Pinoy abroad, puwede nang umuwi sa 'Pinas

ni Mary Gutierrez Almirañez | March 19, 2021

Pinapayagan nang makabalik sa Pilipinas ang lahat ng Pinoy na nagtrabaho, tumira at nagbakasyon sa ibang bansa, ayon sa memorandum na inilabas ng National Task Force (NTF) Against COVID-19 na pinirmahan ni NTF Chairman and Defense Secretary Delfin Lorenzana nitong Huwebes, Marso 18.

Batay sa ulat, inilabas ang panibagong memo ngayong umaga matapos ang pagpupulong na isinagawa kahapon ng Inter-Agency Task Force on the Management of Emerging Infectious Diseases (IATF-MEID) kung saan nakasaad sa Memorandum Circular No. 6, Series of 2020 na mula sa ika-22 ng Marso hanggang sa April 21 ay suspendido muna ang pagpasok ng foreign nationals sa ‘Pinas maliban na lamang sa mga sumusunod:

• mga diplomat at miyembro ng internal organization kasama ang kanilang dependents na may valid visa

• mga foreign nationals na bahagi ng medical repatriation at may endorsement mula sa DFA at OWWA

• mga foreign seafarer sa ilalim ng ‘Green Lanes’ program

• mga asawa at anak ng Pinoy na bumiyahe sa ibang bansa na may valid visa

• mga kinatawan sa emergency at humanitarian cases na aprubado ng NTF Against COVID-19

Nauna nang iniulat ang paglimita sa mahigit 1,500 na mga biyaherong puwedeng makapasok sa ‘Pinas kada araw upang makontrol ang pagkalat ng COVID-19 sa bansa.

Sa ngayon ay pinag-aaralan pa ang magiging proseso sa posibleng pagdagsa ng mga balikbayan.

Ambassador ng ‘Pinas sa Brazil na nagmaltrato ng kasambahay, sinibak na

ni Lolet Abania | March 2, 2021

Inaprubahan na ni Pangulong Rodrigo Duterte ang rekomendasyon na sibakin sa puwesto ang dating embahador ng Pilipinas sa Brazil na nahuli-cam sa pananakit sa kanyang kasambahay.

Sa naganap na televised address ni Pangulong Duterte ngayong Lunes, binanggit nitong kanselado na ang eligibility ni Marichu Mauro bilang opisyal ng pamahalaan.

Walang matatanggap na retirement benefits si Mauro kahit na siya ay isang opisyal.

Gayundin, hindi na siya maaaring humawak ng anumang posisyon sa gobyerno at hindi na papayagang kumuha ng civil service examination.

Mula noong Marso, 2016, naging kinatawan ng Pilipinas sa Brazil si Mauro at naitalaga sa serbisyo sa foreign service mula noong Pebrero, 1995.

Matatandaang noong Oktubre 2020, pinauwi ng Department of Foreign Affairs (DFA) sa bansa si Mauro matapos na lumabas sa mga report ang video ng pagmamaltrato niya sa kanyang kababayang kasambahay.

Gayunman, ayon sa DFA, unang pinauwi sa bansa ang kanyang kasambahay habang tinutulungan ito ng non-profit OFW group na Blas F. Ople Policy Center para sa legal at livelihood assistance.

Una nang tiniyak ni DFA Secretary Teodoro Locsin na tututukan nila ang kaso ni Mauro at hindi nila ito bibitawan upang maipatupad ang batas na nararapat para rito.

Mga opisyal, positive sa COVID, DFA ila-lockdown

ni Ronalyn Seminiano Reonico | January 29, 2021

Isasailalim sa lockdown ang building ng Department of Foreign Affairs (DFA) sa Pasay City matapos magpositibo sa COVID-19 ang ilang opisyal, ayon kay Secretary Teodoro Locsin, Jr.

Inanunsiyo ni Locsin ang naturang balita sa sagot niya sa tweet ni US Secretary of State Anthony Blinken kaugnay ng pinag-usapan nila tungkol sa “US-Philippine Alliance.” Saad ni Blinken, “I had a great conversation today with @teddyboylocsin. We'll continue to build upon the strong U.S.-Philippine Alliance with our shared interests, history, values, and strong people-to-people ties. #FriendsPartnersAllies.”

Tugon naman ni Locsin, “Great conversation. Will get a lot done soon. Sadly I must quarantine. I’m negative but the building and officers I met yesterday tested positive.

We’re going into lockdown ‘til Tuesday when we test again. Again thank you for the call. Please tell your President what I said.” Samantala, hindi binanggit ni Locsin kung ilang opisyal ng DFA ang nagpositibo sa COVID-19.