Gayuma (2)

ni Maria Angela Gonzales @Kuwentong Pag-Ibig | December 16, 2023

“Kailan ba kayo magpapakasal?” Nananabik na tanong ng isang reporter na si Crispy Pata. 

Siyempre hindi ito ang tunay niyang pangalan, pero mas pinili niyang gawing katawa-tawa ito para umano mas madaling matandaan. Tama naman ang kanyang desisyon dahil isa siyang certified tsismosa ng taon. 

“Gusto mo ngayon na?” wika ni Gabriel Monteverde habang nakatingin sa kanyang kasintahan na si Princess Sandoval. 

Kahit hindi pa pormal na nagsasabi ang magkasintahan, pero sobra ang kilig na naramdaman ni Princess. Tiyak naman kasi niyang hindi lang pang-showbiz ang sagot ng kanyang nobyo.  Alam naman kasi niyang mahal na mahal siya nito. At siyempre, ganu’n din ang nararamdaman niya rito. 

“Ay, hindi puwede” sagot naman ni Princess. 

“Ibig sabihin, hindi mo pakakasalan si Gabriel?” Manghang tanong ni Crispy Pata. 

Kahit kinakabahan si Gabriel, mas naniniwala siya sa pag-ibig ni Princess, kaya nasisiguro niyang hindi siya nito ipapahiya sa buong mundo. 

“Hindi tayo puwedeng ikasal ngayon dahil wala namang pari eh,” wika ni Princess habang matamis na matamis ang pagkakangiti sa kanya. 

“So ibig sabihin, handa na kayong magpakasal?” Manghang tanong ni Crispy Pata. 

“Oo naman, wala naman akong ibang gugustuhing makasama kundi si Gabriel.”

Gusto ring sang-ayunan ni Gabriel ang sinabi ng kanyang nobya, pero bigla siyang natigilan dahil may boses siyang naririnig sa kanyang utak na paulit-ulit na nagsasabi ng mga salitang “akin ka, akin ka, akin ka!

“Love…?” Tawag sa kanya ni Princess. 

Napansin ni Princess na putlang-putla si Gabriel kaya hinawakan niya ang kamay nito at laking gulat niya na sobrang lamig nito. 

“Ano’ng nangyayari?” Tanong naman ni Crispy Pata. 

Gusto sanang sagutin ni Gabriel ang katanungan iyon, pero parang binabarena na ngayon ang kanyang utak. 

Itutuloy…

Gayuma (1)

ni Maria Angela Gonzales @Kuwentong Pag-Ibig | December 15, 2023

UNANG LABAS.           

Ako si Baninay Jose, 21, ipinanganak sa Manila, pero ang aking mga ninuno ay nagmula sa Visayas. Hindi ko alam ang eksaktong lugar at hindi na rin umano importante iyon.

Ang mahalaga ay nandito kami sa Manila. 

Ibig niyang mahiwagaan sa kanyang ina, at para bang may gusto itong itago sa kanya.

Kung magkaila kasi ito ay para bang artista na nagsasabing ‘we're just friends’.

Speaking of artista, maya-maya ay nakita niya ang kanyang Senyorito Gabriel Monteverde. Tiyak na papakabugin na naman nito ang kanyang puso, paano ba naman kasi eh, napakaguwapo nito. Tall, dark and handsome, at mala Derek Ramsay kung titingnan. Ngunit para sa kanya, mas guwapo pa rin ang kanyang senyorito. 

Kaya naman kahit na isang pelikula palang ang nagagawa nito ay talagang pinapanood niya. Hindi lang dahil guwapo ito kundi dahil din sa kanyang leading lady at girlfriend nitong si Princess Sandoval. 

Bigla tuloy bumigat ang kanyang kalooban. Masyado kasing tanggap ng publiko and tandem nina Gabriel at Princess. Walong taon na rin naman kasi silang magkarelasyon kaya ang inaantay na lang ng publiko ay ang anunsyo ng kanilang kasal. 

“Kasal?” Gilalas niyang sabi sa sarili. 

Pagkaraan ay umiling-iling pa siya, at hindi niya iyon hahayaang mangyari. Mahal na mahal niya ang kanyang senyorito, kaya gusto niya, siya ang bigyan nito ng pangalan. Ngunit, magagawa niya ba iyon?

“Yes!” Sigaw niya sa kanyang sarili. Sigurado siyang mapapasakanya rin ang kanyang Senyorito Gabriel, sa ayaw at gusto nito. 

Itutuloy…

Age is just a number… Bebot, dapat na balikan ang ex-bf, kahit parehas na mashonda

ni Sister Isabel del Mundo - @Mga kuwento ng buhay at pag-ibig | December 15, 2023

Dear Sister Isabel,

Nawa’y nasa mabuti kayong kalagayan gayundin ang mga kasamahan n’yo r’yan sa Bulgar. Lagi akong nagbabasa sa column n’yo. Nakakapulot ako ng mga aral sa pina-publish n’yo at kung paano sosolusyunan ang mga ito. ‘Di ko sukat akalain na may darating din palang problema sa akin na magpapagulo nang husto sa puso’t isipan ko. Naglilingkod ako sa simbahan, pagkatapos ng duty ko, umuuwi agad ako sa bahay para makaiwas sa pakikipagtsismisan sa mga kasamahan ko. 

Ang problema ko ay ang ex-boyfriend ko na nasa abroad. Umuwi na siya rito sa ‘Pinas, ayaw niya akong tantanan, at lagi siyang nakasubaybay sa akin. Umiiwas na ako dahil mayasawa siya. 

Nang bumalik ako rito sa ‘Pinas, dinededma ko lang siya na para bang hindi ko siya kilala. Kasalanan sa mata ng Diyos at sa mata ng tao kung patuloy akong makikipagrelasyon sa kanya. Gayunman, lagi pa rin siyang nakabuntot sa akin.

Sunod nang sunod kahit ‘di ko naman siya pinapansin. Hanggang isang araw, nabalitaan ko na namatay na ang asawa niya. Lalo siyang naging masigasig na ligawan ako at handa umano siyang pakasalan ako. Mayaman siya, may kotse at tiyak na masusunod ang layaw ko ‘pag pinatulan ko siya. Nag-iisa na lang siya sa buhay dahil ang mga anak niya ay may sari-sarili na ring pamilya. Kaya lang, pareho na kaming senior citizen . Ngayon pa ba ako mag-aasawang muli? 

Ano sa palagay n’yo, Sister Isabel? Tatanggapin ko ba siya sa buhay ko, kahit maputi na pareho ang aming buhok? Masakit na rin ang tuhod at malabo na ang paningin ko? Nawa’y gabayan n’yo ako sa pagpapasya.

Nagpapasalamat,

Vilma ng Batangas

Sa iyo, Vilma,

‘Ika nga sa kasabihan, “kalabaw lang ang tumatanda”. Ang puso ng tao ay nanatiling bata at naghahangad na may magmahal at mahalin din siya ng wagas. Age is just a number. Huwag mong pigilan ang damdamin mo dahil lamang senior citizen ka na.

Umibig ka upang ibigin ka rin. Enjoy your life. Minsan lamang tayo tumapak sa mundong ito, at hindi na tayo makababalik pa kung sakaling kunin na tayo ni Lord. 

Samantalahin mo ang pagkakataon habang may nagmamahal pa sa’yo. Ang pag-aasawa ay hindi lamang sex. Tanggapin mo na ang pag-ibig sa iyo ng dati mong dyowa sa abroad tutal biyudo na siya ngayon. Hindi na kasalanan sa Diyos na patulan mo siya.

Walang masama kung itutuloy n’yo ang naudlot n’yong pagmamahalan. Ngayon na ang tamang panahon para kayo ay lumigaya.

Sumasaiyo,

Sister Isabel del Mundo