Pagkalat ng MPOX, agapan

by Info @Editorial | August 28, 2024

Kinumpirma ng Department of Health (DOH) na may dalawang bagong kaso ng mpox sa bansa na kapwa taga-Metro Manila. 

Samantala, nasampulan naman ang isang club sa Quezon City matapos umano itong tumanggi na makipagtulungan sa mga contract tracer.

Kaugnay nito, target ilunsad ng DOH ang isang online consultation system para sa mga pasyenteng dinapuan ng mpox sa buong bansa.

Sa ilalim ng national action plan laban sa mpox, target ng DOH na humingi ng tulong mula sa Philippine Dermatological Society sa pag-set-up ng website kung saan maaaring kumonsulta ang suspect case o ang mga nakararanas ng mga sintomas ng sakit.

Tinitingnan din ng ahensya na hingin ang tulong ng mga eksperto mula sa PH Dermatological Society, PH Society for Microbiology and Infectious Diseases at Pediatric Infectious Diseases Society of the Philippines para gawing mas accessible ang screening, testing at referral ng mpox patients.

Patuloy naman ang paalala at babala laban sa pag-uulat ng mga hindi kumpirmadong kaso ng mpox. Marami umanong uri ng sakit sa balat na napagkakamalang mpox gaya ng chickenpox, shingles o buni. Hinihimok din ang mga lokal na pamahalaan na bago mag-isyu ng advisories kaugnay sa mpox cases, dapat na ito ay suportado ng sapat na scientific evidence para maiwasan na magdulot ito ng pangamba at kalituhan sa publiko.

Para naman sa lahat, huwag basta maniwala sa mga naririnig o nasasagap lalo na online. Tiyakin na legit ang source para ‘di mabiktima ng fake news lalo na ang magamit sa pagpapakalat nito.

DOH Sec. Ted, bigo sa CA

ni Mylene Alfonso @News | September 27, 2023

Bigong makumpirma ng Commission on Appointments (CA) ang ad interim appointment ni Department of Health Secretary Teodoro Javier 'Ted' Herbosa dahil sa kawalan ng oras.

Ito ang kinumpirma ni Senate President Juan Miguel Zubiri, chairman ng CA, subalit maaari namang talakayin ang appointment ni Herbosa kapag nagpatuloy ang sesyon ng Kongreso sa Nobyembre.

Sinabi rin ni Sen. Christopher 'Bong' Go, nanguna sa pagdinig ng CA committee, na kulang na sila sa oras para talakayin ang ad interim appointment ni Herbosa.

Dahil dito, kailangang muling italaga ni Pangulong Ferdinand Marcos, Jr., si Herbosa dahil magtatapos ang sesyon ng Kongreso sa September 30.

Sa panayam, tumanggi si Go na sabihing na-bypass o na-defer ang appointment ni Herbosa at sinabi lamang na sinuspinde ang pagdinig dahil maraming miyembro ang gustong magtanong kay Herbosa.

Samantala, nanawagan ang Alliance of Health Workers (AHW) sa CA na ibasura ang appointment ni Herbosa bilang pinuno ng DOH.

“With Herbosa in DOH for three months now as DOH appointed Secretary, we see no change. Health workers are still overworked and underpaid, the much needed and long delayed health emergency allowance is not yet provided. Health workers’ miserable situation remains,” ani Robert Mendoza, AHW national president.

Ayon sa AHW, bigo si Herbosa na idepensa ang P13.9 bilyong ibinawas sa panukalang 2024 budget sa DOH.

Binanggit ng grupo ang P10 bilyong budget cut sa 69 ospital na pinamamahalaan ng DOH, ang P1.7 bilyong bawas-pondo sa specialty hospitals at ang P2 bilyong budget cut sa Philippine General Hospital (PGH).

Kinuwestiyon din ng grupo ang P8 milyong bawas sa Philippine National Aids Council, at P148 milyon naman sa National Nutrition Council.

Pag-alis sa COVID public health emergency, oks kay P-BBM — DOH

ni Mylene Alfonso | July 5, 2023

Pormal na utos na lamang ni Pangulong Ferdinand Marcos, Jr. ang kailangan upang tuluyang alisin ang COVID-19 public health emergency.

Ayon kay Health Secretary Teodoro Herbosa, sinabi sa kanya ng Pangulo na tila inalis na ang public health emergency dahil sa pagpapagaan ng mga COVID restrictions.

"Ang sabi niya (Marcos) kasi, de facto, parang naka-lift na rin tayo di ba? Optional na ang masking 'di ba? Hindi na in-extend 'yung ano...," wika ni Herbosa sa isang panayam.

"Wala pang formal, we're still waiting for the [order], eh, de facto naman tayo, ang dami na, nagpunta ko sa mall ang dami nang 'di nagma-mask eh," sabi pa ni Herbosa.

Ayon pa sa Kalihim, kabilang sa mga marching order ng Pangulo sa kanya ay ang makarekober mula sa COVID at makabangon ang ekonomiya.

"Basically ni-reiterate ko ‘to kanina during our sectoral meeting that we now consider COVID among health care workers as similar to other illnesses like cough, colds, influenza," saad ni Herbosa.

"But we still have to protect ourselves. I think the public health warning is you still have to protect yourself if you are vulnerable – and you still need to get the vaccine if you want to be specially protected," diin pa niya.

Matatandaang sinabi ni Herbosa na irerekomenda niya sa Palasyo na alisin ang COVID-19 state of public health emergency sa bansa makaraang ideklara na rin ng World Health Organization na tapos na ang pandemya.