P20 bigas, malabo — DA

ni BRT @News | August 23, 2023

Binigyang diin ng Department of Agriculture (DA) na ang pagbaba ng presyo ng bigas sa P20 kada kilo ay depende sa merkado kahit na maabot ng bansa ang target na 95% rice sufficiency.

Ginawa ni DA Undersecretary Leocadio Sebastian ang pahayag sa pagtatanong ni House Deputy Minority Leader Mujiv Hataman ng Basilan kung posible ang P20 kada kilo o presyo ng bigas kung maabot ng DA ang layunin nitong 95% hanggang 97% na self-sufficiency.

Aniya, kung mapapabuti ang value chain, mabawasan ang cost ng post-harvest cost, at cost of production, maaaring ma-maintain ang mababang presyo ng bigas para sa consumers.

Ipinaliwanag ni Sebastian na ang post-harvest production cost ay ang presyo ng bawat kilo ng palay.

Dagdag pa ng opisyal na dapat hindi lang isinasaalang-alang ang availability ng produkto, kundi ay dapat affordable din.

Sa ngayon, ang presyo ng bigas sa iba’t ibang pamilihan sa bansa ay umaabot sa P40-P60 kada kilo.

Kahit may bagyo, El Niño at isyu sa exportation — DA.. 'Pinas, no problem sa bigas

ni Mylene Alfonso @News | August 2, 2023

Nananatiling maaasahan ang supply at demand ng bigas sa Pilipinas sa kabila ng nagbabadyang epekto ng maraming mga kadahilanan.

Kabilang umano ang desisyon ng Russia na umatras mula sa Black Sea Grain Initiative, ang desisyon ng India na ipagbawal ang pag-export ng bigas, bagyo, at ang El Niño phenomenon.

“As of today, we are looking at, you know, sound pa rin naman iyong supply and demand natin,” pahayag ni Dept. of Agriculture Undersecretary Mercedita Sombilla sa isang press briefing sa Malacañang.

Sa kabila ng positibong ulat, sinabi ni Sombilla na si Pangulong Ferdinand Marcos, Jr., na siya ring kalihim ng DA, ay nagpahayag ng pagkabahala sa posibleng epekto ng tatlong pangunahing pandaigdigang isyu sa sektor ng agrikultura ng Pilipinas.

Sinabi ni Sombilla na kailangan nilang pag-usapan ang mga paraan upang mapagaan ang karagdagang epekto ng tatlong pandaigdigang isyu “na lumalawak na ngayon” habang binigyang-diin niya na handa ang DA na pataasin ang produksyon ng bigas sa Pilipinas.

“Naghahanda na kami. ‘Yung production hanggang second quarter, meron tayong parang 39 days na stocks tapos tuloy. Nag-preposition na ang DA ng mga paraan kung saan mapapalaki natin ang produksyon,” ani Sombilla.

“Ang pinakamalaking produksyon ng bigas ay darating pa rin minsan, kung hindi katapusan ng Setyembre, minsan sa Oktubre. So, dagdagan natin ang ating supply, at siyempre, ang usual na supply na makukuha rin natin sa imports,” dagdag nito.

Binigyang-diin din ni Sombilla na ang presyo ng bigas sa merkado ay maaaring maiugnay sa mga epekto ng pagtaas ng presyo ng pataba at halaga ng gasolina, na pabagu-bago pa rin, pangunahin dahil sa Black Sea Grain Initiative.

Bagama’t may mga hindi matatag na paggalaw sa Black Sea Grain Initiative, binigyang-diin ni Sombilla na magdudulot ito ng “very minimal effect” sa merkado ng Pilipinas katulad ng epekto sa desisyon ng India na ipagbawal ang pag-export ng bigas.

Gayunman, binigyang-diin niya na maaaring lumitaw ang isang problema depende sa kung paano tutugon ang ibang mga bansang nag-e-export sa mga pandaigdigang kaganapan, ngunit mahigpit na sinusubaybayan ng DA.

Mga empleyado, maraming ginagawa.. Dept. of Agri, may bonus — P-BBM

ni Mylene Alfonso | June 21, 2023

Makatatanggap ng bonus ang mga empleyado ng Department of Agriculture (DA) kasunod ng 125th founding anniversary ng ahensya.

Ito ang sinabi ni Pangulong Ferdinand Marcos, Jr., na siya ring DA Secretary makaraang pangunahan ang opening ceremony ng pagkakatatag ng ahensya sa Quezon City.

Sa photo opportunity, inihayag ni Marcos na ang mga bonus ay para sa pagsisikap na rin ng mga empleyado.

Pabirong sinabi ng Punong Ehekutibo ang tungkol sa bonus para ngumiti ang mga empleyado nang kinukuhanan ng larawan.

"Binubulungan ako ng ating butihing Senadora (Senator Cynthia Villar) at ang ating kasamahan at lahat ng mga taga-DA, sabi sayang naman ang dami nating pinapagawa

sa mga tao dahil anniversary, dapat may bonus," ani Marcos.

"So, dagdagan naman natin ng kaunting bonus. Sabi naman ni Usec. Ding, eh may savings naman daw kayo, bakit hindi. Inuna ko na doon sa selfie para nakangiti kayo sa picture," saad pa niya.

"Titingnan ko pa kung ano 'yung savings natin pero may bonus kayo," tugon ni Marcos sa panayam ng mga mamamahayag nang tanungin kung magkano ang magiging bonus ng bawat empleyado.