ni Ho na sakaling maramdaman ang mga sintomas ng heat exhaustion, pinapayuhan ang mga cyclists at pedestrians na magpahinga muna sa malilim na lugar o may shade, uminom ng tubig at itaas-taas ang mga binti at paa para dumaloy ang dugo sa katawan.

Aniya pa, isang malubhang kondisyon naman ang heatstroke na nakararanas ng throbbing headache o matinding sakit ng ulo, sobrang panunuyot ng balat, pagsusuka at unconsciousness o pagkawala ng malay.

“Anytime you have these symptoms, the advice is really to seek [consultation]. Kailangang pumunta na po sa health facility,” ani Ho.

Hinimok naman ni Ho ang mga commuters na maging mas sensitibo sa kanilang mga katawan upang mapigilan ang heat exhaustion o stroke.

“Kung alam natin na specifically, sobrang init nu’ng araw na ‘yun, we actually will advise that the cyclist or the pedestrian will have to stop from time to time, hindi ‘yung parang pipilitin nating matapos siya in a shorter period of time,” ani Ho.

7,255 bagong kaso ng COVID-19

ni Ronalyn Seminiano Reonico | May 3, 2021

Umakyat na sa 1,062,225 ang kabuuang kaso ng COVID-19 sa bansa matapos makapagtala ang Department of Health (DOH) ng 7,255 karagdagang kaso ngayong araw.

Ayon sa DOH, 15 laboratoryo ang hindi nakapagsumite ng datos sa takdang oras.

Samantala, 69,466 pa ang aktibong kaso sa bansa kung saan 94.7% ang mild, 1.8% ang asymptomatic, 1.1 ang kritikal at 1.4% ang mayroong severe condition.

Umakyat naman sa 975,234 ang kabuuang bilang ng mga gumaling na matapos makapagtala ng 9,214 karagdagang bilang ng mga pasyenteng nakarekober sa COVID-19.

Nakapagtala rin ang DOH ng 94 karagdagang bilang ng mga pumanaw at sa kabuuan ay umabot na sa 17,525 ang death toll sa bansa.

284 K plus, nakakumpleto na ng COVID-19 vaccine

ni Ronalyn Seminiano Reonico | May 3, 2021

Umabot na sa 284,553 indibidwal sa Pilipinas ang nakakumpleto ng COVID-19 vaccination ngayong Mayo, ayon sa Department of Health (DOH).

Ayon kay Health Undersecretary Maria Rosario Vergeire, 270,785 sa mga nakakumpleto na ng bakuna ay mga health workers, 3,083 naman ang mga senior citizens at 10,685 ang mga may comorbidities.

Samantala, 1,650,318 katao naman ang nakatanggap ng first dose ng AstraZeneca o Sinovac COVID-19 vaccine kung saan 278,183 ang mga senior citizens, 275,924 ang mga may comorbidities, at 1,718 ang essential workers.

Saad pa ni Vergeire, “There were 1,094,493 frontline healthcare workers in the Philippines or 70.9% of the more than 1.5 million masterlisted [for] priority group A1 population had been vaccinated as of May 1.”

Nilinaw naman ng DOH na wala pang naiuulat sa bansa na pumanaw dahil sa COVID-19 vaccine.

Paalala naman ni Vergeire sa mga nabakunahan na, “We still advise our citizens who are vaccinated to comply still with the minimum public health protocols. Tandaan po natin, hindi po assurance na [kapag] kayo ay nabakunahan ay hindi na po kayo magkakasakit.”

Target ng pamahalaan na mabakunahan laban sa COVID-19 ang 70 million katao sa bansa ngayong taon.