Bernie Cruz, bagong acting DAR chief — P-Du30

ni Lolet Abania | October 30, 2021

Itinalaga ni Pangulong Rodrigo Duterte si Bernie Cruz bilang acting secretary ng Department of Agrarian Reform (DAR), ayon sa Malacañang ngayong Sabado.

Si Cruz ay DAR undersecretary para sa foreign assisted and special projects office na bago pa ang kanyang appointment nitong Oktubre 28.

“We are confident that Acting Secretary Cruz will continue to oversee the completion of DAR’s programs and projects in the remaining months of the current government,” ani Presidential Spokesperson Harry Roque.

“We wish Acting Secretary Cruz all the best in his new assignment,” sabi pa ni Roque. Papalitan ni Cruz si John Castriciones na nag-resign nitong buwan lamang para tumakbo sa pagka-senador sa May 2022 national at local elections.

Sa isang statement, sinabi ni Cruz na “doble ang pagsisikap” na gagawin ng DAR upang maipamahagi ang lahat ng natitirang undistributed land sa mga walang lupang magsasaka, patuloy na pagbibigay ng suportang serbisyo sa mga agrarian reform beneficiaries (ARBs) at pagkakaloob ng tinatawag na social justice sa mga agrarian communities.

Ayon pa kay Cruz, ang gobyerno ay nananatiling may balance ng mahigit sa 700,000 ektarya ng agricultural lands.

“If these lands were awarded to qualified and deserving ARBs, the country would have a sustainable agricultural sector that would contribute in ensuring food security,” sabi ni Cruz.

“I am committed to bring industrialization in the agricultural sector and through provisions of support services such as various livelihood opportunities, infrastructure projects, farm machineries and equipment, capability-buildings training, loan facilities, among other support, we can achieve a stable rural economy,” pahayag pa ni Cruz.

27 metric tons ng baboy, dumating sa Metro Manila — DA

ni Lolet Abania | February 8, 2021

Dumating na sa Metro Manila ngayong Lunes nang umaga ang mahigit 27 metric tons ng mga baboy na nagmula sa Mindanao. Ito ang kinumpirma ni Department of Agriculture Secretary William Dar na layong matugunan ang kakulangan sa supply ng baboy sa NCR.

Ayon kay Dar, nakipag-usap siya sa Southern Cotabato Swine Producers Association kamakailan at napagkasunduang magpapadala sila ng 10,000 baboy kada linggo sa Metro Manila.

Sinabi ni Dar na ang mga baboy ay idiniretso sa bahay-katayan sa Antipolo saka dadalhin ang mga ito sa pinakamalapit na pamilihan. Nangako naman ang ahensiya na magbibigay sila ng subsidy para sa mga hog raisers.

Binanggit ni Dar na nasa P21 sa kada kilo ng baboy na transport assistance ang ibibigay nila sa mga hog raisers ng General Santos City at iba pang lugar sa Mindanao, P15 naman sa galing sa Visayas, Mimaropa, Bicol, extreme Northern Luzon habang P10 para sa mga hog raisers ng Calabarzon at Central Luzon.

Samantala, nanawagan ang Malacañang sa mga vendors sa Metro Manila na nagsagawa ng “pork holiday” sa takot na malugi dahil sa price freeze na ipinatupad ng gobyerno, na bumalik na sa kanilang operasyon at muling magtinda.

“May mga grupo na nag-declare ng pork holiday, meron din pong nanawagan ng pagkain ng alternative protein sources. Sinusuportahan po natin iyong panawagan for consuming alternative protein sources, pero nakikiusap po kami sa mga nagtitinda ng baboy na ipagpatuloy n'yo po ang pagtitinda,” ani Presidential Spokesperson Harry Roque sa isang press briefing.

Dahil sa price cap, maraming puwesto ng baboy sa palengke ng Balintawak, Divisoria at Trabajo ang nagdeklara ng pork holiday ngayong Lunes. Ipinunto ng mga vendors na hindi kakayanin ng kanilang kabuhayan at malaking pagkalugi ito para sa kanila na ipinatupad ang price cap kaya nagresulta sila sa pagsasagawa ng pork holiday.

Inamin naman ni Roque na inasahan na nila ang ganitong tugon ng mga vendors subalit hindi kailangang ito ay magtagal dahil nakatakdang magbigay ang gobyerno ng tulong-pinansiyal para sa kanila. “Anticipated naman po natin ‘yan (pork holiday), pero kinakailangan pong gawin po ‘yan (price cap),” ani Roque.