Ivermectin kontra-ASF, tetestingin

ni Lolet Abania | May 4, 2021

Bumuo ang Department of Agriculture (DA) ng isang research team upang alamin ang potensiyal na maaaring ibigay ng antiparasitic drug na Ivermectin para maiwasan at makontrol ang pagkalat ng African swine fever (ASF).

Sa isang Special Order No. 310, series of 2021, na may petsang April 30, 2021, iniutos ni DA Secretary William Dar na magtatag ng isang research team kung saan tututok sa ASF control and prevention upang maresolbahan ang krisis sa nasabing sakit.

“The research team is tasked to prepare research proposals on the use of Ivermectin, ASF Buster, Cloud Feed and other potential products for the control and prevention of ASF,” ayon sa inilabas na special order ng DA.

“The team is also directed to conduct preliminary field trials of Ivermectin and other agents to produce science-based evidence in support to control and prevention programs of ASF,” dagdag pa ng DA.

Binubuo ang team ng mga technical advisers, kabilang na sina DA Undersecretary William Medrano, National Livestock Program Director Dr. Ruth Miclat-Sonaco, at Bureau of Animal Industry (BAI) officer-in-charge Director Dr. Reildrin Morales.

Inilagay din bilang program leader si BAI OIC-Assistant Director Dr. Rene Santiago habang si Philippine Carabao Center OIC-Deputy Executive Director for Production and Research Dr. Claro Mingala ay assistant program leader.

Ang mga project leaders naman ng research team ay sina National Dairy Authority Deputy Administrator Dr. Farrel Benjelix Magtoto, Pampanga State Agricultural University Associate Professor Dr. Rogelio Carandang, Jr., at BAI Livestock Research and Development Division chief Dr. Marivic de Vera.

Nakasaad pa sa special order na inaatasan ang research team, “to formulate and draft science-based policies for National Guidelines in using Ivermectin and other agents in the control and prevention programs of ASF and collaborate with international research and institution to conduct experiments to support claims in the use of Ivermectin and other agents.”

Matatandaang nagbigay ng matinding atensiyon sa publiko ang Ivermectin dahil sa sinasabing magagamit itong gamot kontra-COVID-19.

Gayunman, hindi pa aprubado ng Food and Drug Administration (FDA) ang pag-inom ng tinatawag na human-grade Ivermectin sa Pilipinas. Ayon sa batas, ang Ivermectin ay maaari lamang i-prescribe sa mga hayop.

Subali't, ang FDA ay nagbigay na ng compassionate use permit para sa paggamit ng Ivermectin sa mga tao laban sa COVID-19 sa limang ospital.

Ayon naman sa FDA, ang pag-isyu nila ng compassionate use permit ay hindi nangangahulugan na ginagarantiya ng ahensiya ang safety at efficacy nito, bagkus, pinayagan lamang nila ito para sa legal administration ng gamot sa bansa.

Samantala, ang resulta ng clinical trials ng Ivermectin bilang treatment sa COVID-19 ng Department of Science and Technology (DOST) ay posibleng lumabas sa Enero 2022.

Pagbabakuna sa baboy kontra-ASF, start na

ni Lolet Abania | April 28, 2021

Sinimulan na ng Bureau of Animal Industry ang trial para sa isang bakuna kontra-African swine fever na gawa ng isang US company. Ayon kay BAI Director Reildrin Morales, napili ang 10 farm na mula sa Luzon base sa pagnanais nilang sumali sa trial at kanilang biosecurity.

“These are vaccines that are not yet registered so kailangang controlled ‘yung lugar where we are conducting the trial,” sabi ni Morales. “Meaning to say, if and when there’s a necessity to stop the trial and do some necessary interventions, we can do that immediately in a biosecured facility,” ani Morales.

Sa ginawang trial, pinagsama-sama ang mga baboy na tinurukan na ng vaccine at mga wala pang bakuna sa isang farm, saka oobserbahan ang mga ito sakaling napasok ng ASF ang nasabing farm. Dito malalaman kung magiging epektibo ang pagbabakuna kontra-ASF.

“We will observe kung halimbawa, let us say we will relax the biosecurity, kung magkakaroon ng challenge doon sa farm, ibig sabihin, napasok ba ‘yung farm, tinamaan ba ‘yung control, ‘yung vaccinated ay ‘di tinamaan? So, there are a lot of parameters,” paliwanag pa ni Morales.

Gayunman, ayon kay Department of Agriculture Secretary William Dar, bumababa na ang kaso ng ASF sa mga baboy sa bansa.

30 M kilong baboy na nakalusot, buking, BOC kinuwestiyon

ni Mary Gutierrez Almirañez | April 15, 2021

Kinuwestiyon ni Senator Francis Pangilinan ang 30 milyong kilo ng baboy na nakalusot sa record ng Bureau of Customs (BOC), gayung naitala iyon ng Bureau of Animal Industry (BAI), batay sa panayam sa kanya ngayong umaga, Abril 15.

Aniya, “’Yan ang gusto nating ipaliwanag, posibleng smuggling ‘yan dahil ito ‘yung mga dokumentong isinumite sa Committee on Agriculture sa Senate ng Bureau of Animal Industry at ng Bureau of Customs. Hindi pareho.”

Paliwanag niya, “256 million kilos ang pumasok sa bansa last year. Sa record nila, 225 million kilos lang. So, kulang ng 30 million.”

Nilinaw ni Sen. Pangilinan na kapag hindi iyon naipaliwanag ng BOC ay ituturing na smuggled ang 30 milyong kilo ng baboy na hindi nai-report sa Senate. Kinuwestiyon din niya kung paano iyon mapapatawan ng buwis kung walang rekord.

Sabi pa niya, “Kinakailangan, lahat ng imported goods ay dumaan sa Customs. Eh, ito, wala sa record ng Customs… Kulang ng 30 million kilos ng karneng imported. So, ano ‘yun?”

Iginiit din niya ang mahigit 5,020 foot containers na hindi nainspeksiyon ng BOC, batay sa iniulat ng Department of Agriculture at Compliance and Regulatory Enforcement for Security and Trade Office (CREST-O) sa naganap na hearing nitong Lunes.

“Sila ang nag-report n’yan, ha? Hindi galing sa ‘min ‘yan. DA created CREST-O para nga mabusisi itong mga imports na ito. Du’n lumalabas ‘yung bogus na mga importer. 'Yung address, mali ‘yung address. Walang kapasidad. Sila mismo ang nagsabi, 5,020 footers ng karne ang maaaring nakalusot na mga importer na ito na bogus.”

Sa ngayon ay wala pang sagot ang Bureau of Customs hinggil sa nakalusot na 30 milyong kilo ng baboy, kung saan mahigit $90 million ang naging discrepancy, mula sa $3 per kilo ng baboy.