Balik-eskwela sa August 29 — DepEd

ni Madel Moratillo @News | August 4, 2023

Inanunsyo ng Department of Education (DepEd) na sa Agosto 29 magsisimula ang School Year 2023-2024 para sa lahat ng pampublikong paaralan sa elementarya at sekondarya.

Ito ay sa gitna ng panawagan ng iba't ibang grupo maging ng mga mambabatas na maibalik ang pagbubukas ng klase sa dating school calendar bago ang COVID-19 pandemic.

Kasunod ito ng reklamo na sobrang init sa mga classroom dahil summer season ang klase.

Bago ang pandemya, karaniwang unang linggo ng Hunyo nagbubukas ang klase habang Abril at Mayo ang bakasyon.

Para naman sa mga nasa pribadong paaralan, batay sa Republic Act No. 11480, puwedeng magdesisyon kung kailan magbubukas ng klase pero ito ay mula unang Lunes ng Hunyo at hindi lalagpas sa huling araw ng Agosto.

Dagdag-sahod sa titser, pinag-aaralan pa — DepEd

ni Madel Moratillo @News | July 12, 2023

Pinag-aaralan pa ng Department of Education (DepEd) ang panawagan para sa dagdag-sahod sa mga guro.

Gayunman, paliwanag ni DepEd spokesperson Michael Poa, hindi puwedeng sila lang ang magdesisyon sa wage hike.

Nabatid na kumuha na ang DepEd ng serbisyo ng third party experts para alamin kung competitive pa ang suweldo ng mga guro.

Nais din aniya nilang malaman ang tamang rate ng dagdag na kanilang ibibigay dahil sa epekto ng inflation.

Bilang sagot naman sa ulat na may ilang guro ang hindi pa nakakatanggap ng performance-based bonus noong 2021, tiniyak ni Poa na makukuha na nila ito pagkatapos ng processing sa loob ng 2 hanggang 3 linggo.

Iginiit din niya na walang nangyaring delay, kundi dahil ito sa proseso.

“It’s really the process, talagang may reconciliation 'yan because 2021 'yung pinag-uusapan natin na bonus year, so we have to make sure na 'yung mga empleyadong tatanggap ay 2021," pahayag ni Poa.

K to 10, target sa SY 2024-2025 — DepEd

ni Madel Moratillo | May 20, 2023

Target ng Department of Education na maipatupad sa school year 2024-2025 ang bagong curriculum na K to 10 o Kinder to Grade 10.

Ayon kay DepEd spokesperson Michael Poa, nangangalap na sila ng feedback mula sa publiko para mai-draft na ang K to 10 curriculum.

Nais aniya nilang malaman ang komento ng publiko para maikonsidera ito sa gagawing curriculum.

Ang Senior High School curriculum naman ay nire-review na aniya at ngayo’y nasa consultation stage.

Tiniyak naman ni Poa na isasailalim ito sa masusing pag-aaral.

Sa ngayon, isinasapinal pa umano ng DepEd ang school calendar para sa school year 2023-2024.