Dagdag-5K non-teaching, aprub — DBM.. Titser, mababawasan na ng trabaho

ni Mylene Alfonso @News | August 31, 2023

Aprubado na ng Department of Budget and Management ang paglikha ng 5,000 non-teaching positions sa Department of Education.

Ayon kay Budget Sec. Amenah Pangandaman, layunin nitong mabigyan ng sapat na manpower at masuportahan ang mga guro sa pagbibigay ng dekalidad na pagtuturo sa mga estudyante.

Binubuo ang 5,000 items ng 3,500 Administrative Officer (AO) II positions na layuning tanggalin sa mga guro ang administrative tasks na sumusuporta sa mga operasyon.

Habang ang 1,500 Project Development Officer (PDO) I positions ay tutulong sa mga AO II at iba pang non-teaching personnel sa pamamagitan ng pagpapatupad ng ilang programa, proyekto at aktibidad na pinangungunahan ng mga eskwelahan o mandato ng DepEd Central Office.

Nabatid na makatatanggap ang mga nasa AO II at PDO I positions ng basic salary na P27,000 (SG-11) base sa Fourth Tranche Monthly Salary Schedule for Civilian Personnel of the National Government.

"Malaking tulong po ito sa ating mga guro na ma-unload sila sa mga administrative work at maka-focus sa pagtuturo sa mga estudyante,” ayon pa kay Pangandaman.

12 DepEd at DBM execs, tinuluyan sa overpriced laptops

ni Jeff Tumbado @News Photo | August 26, 2023

Suspendido ang 12 opisyal mula sa Department of Education (DepEd) at Department of Budget and Management (DBM) kaugnay sa pagbili sa overpriced laptops noong panahon ng Duterte administration.

Sa 11-pahinang resolusyon, sinabi mismo ni Ombudsman Samuel Martires na nakakita sila ng sapat na batayan para suspendihin ang mga opisyal dahil sa grave misconduct, serious dishonesty at gross neglect of duty.

Kabilang sa mga sinuspinde at kinasuhan sina DepEd Undersecretary Annalyn Sevilla, dating DepEd undersecretary Alain del Pascua, dating Department of Budget and Management undersecretary Lloyd Christopher Lao, DepEd Assistant Secretary for Administration and Procurement, Salvador Malana III, Director Abram Abanil of the Information and Communications Technology Services, DepEd/Designated Ad Hoc Member, Special Bids and Awards Committee (SBAC-1) for the “Laptop for Teachers” Project, Director Jasonmar Uayan, Officer-in-Charge, Executive Director, Procurement Service-DBM, Ulysees Mora Procurement Management Officer, PS-DBM and Designated Chairperson, SBAC-1, Marwin Amil, Procurement Management Officer I, PS-DBM and Designated Provisional Member, SBAC-1; Alec Ladanga, Executive Assistant IV, Office of Undersecretary Sevilla, DepEd, Marcelo Bragado, Director IV, Procurement Management Service, DepEd, Selwyn Briones, Supervising Administrative Officer, DepEd, at Paul Armand Estrada, Procurement Management Officer V, PS-DBM and Designated Regular Member, SBAC-1.

Sinabi ng anti-graft body na ang suspensyon ay ayon sa Section 27 ng Ombudsman Law.

“This Order is immediately executory,” giit pa ng Ombudsman.

Nag-ugat ang desisyon ng Ombudsman sa reklamong inihain ng Senate blue ribbon committee sa imbestigasyon nila sa naturang kontrobersiya.

P120.5B kita ng gobyerno — DBM.. Dagdag-buwis sa 2024, tuloy

ni Mylene Alfonso @News | August 17, 2023

Nanindigan ang economic team ng administrasyong Marcos kaugnay sa pagtataas ng buwis para sa susunod na taon.

Ito ang ibinahagi ni Finance Sec. Benjamin Diokno nang humarap sa 2024 National Expenditure Program (NEP) budget briefing ng Development Budget Coordination Committee (DBCC) sa Senado.

Sinabi ni Diokno na patuloy silang makikipagtulungan sa Kongreso sa kinakailangang paniningil ng karagdagang buwis para na rin sa mabilis na paglago ng ekonomiya ng bansa sa pamamagitan ng mga kinakailangang reporma.

Kasama aniya rito ang pagpapasa ng mga natitirang tax reform packages ng nakalipas na administrasyon at mga bagong tax measures sa ilalim ng kasalukuyang Marcos administration.

Ang mga itutulak na dagdag na buwis ay ang Package 4 o ang Passive Income and Financial Intermediary Taxation kabilang ang Excise tax sa single-use plastic,

Rationalization of mining fiscal regime, Motor vehicle road users tax, Excise tax para sa matatamis na inumin at junk foods, Buwis sa pre-mixed alcohol at VAT sa digital service providers.

Nabatid na target na maaprubahan ngayong 19th Congress ang pitong panukala para sa mga nabanggit na dagdag na buwis bilang suporta sa medium-term fiscal framework.

Idinagdag pa ni Diokno na kapag naipatupad ang mga naturang tax measures ay makakalikom ang gobyerno ng P120.5 bilyon na dagdag sa kita para sa taong 2024.

Kapag nagtuluy-tuloy ay tataas pa aniya ang makokolektang buwis dito sa P152.2 bilyon sa 2025 at P183.2 bilyon sa 2026.

Samantala, inihayag naman ni Senador Chiz Escudero na bakit hindi tingnan ang luxury taxes kung magpapataw ng mga bagong buwis.

Ngunit kapag dapat nang ipatupad aniya ang mga bagong buwis, sinabi niyang mas gugustuhin niyang taasan ang luxury tax sa halip na mga road users, online, o value-added taxes.

Matatandaang sinabi ni Escudero na dapat ayusin muna ang tax collection sa halip na magpataw ng mga bagong buwis at bigyan ng dagdag-pasanin ang mga Pinoy.